ജീവിതശൈലി അമിത രക്തസമ്മർദ്ദത്തിന് കാരണമാകുന്നതെങ്ങനെ?
ആധുനിക ജീവിതരീതിയും രക്താതിമർദ്ദവും തമ്മിലുള്ള ശാസ്ത്രീയ ബന്ധം മനസ്സിലാക്കാം
ബ്ളഡ് പ്രഷർ അഥവാ രക്തസമ്മർദ്ദത്തിലെ ഉയർച്ചതാഴ്ച്ചകൾക്ക് അടിസ്ഥാനമായ കാരണങ്ങളിൽ എടുത്തുപറയേണ്ട ഒന്നാണ് ജീവിതശൈലിയുടെ സ്വാധീനം. പനിയോ തലവേദനയോ പോലെ പെട്ടെന്നു പ്രത്യക്ഷപ്പെടുന്ന രോഗമല്ല അമിത രക്തസമ്മർദ്ദം. അനാരോഗ്യകരമായ ജീവിതശൈലി, ഉപാപചയ പ്രവർത്തനങ്ങളിലെ മാറ്റങ്ങൾ, വിട്ടുമാറാത്ത മാനസിക സമ്മർദ്ദം, ഉറക്കമില്ലായ്മ, ചുറ്റുപാടുകൾ ചെലുത്തുന്ന സമ്മർദ്ദം എന്നിവയുടെയെല്ലാം ഫലമായി വളരെ സാവധാനത്തിൽ പിടിമുറുക്കുന്ന അസുഖമാണത്. അതുകൊണ്ടുതന്നെയാണ് അമിത രക്തസമ്മർദ്ദം ജീവിതശൈലീ രോഗത്തിൻ്റെ (Lifestyle disease) പട്ടികയിൽ ഇടം പിടിക്കുന്നതും. പലപ്പോഴും ബി പി കൂടുതലാണെന്ന് തിരിച്ചറിയുമ്പോഴേക്കും ഹൃദയം, രക്തക്കുഴലുകൾ, വൃക്കകൾ, തലച്ചോറ്, കണ്ണുകൾ എന്നിവയെ അത് ബാധിച്ചു തുടങ്ങിയിട്ടുണ്ടാകും.
രക്താതിമർദ്ദം ഉണ്ടാകുന്നതിലും അത് അനിയന്ത്രിതമാകുന്നതിലും നമ്മുടെ ദൈനംദിന ശീലങ്ങൾ വലിയ പങ്കുവഹിക്കുന്നുണ്ടെന്ന് ആധുനിക വൈദ്യശാസ്ത്രം വ്യക്തമായി പ്രതിപാദിക്കുന്നുണ്ട്. അമിതമായി ഉപ്പു ചേർത്ത ഭക്ഷണം, പൊണ്ണത്തടി, വ്യായാമമില്ലായ്മ, പുകവലി, മദ്യപാനം, ഉത്കണ്ഠ, ഉറക്കപ്രശ്നങ്ങൾ എന്നിവയെല്ലാം ഹൈപ്പർടെൻഷൻ വരാനുള്ള സാധ്യത പലമടങ്ങു വർദ്ധിപ്പിക്കുമെന്ന് ശാസ്ത്രീയ പഠനങ്ങൾ തെളിയിക്കുന്നു. ഹൃദ്രോഗം, പക്ഷാഘാതം, വൃക്കകളുടെ തകരാറ്, അകാല മരണം എന്നിവയ്ക്കുള്ള ലോകത്തിലെ ഏറ്റവും പ്രധാനപ്പെട്ട കാരണങ്ങളിലൊന്നായി ഉയർന്ന രക്തസമ്മർദ്ദം ഇപ്പോഴും തുടരുന്നതുകൊണ്ടുതന്നെ, നമ്മുടെ ജീവിതശൈലി എങ്ങനെയാണ് ഇതിനെ ബാധിക്കുന്നതെന്ന് മനസ്സിലാക്കേണ്ടത് ഏറെ അനിവാര്യമാണ്.
എന്താണ് യഥാർത്ഥത്തിൽ ഹൈപ്പർടെൻഷൻ?
ഹൃദയം പമ്പ് ചെയ്യുന്ന രക്തം, ധമനീഭിത്തികളിൽ ഏൽപ്പിക്കുന്ന മർദ്ദത്തെയാണ് രക്തസമ്മർദ്ദം (Blood pressure) എന്ന് പറയുന്നത്. ശരീരത്തിന്റെ എല്ലാ ഭാഗത്തേക്കും ഓക്സിജനും പോഷകങ്ങളും എത്തിക്കാൻ ഈ മർദ്ദം അത്യാവശ്യമാണ്. എന്നാൽ, ഇത് വർഷങ്ങളോളം ഉയർന്ന നിലയിൽ തന്നെ തുടർന്നാൽ, അത് രക്തക്കുഴലുകൾക്കും ശരീരത്തിലെ മറ്റ് പ്രധാന അവയവങ്ങൾക്കും അമിതമായ ആയാസം (strain) നൽകുന്നു.
ലോകാരോഗ്യ സംഘടനയുടെ (WHO) മാനദണ്ഡങ്ങൾ പ്രകാരം, പലതവണ പരിശോധിക്കുമ്പോഴും ഒരാളുടെ സിസ്റ്റോളിക് രക്തസമ്മർദ്ദം 140 mmHg യിലോ അതിന് മുകളിലോ ആണെങ്കിൽ, അതുപോലെ ഡയസ്റ്റോളിക് രക്തസമ്മർദ്ദം 90 mmHg യിലോ അതിന് മുകളിലോ തുടരുകയാണെങ്കിൽ അതിനെ ഹൈപ്പർടെൻഷനായി സ്ഥിരീകരിക്കാം.
ലക്ഷണങ്ങൾ കാണിക്കാതെ നിശബ്ദമായി അവയവങ്ങളെ ആക്രമിക്കുന്നു എന്നതാണ് ഹൈപ്പർടെൻഷന്റെ ഏറ്റവും വലിയ അപകടം. ശരീരത്തിനുള്ളിൽ രക്തക്കുഴലുകൾക്ക് പതുക്കെപ്പതുക്കെ കേടുപാടുകൾ സംഭവിച്ചുകൊണ്ടിരിക്കുമ്പോഴും പലർക്കും ശാരീരിക ബുദ്ധിമുട്ടുകളോ അസുഖലക്ഷണങ്ങളോ അനുഭവപ്പെടാറില്ല എന്നതാണ് സത്യം.
ജീവിതശൈലിയും രക്തസമ്മർദ്ദവും തമ്മിലുള്ള ബന്ധം
ഉപ്പിന്റെ അമിതോപയോഗവും ശരീരത്തിൽ വെള്ളം കെട്ടിനിൽക്കുന്നതും
ഉയർന്ന രക്തസമ്മർദ്ദത്തിലേക്ക് നയിക്കുന്ന ജീവിതശൈലിയിലെ ഏറ്റവും പ്രധാനപ്പെട്ട കാരണങ്ങളിലൊന്നാണ് അമിതമായ സോഡിയത്തിന്റെ (ഉപ്പിന്റെ) ഉപയോഗം. നമ്മുടെ ഇന്നത്തെ ഭക്ഷണരീതിയിൽ പ്രോസസ്സ് ചെയ്ത ഭക്ഷണങ്ങൾ, പാക്കറ്റ് പലഹാരങ്ങൾ (snacks), ഹോട്ടൽ ഭക്ഷണങ്ങൾ, ഫാസ്റ്റ് ഫുഡ്, ദീർഘകാലം കേടാകാതിരിക്കാൻ പ്രിസർവേറ്റീവുകൾ ചേർത്തുണ്ടാക്കുന്ന ഉൽപ്പന്നങ്ങൾ എന്നിവ ഉൾപ്പെടുന്നുണ്ട്. ശരീരത്തിന് ആവശ്യമായതിലും എത്രയോ മടങ്ങ് അധികം സോഡിയമാണ് ഇത്തരം ആഹാരപദാർത്ഥങ്ങളിൽ അടങ്ങിയിരിക്കുന്നത്.
ശരീരത്തിൽ സോഡിയത്തിന്റെ അളവ് അമിതമാകുമ്പോൾ, അതു സന്തുലിതമാക്കാൻ ശരീരം കൂടുതൽ ജലാംശം പിടിച്ചുനിർത്താൻ തുടങ്ങും. ഇത് രക്തത്തിന്റെ അളവ് (blood volume) വർദ്ധിപ്പിക്കുകയും രക്തക്കുഴലുകളുടെ ഭിത്തികളിൽ കൂടുതൽ മർദ്ദം ഏൽപ്പിക്കുകയും ചെയ്യുന്നു. കാലക്രമേണ, രക്തക്കുഴലുകളുടെ സ്വാഭാവികമായ വഴക്കം (flexibility) നഷ്ടപ്പെട്ട് അവ കൂടുതൽ കട്ടിയുള്ളതായി മാറുകയും ഇത് സ്ഥിരമായി രക്തസമ്മർദ്ദം ഉയർന്നുനിൽക്കാൻ കാരണമാവുകയും ചെയ്യുന്നു.
ഭക്ഷണത്തിൽ ആവശ്യത്തിന് പൊട്ടാസ്യം ഇല്ലാത്തത് ഈ അവസ്ഥയെ കൂടുതൽ മോശമാക്കുമെന്ന് പഠനങ്ങൾ പറയുന്നു. കാരണം, ശരീരത്തിലെ സോഡിയത്തിന്റെ അളവ് കൃത്യമായി നിലനിർത്താനും രക്തക്കുഴലുകളുടെ ആരോഗ്യം സംരക്ഷിക്കാനും പൊട്ടാസ്യം അത്യാവശ്യമാണ്. അതുകൊണ്ടുതന്നെ, ആവശ്യത്തിന് പഴങ്ങളും പച്ചക്കറികളും ഉൾപ്പെടുത്താത്ത ഭക്ഷണരീതി ഉയർന്ന രക്തസമ്മർദ്ദത്തിനുള്ള സാധ്യതയെ പരോക്ഷമായി വർദ്ധിപ്പിക്കുന്നു.
അമിതവണ്ണവും ശരീരത്തിലുണ്ടാകുന്ന സമ്മർദ്ദവും
ഉയർന്ന രക്തസമ്മർദ്ദത്തിന് കാരണമാകുന്ന, എന്നാൽ നമുക്ക് പരിശ്രമിച്ചാൽ മാറ്റിയെടുക്കാൻ കഴിയുന്ന ഏറ്റവും പ്രധാനപ്പെട്ട കാരണങ്ങളിലൊന്നാണ് അമിതവണ്ണം. ശരീരത്തിലെ അമിതമായ കൊഴുപ്പ് ഹൃദയത്തിന്റെ ജോലിഭാരം വർദ്ധിപ്പിക്കുന്നു. രക്തചംക്രമണ വ്യവസ്ഥയ്ക്ക് കൂടുതൽ ശക്തിയോടെ പ്രവർത്തിക്കേണ്ടി വരികയും കൂടുതൽ രക്തം പമ്പ് ചെയ്യേണ്ടി വരികയും ചെയ്യുന്നു.
ഇതിനുപുറമെ, അമിതവണ്ണം ശരീരത്തിലെ ഹോർമോണുകളുടെ സന്തുലിതാവസ്ഥയെയും തെറ്റിക്കുന്നു. കൊഴുപ്പ് വർദ്ധിക്കുന്നത് ശരീരത്തിൽ വീക്കം (inflammation), ഇൻസുലിൻ പ്രതിരോധത്തിലെ വ്യതിയാനം, നാഡീവ്യൂഹങ്ങളുടെ അമിതമായ പ്രവർത്തനം, വൃക്കകളുടെ പ്രവർത്തന വൈകല്യം എന്നിവയ്ക്ക് കാരണമാകുന്നു. ഇവയെല്ലാം തന്നെ രക്തസമ്മർദ്ദം ഉയർത്തുന്ന ഘടകങ്ങ ളാണ്. ശരീരഭാരം വർദ്ധിക്കുന്നത് (ഉയർന്ന BMI) രക്താതിമർദ്ദസാധ്യത വലിയ രീതിയിൽ കൂട്ടുമെന്ന് പഠനങ്ങൾ തെളിയിച്ചിട്ടുണ്ട്.
വ്യായാമമില്ലായ്മയും രക്തക്കുഴലുകളുടെ തകരാറും
മനുഷ്യന്റെ ഹൃദയവും രക്തചംക്രമണ വ്യവസ്ഥയുമെല്ലാം ശാരീരികമായ ചലനങ്ങൾക്ക് അനുയോജ്യമായ രീതിയിലാണ് സൃഷ്ടിക്കപ്പെട്ടിരിക്കുന്നത്. സ്ഥിരമായുള്ള വ്യായാമം രക്തക്കുഴലുകളുടെ വഴക്കം (elasticity) നിലനിർത്താനും രക്തയോട്ടം മെച്ചപ്പെടുത്താനും ശരീരഭാരം നിയന്ത്രിക്കാനും ഇൻസുലിന്റെ പ്രവർത്തനം സുഗമമാക്കാനും മാനസിക സമ്മർദ്ദം സൃഷ്ടിക്കുന്ന ഹോർമോണുകളുടെ ഉൽപ്പാദനം കുറയ്ക്കാനും സഹായിക്കുന്നു.
എന്നാൽ, ഒട്ടും വ്യായാമമില്ലാത്ത ജീവിതശൈലി ഇതിന് നേർവിപരീതമായ ഫലമാണ് ഉണ്ടാക്കുന്നത്. ദീർഘനേരം അനങ്ങാതിരിക്കുന്നത് രക്തക്കുഴലുകളുടെ കാര്യക്ഷമത കുറയ്ക്കുകയും അത് അമിതവണ്ണം, രക്തയോട്ടത്തിലെ പാകപ്പിഴകൾ, ഉപാപചയ പ്രവർത്തനങ്ങളിലെ (metabolism) തകരാറുകൾ തുടങ്ങിയ പ്രശ്നങ്ങളിലേക്ക് നയിക്കുകയും ചെയ്യുന്നു. കാലക്രമേണ, ഈ മാറ്റങ്ങൾ രക്തസമ്മർദ്ദം ഗണ്യമായി ഉയരാൻ കാരണമാകുന്നു. ചിട്ടയായ വ്യായാമങ്ങൾക്ക് (Aerobic exercise) സിസ്റ്റോളിക്, ഡയസ്റ്റോളിക് സമ്മർദ്ദം കുറയ്ക്കാൻ സാധിക്കുമെന്ന് ഗവേഷണങ്ങൾ വ്യക്തമാക്കുന്നുണ്ട്. ദിവസവും വേഗത്തിലുള്ള നടത്തം (brisk walking) പോലെയുള്ള ലളിതമായ കാര്യങ്ങൾ പോലും ഹൃദയത്തിന്റെ ആരോഗ്യത്തിന് വലിയ ഗുണങ്ങൾ നൽകും.
നിരന്തര മാനസിക സമ്മർദ്ദവും നാഡീവ്യൂഹ പ്രവർത്തനവും
മാനസിക സമ്മർദ്ദം (Stress) എന്നത് ഇന്ന് കേവലം ഒരു വൈകാരിക പ്രശ്നം മാത്രമായി കണക്കാക്കപ്പെടുന്നില്ല. വിട്ടുമാറാത്ത മാനസിക സമ്മർദ്ദം ഹൃദയത്തിന്റെ ആരോഗ്യത്തെ നേരിട്ട് ബാധിക്കുമെന്ന് ആധുനിക ശാസ്ത്രം നിരന്തരം നമ്മെ ഓർമ്മിപ്പിക്കുന്നുണ്ട്. മാനസിക സമ്മർദ്ദം നേരിടുമ്പോൾ, അത് ശരീരത്തിലെ നാഡീവ്യൂഹങ്ങളെ ഉത്തേജിപ്പിക്കുകയും അഡ്രിനാലിൻ (adrenaline), കോർട്ടിസോൾ (cortisol) തുടങ്ങിയ ഹോർമോണുകൾ പുറപ്പെടുവിക്കാൻ കാരണമാവുകയും ചെയ്യുന്നു. അടിയന്തര സാഹചര്യത്തെ നേരിടാനുള്ള ശരീരത്തിന്റെ തയ്യാറെടുപ്പിന്റെ ഭാഗമായി, ഈ ഹോർമോണുകൾ താൽക്കാലികമായി ഹൃദയമിടിപ്പും രക്തസമ്മർദ്ദവും വർദ്ധിപ്പിക്കുന്നു.
വല്ലപ്പോഴും ഉണ്ടാകുന്ന ഇത്തരം സമ്മർദ്ദങ്ങൾ സ്വാഭാവികമാണ്. എന്നാൽ വിട്ടുമാറാത്ത ടെൻഷൻ മൂലം ഈ പ്രക്രിയ ശരീരത്തിൽ നിരന്തരം ആവർത്തിക്കപ്പെടുകയും അതുവഴി രക്തക്കുഴലുകൾക്ക് തുടർച്ചയായുള്ള ആയാസം, ശരീരത്തിൽ നീർക്കെട്ട് (inflammation), ഹോർമോൺ അസന്തുലിതാവസ്ഥ, ഉറക്കമില്ലായ്മ എന്നിവയ്ക്ക് കാരണമാവുകയും ചെയ്യുന്നു. കൂടാതെ ഇത് അമിതമായി ഭക്ഷണം കഴിക്കുക, പുകവലിക്കുക, മദ്യപിക്കുക തുടങ്ങിയ അനാരോഗ്യകരമായ ശീലങ്ങളിലേക്കും നമ്മെ നയിക്കുന്നു. വൈകാരികമായ തളർച്ച, അമിതമായ ജോലിഭാരം, സാമ്പത്തിക ബുദ്ധിമുട്ടുകൾ, ജോലിയിലും ജീവിതത്തിലുമുള്ള താളപ്പിഴകൾ, അമിതമായ ഡിജിറ്റൽ ഉപയോഗം എന്നിവ നിറഞ്ഞ ഇന്നത്തെ ജീവിതശൈലി, ഹൃദ്രോഗങ്ങൾക്കുള്ള പ്രധാന കാരണങ്ങളിലൊന്നായി അംഗീകരിക്കപ്പെടുന്നുണ്ട്.
ഉറക്കമില്ലായ്മയും ഹോർമോൺ അസന്തുലിതാവസ്ഥയും
ഹൃദയത്തിന്റെയും രക്തചംക്രമണ വ്യവസ്ഥയുടെയും ആരോഗ്യം കൃത്യമായി നിലനിർത്തുന്നതിൽ ഉറക്കത്തിന് വലിയൊരു പങ്കുണ്ട്. ആരോഗ്യകരമായി ഉറങ്ങുന്ന സമയത്ത്, രക്തസമ്മർദ്ദം സ്വാഭാവികമായി കുറയുകയും ശരീരത്തിന് ആവശ്യമായ വിശ്രമവും അറ്റകുറ്റപ്പണികളും നടക്കുകയും ചെയ്യുന്നു. എന്നാൽ സ്ഥിരമായുള്ള ഉറക്കമില്ലായ്മ ഈ പ്രക്രിയയെ തടസ്സപ്പെടുത്തുന്നു.
ദിവസവും ഏഴ് മണിക്കൂറിൽ താഴെ മാത്രം ഉറങ്ങുന്നത്, ഹോർമോണുകളുടെ വ്യതിയാനത്തിനും നിരന്തര മാനസിക സമ്മർദ്ദങ്ങൾക്കും വഴിവെക്കുകയും അങ്ങനെ ഉയർന്ന രക്തസമ്മർദ്ദത്തിനുള്ള സാധ്യത വർദ്ധിപ്പിക്കുകയും ചെയ്യുമെന്ന് പഠനങ്ങൾ വെളിപ്പെടുത്തുന്നുണ്ട്. സ്ലീപ് ആപ്നിയ (Obstructive sleep apnea) പോലെയുള്ള ഉറക്കപ്രശ്നങ്ങൾ ഉള്ളവരിൽ, രാത്രിയിൽ ഇടയ്ക്കിടെ ശ്വാസതടസ്സം ഉണ്ടാകുന്നതുമൂലം ശരീരത്തിൽ ഓക്സിജൻ കുറയുന്നതും അത് നാഡീവ്യൂഹത്തെ ഉത്തേജിപ്പിക്കുന്നതും ഉയർന്ന രക്തസമ്മർദ്ദത്തിലേക്ക് നയിക്കുന്നു. ഇന്നത്തെ സമൂഹത്തിൽ, കൂടുതൽ നേരം സ്ക്രീനുകൾ നോക്കിയിരിക്കുന്നത്, തെറ്റായ ഉറക്കശീലങ്ങൾ, രാത്രി വൈകിയുള്ള മൊബൈൽ/കമ്പ്യൂട്ടർ ഉപയോഗം, ജോലി സംബന്ധമായ ടെൻഷനുകൾ എന്നിവയെല്ലാം, ഉറക്കമില്ലായ്മ മൂലമുള്ള ഹൈപ്പർടെൻഷൻ സർവ്വസാധാരണമാക്കുകയാണ്.
പുകവലി, മദ്യപാനം, രക്തക്കുഴലുകൾക്കുണ്ടാകുന്ന കേടുപാടുകൾ
പുകവലി നാഡീവ്യൂഹത്തെ ഉത്തേജിപ്പിക്കുകയും രക്തക്കുഴലുകളെ ചുരുക്കുകയും ചെയ്യുന്നതിലൂടെ വളരെ പെട്ടെന്ന് തന്നെ രക്തസമ്മർദ്ദം ഉയരാൻ കാരണമാകുന്നു. കാലക്രമേണ, പുകയിലയിലെ വിഷാംശങ്ങൾ രക്തക്കുഴലുകളുടെ ഉൾഭിത്തികൾക്ക് കേടുപാടുകൾ വരുത്തുകയും അവയുടെ കട്ടി കൂട്ടുകയും ശരീരത്തിൽ നീർക്കെട്ട് ഉണ്ടാക്കുകയും ഹൃദ്രോഗ സാധ്യത വർദ്ധിപ്പിക്കുകയും ചെയ്യുന്നു.
മദ്യപാനവും രക്തസമ്മർദ്ദത്തെ ദോഷകരമായി ബാധിക്കുന്നു. അമിത മദ്യപാനം രക്തക്കുഴലുകളുടെ സ്വാഭാവികമായ വികാസസങ്കോചങ്ങളെ താളം തെറ്റിക്കുന്നു. നാഡീവ്യൂഹത്തിന്റെ ആയാസം കൂട്ടുകയും അങ്ങനെ കാലക്രമേണ വിട്ടുമാറാത്ത ഉയർന്ന രക്തസമ്മർദ്ദത്തിലേക്ക് നയിക്കുകയും ചെയ്യുന്നു. അമിതവണ്ണം, മാനസിക സമ്മർദ്ദം, വ്യായാമമില്ലായ്മ, അനാരോഗ്യകരമായ ഭക്ഷണരീതി എന്നിവയ്ക്കൊപ്പമാണ് പുകവലിയും മദ്യപാനവും കൂടി ചേരുന്നതെങ്കിൽ അവ കൂടുതൽ അപകടകരമായി മാറുന്നു.
ജീവിതശൈലീപ്രശ്നങ്ങൾ സംയോജിക്കുമ്പോൾ
അനാരോഗ്യകരമായ ഒരൊറ്റ ശീലം മാത്രം പെട്ടെന്നൊരു ദിവസം ഉയർന്ന രക്തസമ്മർദ്ദത്തിന് കാരണമായെന്ന് വരില്ല. എന്നാൽ നവീന ജീവിതശൈലിയിൽ പലപ്പോഴും അപകടകരമായ ഇത്തരം നിരവധി കാര്യങ്ങൾ ഒന്നിച്ചാണ് സംഭവിക്കുന്നത്:
- അനാരോഗ്യകരമായ ഭക്ഷണരീതി
- വ്യായാമമില്ലായ്മ
- മാനസിക സമ്മർദ്ദം (ടെൻഷൻ)
- അമിതവണ്ണം
- ഉറക്കമില്ലായ്മ
- പുകവലി
- ദീർഘനേരം അനങ്ങാതിരിക്കുന്ന ശീലം
കാലക്രമേണ ഈ കാര്യങ്ങളെല്ലാം ഒന്നിച്ചുചേർന്ന് ഹൃദയത്തിനും രക്തചംക്രമണ വ്യവസ്ഥയ്ക്കും വലിയ രീതിയിലുള്ള ആയാസം നൽകുന്നു. ശാസ്ത്രജ്ഞർ ഇതിനെ “മൾട്ടിപ്ലയർ ഇഫക്റ്റ്” (Multiplier effect ) അഥവാ ഇരട്ടിപ്പിക്കുന്ന അവസ്ഥ എന്നാണ് വിശേഷിപ്പിക്കുന്നത്. അതായത്, അനാരോഗ്യകരമായ പല ശീലങ്ങൾ ഒന്നിച്ചുചേരുമ്പോൾ അവ പരസ്പരം സ്വാധീനിക്കുകയും ഭാവിയിൽ ഹൃദ്രോഗങ്ങൾ ഉണ്ടാകാനുള്ള സാധ്യതയെ പലമടങ്ങ് വർദ്ധിപ്പിക്കുകയും ചെയ്യുന്നു.
ജീവിതശൈലി മാറ്റിയാൽ രക്താതിമർദ്ദവും മാറുമോ?
പലപ്പോഴും മാറ്റം വരും എന്നതാണ് സത്യം. അമിത രക്തസമ്മർദ്ദം വരാതെ തടയുന്നതിനും ചികിത്സിക്കുന്നതിനുമുള്ള ഏറ്റവും അടിസ്ഥാനപരമായ കാര്യം ജീവിതശൈലിയിലെ മാറ്റങ്ങളാണെന്ന് ശാസ്ത്രീയ പഠനങ്ങൾ സാക്ഷ്യപ്പെടുത്തുന്നു. ആരോഗ്യകരമായ ജീവിതശൈലി ശീലമാക്കുന്നത് രക്തസമ്മർദ്ദം നിയന്ത്രിച്ചു നിർത്താനും ഹൃദയസംബന്ധമായ മറ്റ് വലിയ ആരോഗ്യപ്രശ്നങ്ങൾ കുറയ്ക്കാനും സഹായിക്കുമെന്ന് ഗവേഷണങ്ങൾ വ്യക്തമാക്കുന്നു.
ഡോക്ടർമാർ സാധാരണയായി നിർദ്ദേശിക്കുന്ന കാര്യങ്ങൾ താഴെ പറയുന്നവയാണ്:
- ഉപ്പിന്റെ ഉപയോഗം കുറയ്ക്കുക
- ശരിയായ ശരീരഭാരം നിലനിർത്തുക
- കൃത്യമായി വ്യായാമം ചെയ്യുക
- മാനസിക സമ്മർദ്ദം നിയന്ത്രിക്കുക
- സ്വസ്ഥമായ ഉറക്കം ശീലമാക്കുക
- പുകവലി പൂർണ്ണമായും ഉപേക്ഷിക്കുക
- മദ്യപാനം നിയന്ത്രിക്കുക
- പോഷകസമൃദ്ധമായ ഭക്ഷണം കഴിക്കുക
രോഗതീവ്രത, പ്രായം, പാരമ്പര്യം, മറ്റ് ആരോഗ്യപ്രശ്നങ്ങൾ എന്നിവ അടിസ്ഥാനമാക്കി ചിലർക്ക് ഇതിനുപുറമെ മരുന്നുകളും ആവശ്യമായി വന്നേക്കാം. എങ്കിലും, ദീർഘകാലത്തേക്ക് ഹൃദയത്തിന്റെ ആരോഗ്യം സംരക്ഷിച്ചു നിർത്തുന്നതിൽ ചിട്ടയായ നമ്മുടെ ജീവിതശൈലിക്ക് തന്നെയാണ് പരമോന്നത സ്ഥാനം എന്നത് നിസ്തർക്കമാണ്.
നവീനകാല വൈദ്യശാസ്ത്രം വെളിപ്പെടുത്തുന്ന യാഥാർത്ഥ്യം
ഉയർന്ന രക്തസമ്മർദ്ദം കേവലം പ്രായമാകുമ്പോൾ മാത്രം ഉണ്ടാകുന്ന ഒരു അസുഖമല്ല; ആധുനിക ജീവിതശൈലീ രോഗമായി അത് മാറിക്കഴിഞ്ഞിരിക്കുന്നു. ഇന്നത്തെ കാലത്തെ ജീവിതശൈലി നൽകുന്ന സമ്മർദ്ദങ്ങൾ, അത് ശാരീരികമോ വൈകാരികമോ മാനസികമോ ആകട്ടെ, പ്രായഭേദമെന്യേ പലരുടെയും ഹൃദയാരോഗ്യത്തെ നിശബ്ദമായി കാർന്നുതിന്നുകൊണ്ടിരിക്കുകയാണ്.
കൃത്യമായ ഇടവേളകളിലുള്ള രക്തസമ്മർദ്ദ പരിശോധന, ജീവിതശൈലീമാറ്റങ്ങൾ, മാനസിക സമ്മർദ്ദ നിയന്ത്രണം, മുൻകരുതലുകൾ എന്നിവയിലൂടെ ഭാവിയിലുണ്ടാകാൻ സാധ്യതയുള്ള അപകടങ്ങളെ നമുക്ക് വലിയൊരു പരിധിവരെ കുറയ്ക്കാൻ കഴിയും.
