ആഹാരക്രമത്തിലെ ശാസ്ത്രീയരീതികൾ മനസ്സിലാക്കാം

ട്രെൻഡനുസരിച്ചുള്ള ആഹാരമാറ്റം

വർത്തമാനകാലത്ത് നിലവിൽ ഹിറ്റായിട്ടുള്ള ട്രെൻഡിനു പുറകെ വെച്ചുപിടിക്കുന്നവർ ധാരാളമുണ്ട്. വസ്ത്രങ്ങളും ആഭരണങ്ങളും പോലെ പലതരം ഡയറ്റും ട്രെൻഡാകുന്ന കാലത്താണ് നമ്മൾ ജീവിക്കുന്നത്. പക്ഷെ, ലുക്കിൽ മോഡേണാകാൻ വസ്ത്രങ്ങളും ആക്സസറീസും  മാറ്റുന്ന പേലെ അത്രക്ക് സിംപിളല്ല ഡയറ്റിൽ വരുത്തുന്ന മാറ്റങ്ങൾ. ഏതാഹാരം കഴിക്കണമെന്നത് വ്യക്തിസ്വാതന്ത്ര്യത്തിൽ ഉൾപ്പെടുന്ന വിഷയമാണ് എന്നത് സത്യം തന്നെയാണ്. പക്ഷെ ആ തെരഞ്ഞെടുപ്പ് സ്വന്തം ആരോഗ്യത്തെ എങ്ങനെയെല്ലാം സ്വാധീനിക്കുമെന്ന് തിരിച്ചറിയേണ്ടത് ഏറെ അനിവാര്യമാണ്.    

ഇന്ന് ശാസ്ത്രീയമായ വസ്തുതകളേക്കാൾ വേഗത്തിലാണ് പുതിയ ഭക്ഷണ ട്രെൻഡുകൾ പ്രചരിക്കുന്നത്. സോഷ്യൽ മീഡിയയിലെ ഇൻഫ്ലുവൻസർമാരും വൈറൽ വീഡിയോകളും ഓരോരുത്തർക്കും ഓരോ പെർഫെക്റ്റ് ഡയറ്റ് ഉണ്ടെന്ന് നമ്മെ വിശ്വസിപ്പിക്കുന്നു. എന്നാൽ, യഥാർത്ഥത്തിൽ, ട്രെൻഡായി മാറുന്ന എല്ലാ ഡയറ്റുകളും ആരോഗ്യകരമാണെന്നുറപ്പിക്കാനാകില്ല. മാത്രമല്ല, അത് നമുക്കു വേണ്ടതു തന്നെയാണോ എന്ന കാര്യത്തിലും ഉറപ്പില്ല.  

കുറഞ്ഞ സമയം കൊണ്ട് ആഗ്രഹിച്ച പോലെയുള്ള രൂപസൗന്ദര്യം നേടാനായി പലരും കഠിനമായ ഡയറ്റ് പിന്തുടരാറുണ്ട്. എന്നാലത് പലപ്പോഴും അമിതമായ ക്ഷീണം, പോഷകാഹാരക്കുറവ്, അല്ലെങ്കിൽ ഗുരുതരമായ ആരോഗ്യപ്രശ്നങ്ങൾ എന്നിവയിലേക്ക് നയിക്കുന്നു. അതുകൊണ്ട് തന്നെ, വൈറലാകാൻ വേണ്ടി മാത്രം നടത്തുന്ന പ്രചാരണങ്ങളെയും ശാസ്ത്രീയ സത്യങ്ങളെയും തിരിച്ചറിയേണ്ട സമയം അതിക്രമിച്ചിരിക്കുന്നു.

ഇത്തരം തെറ്റിദ്ധാരണകൾ അപകടകരമാകാൻ കാരണം?

ഭക്ഷണത്തെക്കുറിച്ചുള്ള മിഥ്യാധാരണകൾ നമ്മുടെ ജീവിതത്തെ പലതരത്തിലും ബാധിച്ചേക്കാം:

• ശരീരത്തിന് അവശ്യം വേണ്ട വൈറ്റമിനുകളും മിനറലുകളും ലഭിക്കാതെ വരുന്നു

• ശരീരത്തിന്റെ സ്വാഭാവികമായ ദഹന പ്രക്രിയയെ തകരാറിലാക്കുന്നു

• എന്ത് കഴിക്കണം എന്ന കാര്യത്തിൽ അനാവശ്യമായ ഉത്കണ്ഠയും ഭക്ഷണം സംബന്ധിച്ച് തെറ്റായ മനോഭാവവും സൃഷ്ടിക്കുന്നു

• യഥാർത്ഥ ആരോഗ്യപ്രശ്നങ്ങൾക്ക് ഡോക്ടറെ കാണുന്നതിന് പകരം ഇത്തരം ഡയറ്റുകളിൽ അഭയം പ്രാപിക്കുന്നത് അപകടം വരുത്തിവെയ്ക്കും

ആഹാരത്തിലുള്ള ഇത്തരം ട്രെൻഡുകൾ, സമീകൃതവും സ്ഥിരമായി തുടർന്നു പോരാവുന്നതുമായ ഭക്ഷണശീലത്തിൽ നിന്ന് നമ്മെ വ്യതിചലിപ്പിക്കുന്നു എന്നതാണ് സുപ്രധാനമായ മറ്റൊരു കാര്യം.

മിഥ്യാധാരണ 1: “ശരീരഭാരം കുറയ്ക്കാൻ ഏറ്റവും നല്ലത് കീറ്റോ ഡയറ്റ്”

കൊഴുപ്പ് (Fat) ധാരാളമായും കാർബോഹൈഡ്രേറ്റ് (Carbs) വളരെ കുറഞ്ഞ അളവിലും അടങ്ങിയ ഭക്ഷണരീതിയാണ് കീറ്റോജെനിക് അഥവാ കീറ്റോ ഡയറ്റ്.

യാഥാർത്ഥ്യം:

തുടക്കത്തിൽ കീറ്റോ ഡയറ്റിലൂടെ ശരീരഭാരം വേഗത്തിൽ കുറയുന്നത് കണ്ടേക്കാം. എന്നാൽ ഇതിന് പിന്നിലെ പ്രധാന കാരണങ്ങൾ ഇവയാണ്:

• ജലാംശം കുറയുന്നത്: ശരീരത്തിലെ വെള്ളത്തിന്റെ അളവ് കുറയുന്നതിലൂടെയാണ് (Water loss) ഭാരം പെട്ടെന്ന് കുറഞ്ഞതായി തോന്നുന്നത്.

• കലോറി കുറയുന്നത്: കഴിക്കുന്ന ഭക്ഷണത്തിന്റെ അളവ് സ്വാഭാവികമായും കുറയുന്നതും ഇതിനൊരു കാരണമാണ്.

ദീർഘകാലാടിസ്ഥാനത്തിലുണ്ടായേക്കാവുന്ന പ്രശ്നങ്ങൾ:

ഇത്തരം ഡയറ്റുകൾ ദീർഘകാലം തുടരുന്നത് താഴെ പറയുന്ന വെല്ലുവിളികൾക്കിടയാക്കാം:

• പോഷകാഹാരക്കുറവ്: ശരീരത്തിന് വേണ്ട പല അവശ്യ ഘടകങ്ങളും ലഭിക്കാതെ വരുന്നു.

• കൊളസ്ട്രോൾ വർദ്ധന: ഇത് ചീത്ത കൊളസ്ട്രോൾ കൂടാൻ കാരണമായേക്കാം.

• തുടരാനുള്ള പ്രയാസം: കടുത്ത നിയന്ത്രണങ്ങൾ ഉള്ളതിനാൽ ഈ ഭക്ഷണരീതി ജീവിതകാലം മുഴുവൻ കൊണ്ടുപോകാൻ ബുദ്ധിമുട്ടാണ്.

അപസ്മാരം (Epilepsy) പോലുള്ള പ്രത്യേക ആരോഗ്യപ്രശ്നങ്ങളുള്ളവർക്ക് ഡോക്ടർമാരുടെ നിർദ്ദേശപ്രകാരം കീറ്റോ ഡയറ്റ് ഉപകരിച്ചേക്കാം. എന്നാൽ ഈ ഭക്ഷണരീതി എല്ലാവർക്കും ഒരുപോലെ ഗുണം ചെയ്യില്ല.

മിഥ്യാധാരണ 2: “ഇന്റർമിറ്റന്റ് ഫാസ്റ്റിംഗ് ഏവർക്കും അനുയോജ്യം”

ഒരു ദിവസത്തിലെ നിശ്ചിത സമയത്തു മാത്രം ഭക്ഷണം കഴിക്കുകയും ബാക്കി സമയം ഉപവസിക്കുകയും ചെയ്യുന്ന രീതിയാണ് ഇന്റർമിറ്റന്റ് ഫാസ്റ്റിംഗ് (IF).

യാഥാർത്ഥ്യം:

ചിലർക്ക് ഈ രീതി ഗുണകരമാകാറുണ്ട്. പ്രധാനമായും:

• ഇൻസുലിന്റെ അളവ് (Insulin sensitivity) മെച്ചപ്പെടുത്താൻ ഇത് സഹായിക്കും

• ശരീരഭാരം നിയന്ത്രിക്കാൻ ഒരു പരിധിവരെ ഉപകരിക്കും

എന്നാൽ ഇത് എല്ലാവർക്കും യോജിച്ചതല്ല. താഴെ പറയുന്ന വിഭാഗങ്ങളിൽപ്പെട്ടവർ ഇത്തരം ഉപവാസ രീതികൾ പിന്തുടരുന്നത് ഒട്ടും നല്ലതല്ല:

• ഗർഭിണികൾ: കുഞ്ഞിന്റെയും അമ്മയുടെയും ആരോഗ്യത്തിന് കൃത്യമായ ഇടവേളകളിൽ പോഷകാഹാരം അത്യാവശ്യമാണ്

• പ്രമേഹ രോഗികൾ: മരുന്ന് കഴിക്കുന്നവർ ഉപവസിക്കുന്നത് രക്തത്തിലെ പഞ്ചസാരയുടെ അളവ് അപകടകരമാംവിധം കുറയാൻ (Hypoglycemia) കാരണമായേക്കാം

• ഭക്ഷണ ക്രമക്കേടുകൾ (Eating disorders) ഉള്ളവർ: ഭക്ഷണത്തോട് അമിതമായ വിരക്തിയോ മറ്റ് മാനസിക പ്രയാസങ്ങളോ ഉള്ളവർക്ക് ഇത് ദോഷം ചെയ്യും

എപ്പോൾ കഴിക്കുന്നു എന്നതിനേക്കാൾ പ്രധാനമാണ് എന്ത് കഴിക്കുന്നു എന്നത്. ഉപവാസത്തിന് ശേഷമുള്ള സമയങ്ങളിൽ പോഷകഗുണമുള്ള ഭക്ഷണം കഴിച്ചാൽ മാത്രമേ ഇതുകൊണ്ട് എന്തെങ്കിലും പ്രയോജനമുണ്ടാകൂ.

മിഥ്യാധാരണ 3: “ഡിറ്റോക്സ് ഡയറ്റുകൾ ശരീരത്തെ ശുദ്ധീകരിക്കും”

ജ്യൂസുകൾ മാത്രം കുടിച്ചും പ്രത്യേക തരം ഡിറ്റോക്സ് പാനീയങ്ങൾ ഉപയോഗിച്ചും ശരീരത്തിലെ വിഷാംശങ്ങൾ പുറന്തള്ളാം എന്ന പ്രചാരണം വലിയതോതിൽ സ്വാധീനം ചെലുത്തിയിട്ടുണ്ട്. 

യാഥാർത്ഥ്യം:

ശരീരത്തെ ശുദ്ധീകരിക്കാൻ നമുക്ക് പുറത്തുനിന്നുള്ള ഡിറ്റോക്സ് കിറ്റുകളുടെ ആവശ്യമില്ല. അതിനായി നമ്മുടെ ശരീരത്തിൽ തന്നെ പ്രകൃതിദത്തമായ സംവിധാനങ്ങളുണ്ട്:

• കരൾ (Liver): രക്തത്തിലെ മാലിന്യങ്ങളെ നീക്കം ചെയ്യുന്നു

• വൃക്കകൾ (Kidneys): രക്തം ശുദ്ധീകരിച്ച് അനാവശ്യ ഘടകങ്ങളെ മൂത്രത്തിലൂടെ ഒഴുക്കിക്കളയുന്നു

• ദഹനവ്യവസ്ഥ (Digestive system): ഭക്ഷണാവശിഷ്ടങ്ങൾ പുറന്തള്ളുന്നു

പ്രത്യേക ഡിറ്റോക്സ് ഭക്ഷണക്രമങ്ങൾ ശരീരത്തിലെ വിഷാംശങ്ങൾ നീക്കം ചെയ്യുമെന്നതിന് ശാസ്ത്രീയമായി തെളിവൊന്നുമില്ല.

ഡിറ്റോക്സ് ഡയറ്റുകളുടെ ദോഷങ്ങൾ:

ഡിറ്റോക്സ് രീതികൾ അമിതമായി പിന്തുടരുന്നത് താഴെ പറയുന്ന പ്രശ്നങ്ങളുണ്ടാക്കാം:

• ശാരീരിക തളർച്ച: ശരീരത്തിന് ആവശ്യമായ ഊർജ്ജം ലഭിക്കാതെ വരുന്നു

• പോഷകാഹാരക്കുറവ്: അവശ്യ വിറ്റാമിനുകളും മിനറലുകളും ശരീരത്തിന് ലഭിക്കില്ല.

• മെറ്റബോളിസം കുറയുന്നു: ശരീരത്തിന്റെ ഊർജ്ജ ദഹന പ്രക്രിയ സാവധാനത്തിലാകുന്നു.

എല്ലാ ദിവസവും പോഷകഗുണമുള്ള ഭക്ഷണം ശീലമാക്കുന്നതാണ് ഡിറ്റോക്സ് പാനീയങ്ങൾക്ക് പിന്നാലെ പോകുന്നതിനേക്കാൾ നല്ലത്.

മിഥ്യാധാരണ 4: “ഗ്ലൂട്ടൻ ഇല്ലാത്ത ഭക്ഷണമാണ് എല്ലാവർക്കും നല്ലത്”

ഗോതമ്പ്, ബാർലി തുടങ്ങിയ ധാന്യങ്ങളിൽ കാണപ്പെടുന്ന ഒരു തരം പ്രോട്ടീനാണ് ഗ്ലൂട്ടൻ. ‘ഗ്ലൂട്ടൻ-ഫ്രീ’ (Gluten-free) എന്നത് ഇന്നത്തെ കാലത്ത് ആരോഗ്യകരമായ ബദലായിട്ടാണ് പലരും കണക്കാക്കുന്നത്. 

യാഥാർത്ഥ്യം:

ഗ്ലൂട്ടൻ എല്ലാവർക്കും ദോഷകരമല്ല. താഴെ പറയുന്ന പ്രശ്നങ്ങളുള്ളവർ മാത്രമാണ് ഇതൊഴിവാക്കേണ്ടത്:

• സീലിയാക് രോഗം (Celiac Disease): ഗ്ലൂട്ടൻ കഴിച്ചാൽ കുടലിന് ഗുരുതരമായ പ്രശ്നങ്ങൾ ഉണ്ടാകുന്ന അവസ്ഥ

• ഗ്ലൂട്ടൻ സെൻസിറ്റിവിറ്റി: ഇതടങ്ങിയ ഭക്ഷണം കഴിക്കുമ്പോൾ അസ്വസ്ഥതകൾ അനുഭവപ്പെടുന്നവർ

അനാവശ്യമായി ഗ്ലൂട്ടൻ ഒഴിവാക്കിയാലുള്ള ദോഷങ്ങൾ:

ഒരു ആരോഗ്യപ്രശ്നവുമില്ലാത്തവർ ഗ്ലൂട്ടൻ ഒഴിവാക്കുന്നത് താഴെ പറയുന്ന പ്രശ്നങ്ങളിലേക്ക് നയിച്ചേക്കാം:

• നാരുകളുടെ (Fiber) കുറവ്: ഗ്ലൂട്ടൻ അടങ്ങിയ പല ധാന്യങ്ങളും നാരുകളാൽ സമ്പന്നമാണ്. ഇവ ഒഴിവാക്കുന്നത് മലബന്ധം പോലുള്ള പ്രശ്നങ്ങൾക്ക് കാരണമാകാം.

• പോഷകക്കുറവ്: ശരീരത്തിന് ലഭിക്കേണ്ട ചില വിറ്റാമിനുകളും മിനറലുകളും ഇല്ലാതാകാൻ ഇത് കാരണമാകും.

• കുടലിന്റെ ആരോഗ്യം: ഗ്ലൂട്ടൻ അടങ്ങിയ മുഴുധാന്യങ്ങൾ (Whole grains) വാസ്തവത്തിൽ കുടലിലെ നല്ല ബാക്ടീരിയകളുടെ വളർച്ചയ്ക്ക് സഹായിക്കുന്നവയാണ്.

പ്രത്യേകിച്ച് ആരോഗ്യപ്രശ്നങ്ങളില്ലെങ്കിൽ, ഗോതമ്പ് പോലുള്ള ധാന്യങ്ങൾ ഭക്ഷണത്തിൽ ഉൾപ്പെടുത്തുന്നതിൽ തെറ്റില്ല. “ഗ്ലൂട്ടൻ-ഫ്രീ” എന്നതിനെ ഒരു ഫാഷനായി കാണാതെ, നിങ്ങളുടെ ശരീരത്തിന്റെ ആവശ്യത്തിനനുസരിച്ച് മാത്രം തെരഞ്ഞെടുക്കുക.

മിഥ്യാധാരണ 5: വെളിച്ചെണ്ണ അതിവിശിഷ്ടമാണെന്നും വില്ലനാണെന്നുമുള്ള വിരുദ്ധാഭിപ്രായങ്ങൾ

വെളിച്ചെണ്ണയുടെ ഗുണദോഷങ്ങളെക്കുറിച്ച് വലിയ വാദപ്രതിവാദങ്ങൾ നടക്കാറുണ്ട്, പ്രത്യേകിച്ചും നമ്മുടെ നാട്ടിൽ. ചിലർ ഇതിനെ ഒരു ഔഷധമായി കാണുമ്പോൾ മറ്റു ചിലർ ഇത് ഹൃദയാരോഗ്യത്തിന് ദോഷകരമാണെന്ന് വാദിക്കുന്നു.

യാഥാർത്ഥ്യം:

വെളിച്ചെണ്ണയിൽ ‘സാച്ചുറേറ്റഡ് ഫാറ്റ്’ അടങ്ങിയിട്ടുണ്ട് എന്നത് സത്യമാണ്. എങ്കിലും മറ്റു ചില പ്രധാന വസ്തുതകൾ കൂടി നാം അറിയണം:

• ഉയർന്ന താപനിലയിലെ സ്ഥിരത: ഉയർന്ന ചൂടിൽ പാകം ചെയ്യുമ്പോൾ വെളിച്ചെണ്ണ വേഗത്തിൽ നാശമാകുന്നില്ല എന്നതിനാൽ  വറുക്കാനും പൊരിക്കാനും പ്രയോജനകരമാണ്

• പാരമ്പര്യം: നൂറ്റാണ്ടുകളായി നമ്മുടെ ഭക്ഷണക്രമത്തിന്റെ ഭാഗമാണിത്

വെളിച്ചെണ്ണ പൂർണ്ണമായും ഒഴിവാക്കേണ്ടതില്ല, എന്നാൽ അമിതമായി ഉപയോഗിക്കുന്നതും നല്ലതല്ല. മിതമായ അളവിൽ ഉപയോഗിക്കുന്നതാണ് ശരിയായ രീതി.

മിഥ്യാധാരണ 6: “കാർബോഹൈഡ്രേറ്റ് വലിയ പ്രശ്നങ്ങളുണ്ടാക്കും”

ഭാരം കുറയ്ക്കാൻ ആഗ്രഹിക്കുന്നവർ ആദ്യം തന്നെ ചോറും ചപ്പാത്തിയും പൂർണ്ണമായും ഒഴിവാക്കുന്ന രീതി ഇന്ന് നിലവിലുണ്ട്. 

യാഥാർത്ഥ്യം:

എല്ലാ കാർബോഹൈഡ്രേറ്റുകളും പ്രശ്നക്കാരല്ല. നമ്മുടെ ശരീരത്തിന് ആവശ്യമായ ഊർജ്ജത്തിന്റെ പ്രധാന സ്രോതസ്സാണിത്. നാം തിരഞ്ഞെടുക്കുന്ന കാർബോഹൈഡ്രേറ്റുകളുടെ ഗുണനിലവാരത്തിലാണ് കാര്യം.

• ആരോഗ്യകരമായ കാർബ്സ് (ഇവ കഴിക്കാം): തവിടുള്ള ധാന്യങ്ങൾ (Whole grains), പഴങ്ങൾ, പച്ചക്കറികൾ. ഇവയിൽ നാരുകൾ ധാരാളമായി അടങ്ങിയിട്ടുണ്ട്.

• അനാരോഗ്യകരമായ കാർബ്സ് (ഒഴിവാക്കേണ്ടവ): ശുദ്ധീകരിച്ച പഞ്ചസാര, മൈദ ചേർത്ത ഭക്ഷണങ്ങൾ, പാക്കറ്റ് ഭക്ഷണങ്ങൾ (Processed foods).

ഭക്ഷണത്തിൽ നിന്ന് അന്നജം പൂർണ്ണമായും വെട്ടിമാറ്റുന്നതിന് പകരം, നല്ലയിനം കാർബോഹൈഡ്രേറ്റുകൾ തിരഞ്ഞെടുക്കാൻ ശ്രദ്ധിക്കുക. ഊർജ്ജസ്വലത നിലനിർത്താൻ ശരീരത്തിന് ഇതാവശ്യമാണ്.

മിഥ്യാധാരണ 7: “നല്ല ആരോഗ്യത്തിന് സപ്ലിമെന്റുകൾ അത്യാവശ്യമാണ്”

വിറ്റാമിൻ ഗുളികകളും മറ്റ് സപ്ലിമെന്റുകളും കഴിച്ചാലേ പൂർണ്ണ ആരോഗ്യം ലഭിക്കൂ എന്ന് പല കമ്പനികളും നമ്മെ വിശ്വസിപ്പിക്കാറുണ്ട്.

യാഥാർത്ഥ്യം:

നമുക്ക് ആവശ്യമുള്ള മിക്കവാറും എല്ലാ പോഷകങ്ങളും സമീകൃതാഹാരത്തിലൂടെ (Balanced Diet) തന്നെ ലഭിക്കും. ഇനിപ്പറയുന്ന സാഹചര്യങ്ങളിൽ മാത്രമാണ് സപ്ലിമെന്റുകൾ അത്യാവശ്യമായി വരുന്നത്:

• രക്തപരിശോധനയിലൂടെ ശരീരത്തിൽ ഏതെങ്കിലും പോഷകത്തിന്റെ കുറവ് (Deficiency) കണ്ടെത്തിയാൽ

• ഡോക്ടർ നിർദ്ദേശിച്ചാൽ

ആവശ്യമില്ലാതെ ഇത്തരം ഗുളികകൾ അമിതമായി ഉപയോഗിക്കുന്നത് ഗുണത്തേക്കാളേറെ ദോഷം ചെയ്തേക്കാം.

ആരോഗ്യത്തിന് വേണ്ടത് എന്തൊക്കെ? ശാസ്ത്രം പറയുന്നത്

പുതിയ ട്രെൻഡുകൾക്ക് പിന്നാലെ പോകുന്നതിന് പകരം, ശാസ്ത്രീയമായി തെളിയിക്കപ്പെട്ട ലളിതമായ ചില കാര്യങ്ങൾ ശ്രദ്ധിച്ചാൽ മതി:

1.ആരോഗ്യകരമായ ഭക്ഷണങ്ങൾ കഴിക്കുക:

പ്രകൃതിദത്തമായ ഭക്ഷണസാധനങ്ങൾക്ക് മുൻഗണന നൽകുക. അമിതമായി സംസ്കരിച്ചതും പാക്കറ്റുകളിൽ വരുന്നതുമായ (Processed foods) ഭക്ഷണങ്ങൾ പരമാവധി കുറയ്ക്കുക.

2. സന്തുലനം ഉറപ്പാക്കുക:

ഭക്ഷണത്തിൽ കാർബോഹൈഡ്രേറ്റുകൾ, പ്രോട്ടീൻ, ആരോഗ്യകരമായ കൊഴുപ്പ് എന്നിവ ശരിയായ അളവിൽ അടങ്ങിയിരിക്കണം.

3.തുടർച്ചയായ ശീലം പ്രധാനം :

കുറച്ചു ദിവസത്തേക്ക് മാത്രം ചെയ്യുന്ന കഠിനമായ ഡയറ്റുകളേക്കാൾ പ്രധാനം, ജീവിതകാലം മുഴുവൻ കൊണ്ടുപോകാൻ കഴിയുന്ന ലളിതവും നല്ലതുമായ ഭക്ഷണരീതികളാണ്.

4.വ്യക്തിപരമായ മാറ്റങ്ങൾ തിരിച്ചറിയുക:

ഓരോ മനുഷ്യന്റെയും ശരീരം വ്യത്യസ്തമാണ്. ഒരാൾക്ക് മികച്ച ഫലം നൽകിയ ഒരു രീതി മറ്റൊൾക്ക് അനുയോജ്യമാകണമെന്നില്ല. സ്വന്തം ശരീരത്തിന്റെ ആവശ്യങ്ങൾ അറിഞ്ഞു ഭക്ഷണം കഴിക്കുക എന്നതാണ് പ്രധാനം.

നെല്ലിക്ക.ലൈഫിലൂടെ വിദഗ്ധഡോക്ടർമാർ നൽകുന്ന നിർദ്ദേശം

ജീവിതശൈലീ രോഗങ്ങളാൽ ബുദ്ധിമുട്ടുന്ന ഭൂരിഭാഗം രോഗികളുടെയും പ്രശ്നം പുതിയ ഡയറ്റ് ട്രെൻഡുകൾ പരീക്ഷിക്കാത്തതുകൊണ്ട് ഉണ്ടാകുന്നതല്ല.

ക്രമരഹിതമായ ഭക്ഷണരീതിയും അമിതമായ സംസ്കരിച്ച ഭക്ഷണങ്ങൾ ശീലമാക്കുന്നതും പോഷകാഹാരത്തെക്കുറിച്ചുള്ള അവബോധമില്ലായ്മയുമാണ് പ്രശ്നങ്ങൾക്ക് കാരണം.

അതുകൊണ്ട് തന്നെ, കഠിനമായ നിയന്ത്രണങ്ങളുള്ള ഡയറ്റുകളേക്കാൾ പ്രധാനം, എന്നും തുടരാൻ സാധിക്കുന്ന സമീകൃതമായ ഭക്ഷണക്രമമാണെന്ന് വിദഗ്ധർ അഭിപ്രായപ്പെടുന്നു.

നമ്മുടെ പോഷകാഹാര രീതികൾ:

• പ്രായോഗികമായിരിക്കണം (Practical): ദൈനംദിന ജീവിതത്തിൽ എളുപ്പത്തിൽ നടപ്പിലാക്കാൻ കഴിയുന്നതാകണം

• സംസ്കാരത്തിന് യോജിച്ചതാകണം (Culturally relevant): നാം ജീവിക്കുന്ന സാഹചര്യത്തിനും പാരമ്പര്യത്തിനും അനുയോജ്യമായ ഭക്ഷണങ്ങൾ ഉൾപ്പെടുത്തണം

• ശാസ്ത്രീയമായിരിക്കണം (Scientifically sound): വെറും കേട്ടറിവുകളേക്കാൾ ശാസ്ത്രീയ സത്യങ്ങളിൽ അധിഷ്ഠിതമായിരിക്കണം

ട്രെൻഡുകൾക്ക് മുകളിൽ നമുക്ക് ശാസ്ത്രത്തെ പ്രതിഷ്ഠിക്കാം.

ഭക്ഷണ രീതികളിലെ പുതിയ ട്രെൻഡുകൾ കാലത്തിനനുസരിച്ച് മാറിക്കൊണ്ടിരിക്കും. പക്ഷെ നമ്മുടെ ശരീരത്തിന്റെ അടിസ്ഥാന ആവശ്യങ്ങൾ എന്നും ഒരുപോലെ തന്നെയായിരിക്കും. ഓരോ പുതിയ ട്രെൻഡിനും പിന്നാലെ കണ്ണുമടച്ച് പായുന്നതിന് പകരം, 

സ്വന്തം ശരീരത്തെ മനസ്സിലാക്കുക, ശരീരത്തിന് എന്താണ് ആവശ്യമെന്ന് തിരിച്ചറിയുക. കേട്ടറിവുകളേക്കാൾ ശാസ്ത്രീയമായ യാഥാർത്ഥ്യങ്ങൾക്ക് മുൻഗണന നൽകുക. പെട്ടെന്നുള്ള ഫലത്തേക്കാൾ ദീർഘകാല പ്രയോജനങ്ങൾ കണക്കിലെടുക്കുക. 

ഇപ്പോഴത്തെ  ട്രെൻഡാണെന്ന് പറഞ്ഞ് ഡയറ്റുകൾ മാറി മാറി പരീക്ഷിച്ച് ആരോഗ്യം നശിപ്പിക്കുന്നതിന് പകരം, നിങ്ങളുടെ ശരീരത്തിന് ആവശ്യമായ പോഷണം നൽകുന്നതും നിങ്ങൾക്ക് എന്നും മടുപ്പില്ലാതെ പിന്തുടരാൻ കഴിയുന്നതുമായ ആഹാരക്രമം ശീലമാക്കുക. അത്, സ്ഥായിയായ ആരോഗ്യവും ഉൻമേഷവും നൽകും.