തളർന്നുപോയ മനസ്സുകൾക്ക് ഒരു ക്രിസ്മസ് കത്ത്

ക്രിസ്മസ് പാട്ടുകൾ പാടിയും നക്ഷത്രത്തിളക്കം പകർത്തിയും പ്രപഞ്ചം മുഴുവൻ ആഘോഷത്തിലാറാടണം എന്നാണ് നമ്മൾ എല്ലാവരും ആഗ്രഹിക്കുക. പക്ഷെ എല്ലാവർക്കും, അതങ്ങനെത്തന്നെ ആകണമെന്നില്ല.

ചിലർ വലിയ നിശബ്ദത മനസ്സിൽ പേറുന്നുണ്ടാകും

പിന്നിട്ട കാലം നൽകിയ അനുഭവങ്ങൾ ചിലരെ തെല്ലു തളർത്തിയിട്ടുണ്ടാകും

ഒരിക്കലും തീരാത്ത ഉത്തരവാദിത്തങ്ങളുടെ ഭാരം ചുമക്കുന്നു മറ്റു ചിലർ

കരുണ കാട്ടാതെ ഓടിപ്പോയ കാലത്തിന്റെ കയ്പ്പേറിയ ഓർമ്മകളുമായി വേറെയും ചിലർ.

ഇക്കൂട്ടത്തിൽ ഒരാളാണല്ലോ ഞാനും എന്നു തോന്നിയോ? എങ്കിൽ ഈ കത്ത് നിങ്ങൾക്കും കൂടിയുള്ളതാണ്. നിങ്ങളിലെ തളർന്നുപോയ മനസ്സിനുള്ളതാണ്.

എത്രയും പ്രിയമുള്ള മനസ്സേ,

ഈ വർഷം മുഴുവൻ നീ എത്രത്തോളം പൊരുതിയാണ് മുന്നേറിയതെന്ന് ഞാൻ മനസ്സിലാക്കുന്നു. ശരീരം വിശ്രമം ആവശ്യപ്പെട്ടപ്പോഴും തളരാതെ നീ ജോലി തുടർന്ന ദിവസങ്ങൾ. മറ്റുള്ളവരുടെ കാര്യം ആലോചിച്ച് ഉറക്കമൊഴിഞ്ഞ എത്രയോ രാത്രികൾ. അവർ വിഷമിക്കാതിരിക്കാൻ സന്തോഷത്തിൽ പൊതിഞ്ഞ്, നീ മുഖത്ത് വരുത്തിയ പുഞ്ചിരികൾ… ഇതെല്ലാം എനിക്കറിയാം.

ക്രിസ്മസ് എന്നാൽ സദാ സന്തോഷിക്കേണ്ട ഒന്നാണെന്നാണ് നമ്മൾ വിചാരിക്കാറുള്ളത്. എന്നാൽ ജീവിതം എപ്പോഴും അങ്ങനെയല്ല. ചിലപ്പോൾ ആഘോഷങ്ങളേക്കാൾ കൂടുതൽ, മനസ്സ് ആഗ്രഹിക്കുന്നത് ഇത്തിരി ശാന്തതയും കരുതലുമാണ്.

ഈ ആഘോഷകാലം നിനക്ക് വലിയൊരു ഭാരമായി തോന്നുന്നുണ്ടെങ്കിൽ ദയവായി തിരിച്ചറിയുക: തളർന്നുപോയതല്ല, നീയുമൊരു സാധാരണ മനുഷ്യനാണ്.

ജീവിതത്തിന്റെ എല്ലാ കോണുകളും ഇപ്പോൾ തന്നെ അലങ്കരിച്ച് ഒരുക്കണമെന്ന് ഒരു നിർബന്ധവുമില്ല. എല്ലാ കൂട്ടായ്മകളിലും നീ പങ്കെടുക്കണമെന്നില്ല. നിന്റെ നിശബ്ദതയ്ക്ക് ആരോടും വിശദീകരണം നൽകേണ്ടതുമില്ല. വിശ്രമിക്കുക എന്നത് പരാജയമല്ല, ഓടി രക്ഷപ്പെടലല്ല അത്.  ഒരടി പിന്നോട്ട് മാറുന്നത് ബലഹീനതയുമല്ല.

ക്രിസ്മസും തുടങ്ങിയത് വളരെ നിശബ്ദമായിത്തന്നെയാണ്. ഒരു നിശ്ചലതയിൽ. വളരെ ലളിതമായി. ലോകം ശ്രദ്ധിക്കാതെ പോകുമായിരുന്ന അത്രയും ശാന്തമായ ഒരു നിമിഷത്തിൽ.

അതുകൊണ്ട്, ഈ ക്രിസ്മസ് കാലം സമ്മർദ്ദം നിറയ്ക്കരുത്, 

ഇത്തവണ ചിലഅനുവാദങ്ങൾ നൽകാം.

ഒന്നിത്തിരി നിൽക്കാൻ, സ്വയം മാപ്പുനൽകാൻ, ആർക്കു മുന്നിലും ഒന്നും തെളിയിക്കാനില്ലാതെ, സ്വതന്ത്രമായി ഒന്ന് ശ്വാസമെടുക്കാനുള്ള അനുവാദം.

കുട്ടികൾ, മാതാപിതാക്കൾ, രോഗികൾ, അപരിചിതർ എന്നിങ്ങനെ മറ്റുള്ളവർക്ക് കരുതലേകി നിങ്ങൾ ചേർത്തുനിർത്തുന്നുണ്ടെങ്കിൽ, ഈ ഓർമ്മപ്പെടുത്തൽ നിങ്ങൾക്കുവേണ്ടിയുള്ളതാണ്: നിങ്ങളും അമൂല്യമാണ്. തിളങ്ങുന്ന വർണ്ണക്കടലാസിൽ പൊതിഞ്ഞ് ഒരു സമ്മാനപ്പൊതിയാക്കി ആരും നിങ്ങളെ നെഞ്ചോടു ചേർക്കുന്നില്ലെങ്കിലും കുഞ്ഞു റിബൺ പൂവാക്കി ആ പൊതിയിൽ കെട്ടിയില്ലെങ്കിലും നിങ്ങളുടെ മൂല്യം ഒട്ടും കുറയുന്നില്ല.

ഈ ക്രിസ്മസ് നിങ്ങളെ ആർദ്രമായി തലോടട്ടെ. എല്ലാ ദിനങ്ങളെയും പോലെ നിങ്ങളെക്കൊണ്ട് കാര്യങ്ങൾ ചെയ്യിക്കുന്നതിന് പകരം, അത് നിങ്ങൾക്കരികിൽ അത്രയും പ്രിയപ്പെട്ടൊരാളായി ചേർന്നുനിൽക്കട്ടെ. ചുറ്റുമുള്ളവർക്കു വേണ്ടി ഓടിയോടി തളർന്ന മനസ്സുകൾക്കും സ്നേഹവും ഊഷ്മളതയും പ്രതീക്ഷയും ആസ്വദിക്കാൻ അർഹതയുണ്ടെന്ന് അത് നിങ്ങളെ ഓർമ്മിപ്പിക്കട്ടെ.

വീടു മോടികൂട്ടാനായില്ലെങ്കിലും

വലിയ ക്രിസ്മസ് കൂടൊരുക്കാനായില്ലെങ്കിലും

പല നിറങ്ങളിൽ നക്ഷത്രങ്ങൾ ആടിത്തിളങ്ങിയില്ലെങ്കിലും

ഉള്ളതുമതി, നിങ്ങളിതുവരെ സ്വയം മറന്ന് മറ്റുള്ളവർക്കായി ചെയ്തതൊക്കെയും ഓർത്തുനോക്കൂ…ജീവിതം മുഴുവൻ തെളിച്ചം കെടാതെ ജ്വലിച്ചുനിൽക്കുന്ന ഒരായിരം നക്ഷത്രങ്ങളായി അവയെല്ലാം നിങ്ങളിൽത്തന്നെയുണ്ട്. ആ പ്രകാശം നിങ്ങൾക്കു ചുറ്റിലുമുണ്ട്.

ഈ ക്രിസ്മസ്, പതിവു ദിനങ്ങൾ പോലെ കഴിച്ചുകൂട്ടാനേ നിങ്ങൾക്കാകുന്നുള്ളൂ എങ്കിലും, അത് മതി.

മനസ്സിലിപ്പോഴും കെടാതെ മിന്നുന്ന കുഞ്ഞുനക്ഷത്രമുണ്ട്. അത് തിരിച്ചറിഞ്ഞാൽ മാത്രം മതി.