കുഞ്ഞുങ്ങൾക്ക് എന്തെങ്കിലും അസുഖങ്ങൾ വരുമോ എന്ന ആശങ്ക എല്ലാ രക്ഷിതാക്കളും അനുഭവിക്കുന്ന കാര്യമാണ്. അസുഖ ലക്ഷണങ്ങൾ കാണുമ്പോൾത്തന്നെ എന്തു രോഗമാണ് എന്നതു സംബന്ധിച്ച് നിരവധി സംശയങ്ങളും അച്ഛനമ്മമാരുടെ മനസ്സിൽ തലപൊക്കും. ഈ സംശയങ്ങൾക്ക്, ശാസ്ത്രീയമായ, കൃത്യതയാർന്ന മറുപടി ആ നിമിഷം തന്നെ ലഭ്യമായാൽ, അത് കുഞ്ഞുങ്ങളോട് അടുത്തിടപഴകുന്നവർക്ക് വലിയ ആശ്വാസമാണ്. അങ്ങനെയൊരു സംവിധാനമാണ് ചിൽഡ്രൻസ് എംഡി (ChildrensMD) മൊബൈൽ ആപ്പ്. ചിൽഡ്രൻസ് ഹോസ്പിറ്റൽ കൊളറാഡോ വികസിപ്പിച്ചെടുത്ത ഈ ആപ്പ്, മാതാപിതാക്കൾക്കും കുഞ്ഞുങ്ങളെ പരിപാലിക്കുന്നവർക്കും ഏറെ പ്രയോജനപ്രദമാണ്. ഈ ആപ്പിലൂടെ  പല സംശയങ്ങൾക്കും വ്യക്തമായ ഉത്തരം ലഭിക്കും. കുട്ടികളുടെ രോഗലക്ഷണങ്ങൾ പരിശോധിക്കാനും മരുന്നുകളുടെ ശരിയായ അളവ് മനസ്സിലാക്കാനും ഡോക്ടറെ എപ്പോൾ ബന്ധപ്പെടണം എന്നത് സംബന്ധിച്ചുമെല്ലാം.

എന്താണ് ചിൽഡ്രൻസ് എംഡി ആപ്പ്?

ചിൽഡ്രൻസ് ഹോസ്പിറ്റൽ കൊളറാഡോയിലെ ശിശുരോഗ വിദഗ്ദ്ധർ സൃഷ്ടിച്ച സൗജന്യ മൊബൈൽ ആപ്പാണ് ചിൽഡ്രൻസ് എംഡി. കുഞ്ഞിന് അസുഖമോ, പരിക്കോ, അല്ലെങ്കിൽ ആശങ്കയുണ്ടാക്കുന്ന മറ്റെന്തെങ്കിലും ലക്ഷണങ്ങളോ ഉണ്ടാകുമ്പോൾ,  ശരിയായ തീരുമാനമെടുക്കാൻ മാതാപിതാക്കൾക്ക്  സഹായകമാകുന്ന തരത്തിലാണ് ഈ ആപ്പിൻ്റെ നിർമ്മാണം. ഉടൻ തന്നെ ആശുപത്രിയിൽ എത്താൻ  സാദ്ധ്യമല്ലാത്ത സാഹചര്യങ്ങളിൽ, ഇത് ഏറെ ഉപകാരപ്രദമാകുന്നു.

ഈ ആപ്പ് ഒരിക്കലും ഒരു ഡോക്ടർക്ക് പകരമാവില്ല. എങ്കിലും ഇത്, പ്രഥമ ശുശ്രൂഷ നൽകുന്ന ഡിജിറ്റൽ സഹായിയായി പ്രവർത്തിക്കും. കുഞ്ഞിന് അടിയന്തര ചികിത്സ വേണോ, വീട്ടിൽ ശുശ്രൂഷിച്ചാൽ മതിയോ, അതോ ഡോക്ടറെ നേരിൽ സന്ദർശിക്കണോ എന്നതിനെക്കുറിച്ചെല്ലാം ചിൽഡ്രൻസ് എംഡി ആപ്പ് വ്യക്തമായ നിർദ്ദേശങ്ങൾ നൽകും.

പ്രധാന സവിശേഷതകൾ

1.രോഗലക്ഷണങ്ങൾ പരിശോധിക്കാം 

1.ശിശുരോഗ ചികിത്സാ രംഗത്തെ ലോകപ്രശസ്ത വ്യക്തിത്വമായ  ഡോ. ബാർട്ടൺ ഷെമിറ്റ്  (Dr. Barton Schmitt) നൽകിയ മാർഗ്ഗനിർദ്ദേശങ്ങൾ അനുസരിച്ചാണ് ആപ്പിൻ്റെ  പ്രവർത്തനം.

2. കുട്ടികളിൽ സാധാരണയായി കാണുന്ന പനി, ചർമ്മത്തിലെ പാടുകൾ, ചുമ, വയറുവേദന തുടങ്ങി നൂറിലേറെ രോഗലക്ഷണങ്ങളെക്കുറിച്ച് ആപ്പിലൂടെ അറിയാനാകും.

3. ഡോക്ടറെ വിളിക്കണോ, പെട്ടെന്നുതന്നെ ആശുപത്രിയിൽ പോകണോ, അതോ വീട്ടിലെ പരിചരണം മതിയാകുമോ എന്ന് ഈ ആപ്പ് കൃത്യമായി പറഞ്ഞുതരും.

2.മരുന്നിന്റെ അളവ് അറിയാൻ

1.കുട്ടികൾക്ക് സാധാരണ നൽകുന്ന പാരസെറ്റമോൾ, ഇബുപ്രോഫെൻ തുടങ്ങിയ മരുന്നുകളുടെ അളവ് സംബന്ധിച്ച്, വേഗത്തിൽ  മനസ്സിലാക്കാൻ പറ്റുന്ന തരത്തിൽ പട്ടികയായി നൽകിയിരിക്കുന്നു.

2.കുഞ്ഞുങ്ങളുടെ പ്രായവും ശരീരഭാരവും പരിഗണിച്ച് നൽകേണ്ട അളവ് കൃത്യമായി നൽകിയിരിക്കുന്നതിനാൽ ഇതിനെക്കുറിച്ചുള്ള ആശങ്ക ഒഴിവാക്കാം.

3. പ്രഥമശുശ്രൂഷയും അടിയന്തര സഹായവും

1.പൊള്ളൽ, അസ്ഥി പൊട്ടൽ, മുറിവുകൾ, തലയ്ക്കേൽക്കുന്ന ക്ഷതങ്ങൾ, ശ്വാസംമുട്ടൽ, അലർജി, തുടങ്ങിയ അടിയന്തര ഘട്ടങ്ങളിൽ കൈക്കൊള്ളേണ്ട നടപടികളെക്കുറിച്ചുള്ള നിർദ്ദേശങ്ങൾ ഇതിൽ അടങ്ങിയിരിക്കുന്നു.

2.ഇൻ്റർനെറ്റ് സൌകര്യം ലഭ്യമല്ലാത്ത സമയങ്ങളിലും അടിസ്ഥാന പ്രഥമശുശ്രൂഷാ വിവരങ്ങൾ ഈ ആപ്പിൽ കണ്ടെത്താനാകും.

4. അടുത്തുള്ള ആശുപത്രികളെക്കുറിച്ചറിയാൻ

1.ഗൂഗിൾ മാപ്പ് ഉപയോഗിച്ച്, ഏറ്റവും അടുത്തുള്ള എമർജൻസി റൂമുകൾ, ആശുപത്രികൾ, ഫാർമസികൾ എന്നിവയെക്കുറിച്ച് എളുപ്പത്തിൽ മനസ്സിലാക്കാൻ സഹായിക്കുന്നു.

5. പാരെൻ്റിംഗിനും ആരോഗ്യസംരക്ഷണത്തിനും 

1.സീസണുകൾ മാറുന്നതിനനുസരിച്ച് കുഞ്ഞുങ്ങൾക്ക് വരുന്ന രോഗങ്ങൾ, എടുക്കേണ്ട വാക്സിനേഷനുകൾ, കുട്ടികളുടെ ഓരോ പ്രായത്തിലുമുള്ള വളർച്ചയുടെ നാഴികക്കല്ലുകൾ എന്നിവയെക്കുറിച്ചുള്ള ലേഖനങ്ങളും മറ്റ് മാർഗ്ഗനിർദ്ദേശങ്ങളും ആപ്പിൽ ലഭ്യമാണ്.

മാതാപിതാക്കൾക്ക് പ്രിയങ്കരമാകാൻ കാരണം

• വിശ്വസനീയം: വിദഗ്ധരായ ശിശുരോഗ ചികിൽസകർ  തയ്യാറാക്കിയത്.

• ഉപയോഗിക്കാൻ എളുപ്പം: സങ്കീർണ്ണമായ മെഡിക്കൽ പദങ്ങൾക്കു പകരം, ലളിതമായ  ഭാഷ.

• വേഗതയും ലഭ്യതയും: അടിയന്തര സാഹചര്യങ്ങളിലും  അസമയങ്ങളിലും ഏറെ പ്രയോജനകരം.

• വ്യക്തിഗത പ്രൊഫൈൽ: ഒന്നിലധികം കുട്ടികളുണ്ടെങ്കിൽ, ഓരോരുത്തരുടെയും വിവരങ്ങൾ പ്രത്യേകം സൂക്ഷിക്കാൻ കഴിയൂം.

വിശ്വാസയോഗ്യമാണോ?

തീർച്ചയായും. അമേരിക്കയിലെ ആശുപത്രികളിൽ ഉപയോഗിക്കുന്ന അതേ മാർഗ്ഗനിർദ്ദേശങ്ങൾ അനുസരിച്ചാണ് ഈ ആപ്പിലെ രോഗലക്ഷണങ്ങൾ പരിശോധിക്കാനുള്ള ഭാഗം തയ്യാറാക്കിയിരിക്കുന്നത്, പീഡിയാട്രിക് ടെലിഹെൽത്ത് രംഗത്തെ പ്രശസ്തനായ ഡോ. ബാർട്ടൺ ഷെമിറ്റാണ് ഇതിന് മേൽനോട്ടം വഹിച്ചിരിക്കുന്നത്.

ഇത് അനാവശ്യമായ ആശുപത്രി സന്ദർശനങ്ങൾ ഒഴിവാക്കാൻ സഹായിക്കും. മാത്രമല്ല, രോഗം തുടക്കത്തിൽ തന്നെ തിരിച്ചറിഞ്ഞ് വേണ്ട ചികിത്സ നൽകാനും കൃത്യസമയത്ത് ശരിയായ തീരുമാനങ്ങളെടുക്കാൻ ആവശ്യമായ അറിവ് നൽകി മാതാപിതാക്കളെ ശാക്തീകരിക്കാനും സഹായിക്കുന്നു.

എവിടെ നിന്ന് ഡൗൺലോഡ് ചെയ്യാം?

• Download for Android (Google Play)
• Download for iOS (Apple App Store)
• Visit the official page at: Children’s Hospital Colorado – Mobile App

ആർക്കെല്ലാം പ്രയോജനപ്രദം

നവജാത ശിശുക്കൾ മുതൽ കൗമാരപ്രായക്കാർ വരെയുള്ള കുഞ്ഞുങ്ങളുടെ രക്ഷിതാക്കൾക്ക്.

കുഞ്ഞുങ്ങളുടെ മറ്റ് സംരക്ഷകർക്ക്.

സ്കൂൾ നഴ്സുമാർക്കും കുട്ടികളെ പരിപാലിക്കുന്നവർക്കും, അധ്യാപകർക്കും.

ഡിജിറ്റൽ ടൂളുകൾ നിർദ്ദേശിക്കുന്ന ശിശുരോഗ വിദഗ്ദ്ധർക്ക്.

കുട്ടികളുടെ ആരോഗ്യവിഷയങ്ങളിൽ, രക്ഷിതാക്കളുടെ സംശയങ്ങൾ ഫലപ്രദമായി പരിഹരിക്കാൻ ചിൽഡ്രൻസ് എംഡി ആപ്പ് ഏറെ സഹായകമാണ്. രോഗലക്ഷണങ്ങളെക്കുറിച്ച് പെട്ടെന്നുതന്നെ അറിയാനുള്ള സംവിധാനവും പ്രായോഗിക പ്രഥമശുശ്രൂഷാ വിവരങ്ങളും ആഗ്രഹിക്കുന്ന രക്ഷിതാക്കൾ ഉറപ്പായും ഡൗൺലോഡ് ചെയ്യേണ്ട ഒന്നാണിത്.

രോഗലക്ഷണങ്ങൾ ഗൂഗിളിൽ തിരഞ്ഞ് ഉത്ക്കണ്ഠാകുലരാകുന്നവർ വർദ്ധിച്ചുവരുന്ന ഈ ഡിജിറ്റൽ കാലത്ത്, ശാസ്ത്രീയമായ കൃത്യതയിലേക്കുള്ള ചൂണ്ടുപലകയാണ് ചിൽഡ്രൻസ് എംഡി മൊബൈൽ ആപ്പ്.