ടെൻഷൻ മറികടക്കാനുള്ള മാർഗ്ഗങ്ങൾ നോക്കിയാലോ?

കുട്ടികൾക്കും രക്ഷിതാക്കൾക്കും ഒരുപോലെ ആശങ്ക തോന്നുന്ന സമയമാണ് പരീക്ഷക്കാലം. പഠനകാലത്ത് ഒഴിവാക്കാൻ പറ്റാത്ത പരീക്ഷകളുടെ ഫലത്തേക്കുറിച്ചുള്ള ചിന്തകൾ കുട്ടികളിൽ പരിഭ്രമം സൃഷ്ടിക്കുന്നു.  

പരീക്ഷയ്ക്ക് മുൻപ് ചെറിയ രീതിയിലുള്ള പരിഭ്രമം ഉണ്ടാകുന്നത് നല്ലതാണ്.  കൂടുതൽ ശ്രദ്ധയോടെ പഠിക്കാനും നന്നായി തയ്യാറെടുക്കാനും അത് കുട്ടികൾക്ക് പ്രേരണ നൽകും. എന്നാൽ, ഈ പേടി അമിതമാകുകയും കുട്ടിയുടെ ആരോഗ്യത്തെയും മാനസികാവസ്ഥയെയും ദൈനംദിന ജീവിതത്തെയും ബാധിച്ചു തുടങ്ങുകയും ചെയ്യുമ്പോൾ, അത്, വലിയൊരു ആരോഗ്യ പ്രശ്നമായി മാറുന്നു.

അടുത്ത കാലത്തായി സ്കൂൾ കുട്ടികളിലും കൗമാരക്കാരിലും പരീക്ഷയുമായി ബന്ധപ്പെട്ട ഉത്കണ്ഠ കൂടി വരുന്നതായി കാണുന്നു. പലപ്പോഴും ഈ ഉത്കണ്ഠയുടെ ലക്ഷണങ്ങൾ തുടക്കത്തിൽത്തന്നെ തിരിച്ചറിയാൻ മാതാപിതാക്കൾക്കോ അദ്ധ്യാപകർക്കോ കഴിയാറില്ല എന്നതാണ് സത്യം.

പരീക്ഷാ സമ്മർദ്ദം: വ്യത്യാസങ്ങൾ മനസ്സിലാക്കാം

എല്ലാ പരീക്ഷാ സമ്മർദ്ദങ്ങളും ദോഷകരമല്ല. കുട്ടി അനുഭവിക്കുന്ന പേടിയുടെ തീവ്രത, അത് നീണ്ടുനിൽക്കുന്ന സമയം, അത് ജീവിതത്തെ എങ്ങനെയൊക്കെ ബാധിക്കുന്നു എന്നിവയെ അടിസ്ഥാനമാക്കിയാണ് സമ്മർദ്ദം ഏതുതരത്തിലുള്ളതാണെന്ന് മനസ്സിലാക്കുക.

സാധാരണ പരീക്ഷാ സമ്മർദ്ദം (Normal Stress) പരീക്ഷയോട് അടുത്ത ദിവസങ്ങളിൽ മാത്രം അനുഭവപ്പെടുന്നു. പഠിച്ചു തുടങ്ങുന്നതോടെ ഈ പേടി താനേ മാറിക്കൊള്ളും. കുട്ടിയുടെ ഉറക്കം, ആഹാരരീതി, കൂട്ടുകാരുമായുള്ള ഇടപെടൽ- ഇക്കാര്യങ്ങളെയൊന്നും ഈ പേടി കാര്യമായി ബാധിക്കില്ല.

യഥാർത്ഥത്തിൽ, ഇത് നന്നായി പഠിക്കാൻ കുട്ടിയെ സഹായിക്കുന്ന ഒരു പോസിറ്റീവ് പ്രേരണയാണ്.

അമിതമായ പരീക്ഷാപ്പേടി (Problematic Fear) പരീക്ഷയ്ക്ക് ആഴ്ചകൾക്കോ മാസങ്ങൾക്കോ മുൻപേതുടങ്ങും. ഇത് കുട്ടിയുടെ ഏകാഗ്രതയെയും ഓർമ്മശക്തിയെയും ദോഷകരമായി ബാധിക്കും. ഉറക്കമില്ലായ്മ, വിശപ്പില്ലായ്മ, അമിതമായ മാനസിക വിഷമം എന്നിവ ഈ ഉത്കണ്ഠയുടെ ഭാഗമായി ഉണ്ടാകാം.

ഇവിടെ പേടി, പഠിക്കാൻ പ്രേരിപ്പിക്കുന്നതിന് പകരം, കുട്ടിയുടെ കഴിവിനെ തളർത്തുന്നു. 

പരീക്ഷാപ്പേടി വരുമ്പോൾ തലച്ചോറിന് എന്ത് സംഭവിക്കുന്നു?

നമ്മുടെ തലച്ചോറിന്, ശാരീരികമായ അപകടവും (ഉദാഹരണത്തിന് ഒരു പാമ്പിനെ കാണുന്നത്) മാനസികമായ ഭയവും (പരീക്ഷാപ്പേടി) തമ്മിലുള്ള വ്യത്യാസം പെട്ടെന്ന് തിരിച്ചറിയാൻ കഴിയില്ല. ഒരു വിദ്യാർത്ഥിക്ക് അമിതമായ പേടി തോന്നുമ്പോൾ, മസ്തിഷ്ക്കം പരീക്ഷയെ ഒരു വലിയ ‘അപകടമായി’ കാണുന്നു.

ഇത് തലച്ചോറിൽ ചില മാറ്റങ്ങൾ വരുത്തുന്നു. തലച്ചോറിലെ ഭയത്തെ നിയന്ത്രിക്കുന്ന അമിഗ്ഡാല ഉണരുകയും കോർട്ടിസോൾ (Cortisol), അഡ്രിനാലിൻ (Adrenaline) തുടങ്ങിയ സ്ട്രെസ് ഹോർമോണുകൾ വൻതോതിൽ ഉൽപ്പാദിപ്പിക്കുകയും ചെയ്യുന്നു. കാര്യങ്ങൾ യുക്തിപൂർവ്വം ചിന്തിക്കാനും തീരുമാനമെടുക്കാനും സഹായിക്കുന്ന തലച്ചോറിന്റെ മുൻഭാഗത്തുള്ള പ്രീഫ്രോണ്ടൽ കോർടെക്സ്  (Prefrontal Cortex) ഈ സമയത്ത് പ്രവർത്തനം കുറയ്ക്കുന്നു. പഠിച്ച കാര്യങ്ങൾ ഓർത്തെടുക്കാൻ സഹായിക്കുന്ന ഹിപ്പോകാമ്പസിന്റെ (Hippocampus) പ്രവർത്തനം തടസ്സപ്പെടുന്നതോടെ, ഓർമ്മശക്തിയെയും ബാധിക്കുന്നു 

ഇതുകൊണ്ടാണ് എല്ലാ പാഠങ്ങളും നന്നായി  പഠിച്ച കുട്ടി പോലും പരീക്ഷാ ഹാളിൽ എത്തുമ്പോൾ എല്ലാം മറന്നുപോകുന്നതും (Blank out), പരിഭ്രാന്തനാകുന്നതും. ഇത് മനപ്പൂർവ്വം സംഭവിക്കുന്നതല്ല, മറിച്ച് പേടി കാരണം തലച്ചോറിന്റെ പ്രവർത്തനം തടസ്സപ്പെടുന്നത് കൊണ്ടാണിങ്ങനെ അനുഭവപ്പെടുന്നത്.

പരീക്ഷാ സമ്മർദ്ദവും ശരീരവും തമ്മിലുള്ള ബന്ധം

പരീക്ഷാപ്പേടി എന്നത് മനസ്സിനെ മാത്രം ബാധിക്കുന്ന ഒന്നല്ല. നമ്മുടെ നാഡീവ്യൂഹത്തെയും ഹോർമോൺ പ്രവർത്തനങ്ങളെയും സ്വാധീനിക്കുന്നതിലൂടെ ഇത് ശരീരത്തെ ആകെ ബാധിക്കുന്നു.

സമ്മർദ്ദം കൂടുമ്പോൾ ശരീരം പ്രകടിപ്പിക്കുന്ന ചില മാറ്റങ്ങളുണ്ട്. ഇവ കുട്ടികളുടെ വെറും തോന്നലുകളോ അതിശയോക്തിയോ അല്ല, ശരീരം നൽകുന്ന യഥാർത്ഥ പ്രതികരണങ്ങളാണ്.

സമ്മർദ്ദം കാരണം ദഹനപ്രശ്നങ്ങളും വിട്ടുമാറാത്ത തലവേദനയും ഉണ്ടാകാം.

നെഞ്ചിടിപ്പ് വർദ്ധിക്കുകയും ശരീരം അമിതമായി വിയർക്കുകയും ചെയ്യുക, വിറയലും തളർച്ചയും അനുഭവപ്പെടുക, കൂടാതെ ഉറക്കം സംബന്ധിച്ചും തടസ്സങ്ങൾ ഉണ്ടാകാം. പരീക്ഷാക്കാലത്ത് ഇത്തരം ലക്ഷണങ്ങൾ ആവർത്തിച്ചു വരുന്നുണ്ടെങ്കിൽ, കുട്ടിയുടെ ശരീരം കടുത്ത സമ്മർദ്ദത്തിലാണെന്ന് മനസ്സിലാക്കണം.

പെട്ടെന്ന് തിരിച്ചറിയാൻ കഴിയാത്ത വൈകാരിക മാറ്റങ്ങൾ

പരീക്ഷാപ്പേടി എപ്പോഴും കരച്ചിലോ ബഹളമോ ആയി പുറത്തുവരണമെന്നില്ല. പലപ്പോഴും വളരെ നിശബ്ദമായ ചില മാറ്റങ്ങളിലൂടെയാണ് ഇത് പ്രകടമാകുക.

കുട്ടി പെട്ടെന്ന് ദേഷ്യപ്പെടുകയോ ആരോടും സംസാരിക്കാതെ ഒഴിഞ്ഞുമാറി ഇരിക്കുകയോ ചെയ്യാം. സ്വയം കുറ്റപ്പെടുത്തുന്ന സ്വഭാവം കാണിക്കാം, ചെറിയ തെറ്റുകൾ സംഭവിക്കുന്നതിൽ പോലും അമിതമായ പേടി, ഭീതി മൂലം 

പഠനത്തിൽ നിന്ന് വിട്ടുനിൽക്കാനോ പരീക്ഷ എഴുതാതിരിക്കാനോ കുട്ടി ശ്രമിച്ചേക്കാം. കളികളിൽ താൽപ്പര്യം നഷ്ടപ്പെടുകയും ചെയ്യും. ഇത്തരം ലക്ഷണങ്ങൾ തുടക്കത്തിലേ ശ്രദ്ധിച്ചില്ലെങ്കിൽ പിന്നീടത് വലിയ വിഷാദത്തിലേക്കോ (Depression) കടുത്ത ഉത്കണ്ഠയിലേക്കോ നയിച്ചേക്കാം.

കുട്ടികൾക്ക് പരീക്ഷ ഭാരമാകാനുള്ള കാരണങ്ങൾ?

പഴയ കാലത്തേതിൽ നിന്ന് വ്യത്യസ്തമായി, ഇന്നത്തെ കുട്ടികളിൽ പരീക്ഷാപ്പേടി വർദ്ധിക്കാൻ പല കാരണങ്ങളുണ്ട്. നമ്മുടെ ജീവിതസാഹചര്യങ്ങളിലെ മാറ്റം ഇതിൽ വലിയ പങ്കുവഹിക്കുന്നു.

എല്ലായ്പ്പോഴും എല്ലാവരിലും ഒന്നാമനാകണം എന്ന ചിന്ത കുട്ടികളിൽ വലിയ സമ്മർദ്ദമുണ്ടാക്കുന്നു. ചില രക്ഷിതാക്കളും കുട്ടിയോട് നിരന്തരം ഇക്കാര്യം ആവശ്യപ്പെടുന്നതും സമ്മർദ്ദത്തിന് കാരണമാകുന്നു.

മറ്റു കുട്ടികളുടെ മാർക്കുമായി താരതമ്യം ചെയ്യുന്നതും അവരുടെ ആത്മവിശ്വാസം തകർക്കും. മാർക്ക് കുറഞ്ഞുപോയാൽ ജീവിതം തന്നെ പരാജയപ്പെടുമെന്ന തെറ്റായ ചിന്ത കുട്ടികളിൽ അടിച്ചേൽപ്പിക്കപ്പെടുന്നുണ്ട്. പഠനം കഴിഞ്ഞ് കളിക്കാനും വിശ്രമിക്കാനും സമയം ലഭിക്കാത്തത് തലച്ചോറിന്റെ സമ്മർദ്ദം കുറയ്ക്കാനുള്ള കഴിവിനെ ഇല്ലാതാക്കുന്നു.

സോഷ്യൽ മീഡിയയ്ക്കും ഈ പ്രശ്നത്തിൽ ഒരു പങ്കുണ്ട്.  മറ്റുള്ളവരുടെ വിജയഗാഥകൾ മാത്രം സോഷ്യൽ മീഡിയയിൽ കാണുന്നത് കുട്ടികളിൽ താൻ പിന്നിലാണെന്ന തോന്നൽ സൃഷ്ടിക്കുന്നു.

പരീക്ഷാപ്പേടി ആരോഗ്യ പ്രശ്നമാകുന്നതെപ്പോൾ?

ചെറിയ പേടി സ്വാഭാവികമാണ്. എന്നാൽ ചില സാഹചര്യങ്ങളിൽ വിദഗ്ദ്ധ ചികിത്സയോ കൗൺസിലിംഗോ വേണ്ടിവരും. വിട്ടുമാറാത്ത ഉറക്കപ്രശ്നങ്ങൾ, 

ഭക്ഷണത്തോടുള്ള വിരക്തി, അകാരണമായ ശാരീരിക വേദനകൾ, പരിഭ്രാന്തി, വിഷാദ ലക്ഷണങ്ങൾ,  പരീക്ഷയെ പേടിച്ച് ആരോടും സംസാരിക്കാതെ ഇരിക്കുക, പഠനം ഉപേക്ഷിക്കുക, അല്ലെങ്കിൽ സ്വയം ഉപദ്രവിക്കുന്നതിനെക്കുറിച്ച് ചിന്തിക്കുക എന്നിവയെല്ലാം പരീക്ഷാപ്പേടിയുടെ പ്രതിഫലനമായി പ്രകടമാകാറുണ്ട്. 

ഇത്തരം ഘട്ടങ്ങളിൽ ഭംഗിവാക്കുകൾ പറഞ്ഞ് കുട്ടിയെ    ആശ്വസിപ്പിച്ചതുകൊണ്ടു മാത്രം പ്രശ്നപരിഹാരമാകില്ല. കൃത്യസമയത്ത്  മനഃശാസ്ത്രപരമായ പിന്തുണ നൽകുന്നത് കുട്ടിയുടെ ഭാവി സുരക്ഷിതമാക്കാൻ സഹായിക്കും.

സമ്മർദ്ദം കുറയ്ക്കാൻ മാതാപിതാക്കൾക്ക് എന്ത് ചെയ്യാൻ കഴിയും?

കുട്ടി പരീക്ഷയെ എങ്ങനെ നേരിടുന്നു എന്ന കാര്യത്തിൽ മാതാപിതാക്കളുടെ സമീപനത്തിന് വലിയ പങ്കുണ്ട്. രക്ഷിതാക്കൾ വരുത്തുന്ന ചെറിയ മാറ്റങ്ങൾ പോലും കുട്ടിയുടെ ആത്മവിശ്വാസം വർദ്ധിപ്പിക്കും. കുട്ടി പേടിയെക്കുറിച്ച് സംസാരിക്കുമ്പോൾ കുറ്റപ്പെടുത്താതെ അത് കേൾക്കാൻ തയ്യാറാവുക.

പരീക്ഷയിലെ മാർക്കല്ല കുട്ടിയുടെ മൂല്യം തീരുമാനിക്കുന്നത് എന്ന് ബോധ്യപ്പെടുത്തുക. അവർ നടത്തുന്ന കഠിനാധ്വാനത്തെ അഭിനന്ദിക്കുക.

പരീക്ഷാക്കാലത്ത് കൃത്യസമയത്ത് ഉറങ്ങാനും ഭക്ഷണം കഴിക്കാനും വിശ്രമിക്കാനും കുട്ടിയെ സഹായിക്കുക. ഇത് അവർക്ക് മാനസികമായ സുരക്ഷിതത്വം നൽകും.

മറ്റ് കുട്ടികളുമായോ സഹോദരങ്ങളുമായോ താരതമ്യം ചെയ്യുന്നത് കുട്ടികളിൽ പേടി കൂട്ടാനേ സഹായിക്കൂ. ഓരോ കുട്ടിയും വ്യത്യസ്തരാണെന്ന് മനസ്സിലാക്കുക.

മാതൃകാപരമായ പഠനാന്തരീക്ഷം ഒരുക്കുന്നതിൽ അദ്ധ്യാപകരുടെ പങ്ക്

കുട്ടികൾ പരീക്ഷയെ എങ്ങനെ കാണുന്നു എന്നത് അദ്ധ്യാപകരുടെ ഇടപെടലുകളെക്കൂടി ആശ്രയിച്ചിരിക്കുന്നു. പരീക്ഷയെ ഒരു പേടിസ്വപ്നമായി അവതരിപ്പിക്കാതെ, കുട്ടികളുടെ സംശയങ്ങൾ തീർക്കാനും അവരെ പ്രോത്സാഹിപ്പിക്കാനും അദ്ധ്യാപകർ ശ്രദ്ധിക്കണം. ക്ലാസ്സിൽ അമിതമായി പരിഭ്രമിക്കുന്ന കുട്ടികളെ കണ്ടെത്തി അവർക്ക് പ്രത്യേക കരുതൽ നൽകുക.

പരീക്ഷ എന്നത് പഠിച്ച കാര്യങ്ങൾ പരിശോധിക്കാൻ മാത്രമുള്ളതാണെന്നും അത് ഒരാളുടെ വ്യക്തിത്വത്തിന്റെ അളവുകോലല്ലെന്നും കുട്ടികളെ പഠിപ്പിക്കുക.

സമ്മർദ്ദത്തിലായ കുട്ടിക്ക് എങ്ങനെ പിന്തുണ നൽകാം?

സുരക്ഷിതത്വവും സമാധാനവുമാണ് നിരന്തര സമ്മർദ്ദം അനുഭവിക്കുന്ന മസ്തിഷ്ക്കത്തിന് ഏറ്റവും ആവശ്യം. കൃത്യസമയത്ത് ഉറങ്ങുകയും ഉണരുകയും ചെയ്യുന്നത് ഗുണകരമാണ്. മണിക്കൂറുകളോളം തുടർച്ചയായി പഠിക്കുന്നതിന് പകരം, ഇടയ്ക്ക് ചെറിയ ബ്രേക്കുകൾ എടുക്കുന്നത് ഏകാഗ്രത കൂട്ടാൻ സഹായിക്കും. ലളിതമായ ശ്വസന വ്യായാമങ്ങളും (Breathing exercises) നടത്തവും ശരീരത്തിലെ സ്ട്രെസ് ഹോർമോണുകളുടെ ഉൽപ്പാദനം കുറയ്ക്കും.

ധാരാളം വെള്ളം കുടിക്കുന്നതും പോഷകാഹാരം കഴിക്കുന്നതും  തലച്ചോറിന്റെ പ്രവർത്തനക്ഷമത വർദ്ധിപ്പിക്കും.

വിദ്യാർത്ഥികൾക്ക് വേണം സന്തുലിത കാഴ്ചപ്പാട്

പരീക്ഷകൾ ജീവിതത്തിലെ ഒരു ഘട്ടം മാത്രമാണ്. പരീക്ഷയിലെ മാർക്ക് വിദ്യാർത്ഥികളുടെ ബുദ്ധിശക്തിയെയോ സ്വഭാവത്തെയോ കഴിവുകളെയോ പൂർണ്ണമായി നിർണ്ണയിക്കുന്നില്ല. അത് ആ സമയത്തെ പ്രകടനം മാത്രം അടിസ്ഥാനമാക്കിയുള്ള ഫലമാണ്. പേടി പഠനശേഷിയെ കുറയ്ക്കും. ശാന്തമായ മനസ്സോടെയും ആത്മവിശ്വാസത്തോടെയും ഇരിക്കുമ്പോൾ പഠിച്ച കാര്യങ്ങൾ നന്നായി ഓർത്തെടുക്കാൻ സാധിക്കും. പേടിയോ വിഷമമോ തോന്നുന്നുണ്ടെങ്കിൽ അത് മാതാപിതാക്കളോടോ അദ്ധ്യാപകരോടോ തുറന്നു പറയുക.

Nellikka.life നൽകുന്ന സന്ദേശം

പരീക്ഷാപ്പേടി ഒരിക്കലും കുട്ടിയുടെ ബലഹീനതയോ പരാജയമോ അല്ല. നീണ്ടുനിൽക്കുന്ന മാനസിക സമ്മർദ്ദം കാരണം തലച്ചോറിന് വിശ്രമം ആവശ്യമാണ് എന്നതിന്റെ സൂചനയാണത്. പരീക്ഷാപ്പേടിയെ അച്ചടക്കമില്ലായ്മയായോ മടിയായോ കാണുന്നതിന് പകരം, അതൊരു ആരോഗ്യ പ്രശ്നമായി തിരിച്ചറിയാൻ മുതിർന്നവർക്ക് കഴിയണം. 

കുട്ടികളുടെ ശാരീരികവും മാനസികവുമായ ആരോഗ്യത്തെ തളർത്തുന്നതാകരുത് വിദ്യാഭ്യാസം . അത് അവരിൽ ആത്മവിശ്വാസവും അറിവിനോടുള്ള താല്പര്യവും വളർത്തുന്നതാകണം. തലച്ചോറും ശരീരവും തമ്മിലുള്ള ഈ ബന്ധം തിരിച്ചറിയുന്നത് കുട്ടികൾക്കായി ആരോഗ്യകരമായ പഠനാന്തരീക്ഷം ഒരുക്കുന്നതിലേക്കുള്ള ആദ്യ ചുവടുവെയ്പ്പാണ്.