ടോയ്ലറ്റ് സീറ്റ് ഡെർമറ്റൈറ്റിസ്: അവഗണിക്കരുതാത്ത ചർമ്മരോഗം
ദീർഘദൂരയാത്രകൾക്കിടയിൽ, വിദ്യാഭ്യാസ സ്ഥാപനങ്ങളിൽ, ആശുപത്രികളിൽ, ഷോപ്പിംഗ് മോളുകളിൽ – അങ്ങനെ നിരവധിയാളുകൾ ഒത്തുചേരുന്ന ഇടങ്ങളിലെല്ലാം നമുക്ക് പൊതു ശൗചാലയങ്ങൾ ഉപയോഗിക്കേണ്ടി വരാറുണ്ട്. എവിടെയായാലും വൃത്തിയുണ്ടായാൽ മതി എന്നതാകും മിക്കവരും ചിന്തിക്കുക. എന്നാൽ പൊതു ശൗചാലയങ്ങൾ ഉപയോഗിക്കുന്നവരിൽ ചിലർക്കെങ്കിലും അസ്വസ്ഥതയുണ്ടാക്കുന്ന ഒരു ചർമ്മരോഗം പിടിപെടാറുണ്ട്. അതാണ് ടോയ്ലറ്റ് സീറ്റ് ഡെർമറ്റൈറ്റിസ് (Toilet Seat Dermatitis).
ലോകമെമ്പാടുമുള്ള മുതിർന്നവരിലും കുട്ടികളിലും ഒരുപോലെ കണ്ടുവരുന്ന ഒരവസ്ഥയാണിതെന്ന് വൈദ്യശാസ്ത്രം സാക്ഷ്യപ്പെടുത്തുന്നു.
എന്താണ് ടോയ്ലറ്റ് സീറ്റ് ഡെർമറ്റൈറ്റിസ്?
ടോയ്ലറ്റ് സീറ്റുകളിലുള്ള, അസ്വസ്ഥതയ്ക്ക് കാരണമാകുന്ന വസ്തുക്കളുമായോ രാസവസ്തുക്കളുമായോ ചർമ്മം നേരിട്ട് സമ്പർക്കത്തിൽ വരുമ്പോൾ ഉണ്ടാകുന്ന ഒരു തരം അലർജിയാണിത് (Contact Dermatitis). പ്രധാനമായും താഴെ പറയുന്ന ഭാഗങ്ങളിലാണ് ഇത് ബാധിക്കുന്നത്:
- നിതംബം
- പിൻ തുടകൾ
- കാലുകളുടെ പിൻഭാഗം
ഈ രോഗാവസ്ഥയെക്കുറിച്ച് ആദ്യമായി വൈദ്യശാസ്ത്രം രേഖപ്പെടുത്തിയത് ഇരുപതാം നൂറ്റാണ്ടിലാണ്. ടോയ്ലറ്റ് സീറ്റുകളിലെ ശക്തിയേറിയ രാസവസ്തുക്കളോ അല്ലെങ്കിൽ സീറ്റിന്റെ നിർമ്മാണ രീതിയിലെ പാളിച്ച മൂലമുണ്ടാകുന്ന ഉരസലോ ആണ് ഇതിന് കാരണമായി ചൂണ്ടിക്കാണിക്കപ്പെടുന്നത്.
ടോയ്ലറ്റ് സീറ്റ് ഡെർമറ്റൈറ്റിസിന് കാരണമാകുന്ന ഘടകങ്ങൾ
വൈദ്യശാസ്ത്ര പഠനങ്ങൾ വ്യക്തമാക്കുന്നതനുസരിച്ച് ഈ ചർമ്മരോഗം ഉണ്ടാകുന്നത് പ്രധാനമായും രണ്ട് രീതിയിലാണ്:
1. അലർജി മൂലമുണ്ടാകുന്ന പ്രശ്നങ്ങൾ
നമ്മുടെ പ്രതിരോധ സംവിധാനം ടോയ്ലറ്റ് സീറ്റിലെ ചില അലർജിയുണ്ടാക്കുന്ന വസ്തുക്കളോട് (Allergens) പ്രതികരിക്കുമ്പോഴാണ് ഇത് സംഭവിക്കുന്നത്. പ്രധാന വില്ലന്മാർ ഇവയാണ്:
- അണുനാശിനികൾ: ഫിനോൾ (Phenols), ഫോർമാൽഡിഹൈഡ് (Formaldehyde) തുടങ്ങിയവ.
- വീര്യം കൂടിയ ക്ലീനിംഗ് ഏജന്റുകൾ: ടോയ്ലറ്റ് കഴുകാൻ ഉപയോഗിക്കുന്ന ശക്തിയേറിയ രാസവസ്തുക്കൾ.
- സീറ്റ് നിർമ്മാണ വസ്തുക്കൾ: ടോയ്ലറ്റ് സീറ്റുകളിൽ ഉപയോഗിക്കുന്ന പ്ലാസ്റ്റിക് റെസിനുകൾ (Resins), വാർണിഷുകൾ തുടങ്ങിയവ.
- സുഗന്ധദ്രവ്യങ്ങൾ: ക്ലീനിംഗ് ഉൽപ്പന്നങ്ങളിൽ ചേർക്കുന്ന കൃത്രിമ ഗന്ധങ്ങളും പ്രിസർവേറ്റീവുകളും.
ഇത്തരം വസ്തുക്കളുമായി ചർമ്മം നിരന്തരം സമ്പർക്കത്തിൽ വരുമ്പോൾ അലർജിയും നീർക്കെട്ടും ഉണ്ടാകുന്നു.
2. ചർമ്മത്തിലെ അസ്വസ്ഥതകൾ മൂലം
ഇതാണ് ഏറ്റവും സാധാരണയായി കണ്ടുവരുന്നത്. രാസവസ്തുക്കൾക്ക് പുറമെ താഴെ പറയുന്ന കാരണങ്ങൾ കൊണ്ടും ഇത് സംഭവിക്കാം:
- കടുപ്പമേറിയതോ തണുത്തതോ ആയ പ്രതലങ്ങളിൽ ദീർഘനേരം ഇരിക്കുന്നത്.
- സീറ്റും ചർമ്മവും തമ്മിൽ ഉരസുന്നത്.
- ടോയ്ലറ്റ് സീറ്റിലുണ്ടാകുന്ന നനവോ വിയർപ്പോ ചർമ്മത്തിന് അസ്വസ്ഥത സൃഷ്ടിക്കാം
- ടോയ്ലറ്റിലെ ഈർപ്പവും വായുസഞ്ചാരക്കുറവും അണുക്കൾ വളരാനും അലർജി കൂടാനും കാരണമാകും.
കുട്ടികൾക്കും സെൻസിറ്റീവ് ചർമ്മമുള്ളവർക്കും എക്സിമ (Eczema) പോലുള്ള രോഗങ്ങളുള്ളവക്കും ഈ അലർജി വരാൻ സാധ്യത കൂടുതലാണ്.
ശ്രദ്ധിക്കേണ്ട ലക്ഷണങ്ങൾ
ടോയ്ലറ്റ് സീറ്റുമായി സമ്പർക്കമുണ്ടായി ഏതാനും മണിക്കൂറുകൾക്കുള്ളിലോ അല്ലെങ്കിൽ ഒന്നോ രണ്ടോ ദിവസത്തിനുള്ളിലോ ലക്ഷണങ്ങൾ പ്രത്യക്ഷപ്പെടാം:
- ചർമ്മം ചുവന്ന് തടിക്കുകയും അസഹനീയമായ ചൊറിച്ചിൽ അനുഭവപ്പെടുകയും ചെയ്യുക.
- ആ ഭാഗത്ത് വേദനയോ നീറ്റലോ അനുഭവപ്പെടുക.
- ചർമ്മം ഉണങ്ങി പൊളിഞ്ഞിളകുകയോ കട്ടി കൂടുകയോ ചെയ്യുക.
- തൊടുമ്പോൾ വേദനയോ ചെറിയ രീതിയിലുള്ള വീക്കമോ തോന്നുക.
- ചില സന്ദർഭങ്ങളിൽ കുമിളകൾ വരാനും ചർമ്മം പൊട്ടാനും സാധ്യതയുണ്ട്.
ലക്ഷണങ്ങൾ മാറാതെ തുടരുകയും അസ്വസ്ഥത കൂടുകയും ചെയ്താൽ, ഉടൻ തന്നെ ഒരു ഡോക്ടറെ സമീപിക്കണം.
ഇത് പടരുന്ന രോഗമാണോ? അപകടകാരിയാണോ?
ടോയ്ലറ്റ് സീറ്റ് ഡെർമറ്റൈറ്റിസ് ഒരു പകർച്ചവ്യാധിയല്ല. ഇത് ഒരാളിൽ നിന്ന് മറ്റൊരാളിലേക്ക് പകരില്ല. എങ്കിലും, കൃത്യസമയത്ത് ചികിത്സിച്ചില്ലെങ്കിൽ ചില ബുദ്ധിമുട്ടുകൾ ഉണ്ടായേക്കാം:
- അമിതമായ ചൊറിച്ചിൽ കാരണം ചർമ്മം പൊട്ടാൻ സാധ്യതയുണ്ട്.
- പൊട്ടിയ ചർമ്മത്തിലൂടെ ബാക്ടീരിയകളോ മറ്റ് അണുക്കളോ ഉള്ളിൽ കടന്ന് അണുബാധയുണ്ടാകാം (Secondary Infection).
- ചർമ്മത്തിന്റെ നിറം മാറാനും (Pigmentation) ഈ അവസ്ഥ നീണ്ടുനിൽക്കാനും കാരണമായേക്കാം.
പ്രതിരോധത്തെക്കുറിച്ച് ശാസ്ത്രം പറയുന്നത്
അലർജിക്ക് കാരണമാകുന്ന വസ്തുക്കളുമായി ചർമ്മം നേരിട്ട് സമ്പർക്കത്തിൽ വരുന്നത് ഒഴിവാക്കുക എന്നതാണ് ഏറ്റവും നല്ല പ്രതിരോധ മാർഗ്ഗമെന്ന് ചർമ്മരോഗങ്ങളെക്കുറിച്ചും ശുചിത്വത്തെക്കുറിച്ചുമുള്ള ശാസ്ത്രീയ പഠനങ്ങൾ വ്യക്തമാക്കുന്നു.
പ്രായോഗികമായി ചെയ്യാവുന്ന കാര്യങ്ങൾ:
- ഡിസ്പോസിബിൾ പേപ്പർ സീറ്റ് കവറുകൾ ഉപയോഗിക്കാം
- ടോയ്ലറ്റ് ഉപയോഗിക്കുന്നതിന് മുൻപായി അല്പം വെള്ളം ഉപയോഗിച്ച് സീറ്റ് തുടയ്ക്കുന്നത് രാസവസ്തുക്കളുടെ അംശം കുറയ്ക്കാൻ സഹായിക്കും.
- പൊതുശൗചാലയങ്ങളിൽ ദീർഘനേരം ഇരിക്കുന്നത് ഒഴിവാക്കുക.
- വായുസഞ്ചാരമുള്ളതും അമിതമായി ഇറുക്കമില്ലാത്തതുമായ കോട്ടൺ വസ്ത്രങ്ങൾ ധരിക്കുന്നത് ചർമ്മത്തിലെ അസ്വസ്ഥതകൾ കുറയ്ക്കും.
- ചർമ്മം വല്ലാതെ വരണ്ടുപോകാതിരിക്കാൻ സുഗന്ധദ്രവ്യങ്ങൾ ഇല്ലാത്ത മോയ്സ്ചറൈസറുകൾ ഉപയോഗിക്കുന്നത് നല്ലതാണ്.
- ടോയ്ലറ്റ് ഉപയോഗത്തിന് ശേഷം അലർജി ബാധിക്കാനിടയുള്ള ഭാഗങ്ങൾ മൃദുവായി കഴുകി വൃത്തിയാക്കുക.
- കുട്ടികൾക്ക് ശരിയായ ശുചിത്വ ശീലങ്ങൾ പഠിപ്പിച്ചു കൊടുക്കുന്നതും അവർ ഉപയോഗിക്കുന്ന സീറ്റുകൾ പ്രത്യേകം ശ്രദ്ധിക്കുന്നതും അപകടസാധ്യത കുറയ്ക്കും.
ചികിത്സ എങ്ങനെ ?
ചർമ്മരോഗ വിദഗ്ദ്ധർ സാധാരണയായി താഴെ പറയുന്ന ചികിത്സാ രീതികളാണ് നിർദ്ദേശിക്കാറുള്ളത്:
- അലർജിക്ക് കാരണമായ വസ്തു (ക്ലീനിംഗ് ലോഷനോ സീറ്റിലെ മെറ്റീരിയലോ) ഏതാണെന്ന് കണ്ടെത്തി അത് ഒഴിവാക്കുക.
- വീക്കവും ചൊറിച്ചിലും കുറയ്ക്കാൻ ഡോക്ടറുടെ നിർദ്ദേശപ്രകാരം മാത്രം ‘ടോപ്പിക്കൽ കോർട്ടികോസ്റ്റിറോയ്ഡ്’ (Corticosteroids) ക്രീമുകൾ ഉപയോഗിക്കാം.
- ചർമ്മത്തിന്റെ സ്വാഭാവികത വീണ്ടെടുക്കാൻ സഹായിക്കുന്ന മോയ്സ്ചറൈസറുകൾ ഉപയോഗിക്കുക.
- അലർജി കുറയ്ക്കാനുള്ള ആന്റിഹിസ്റ്റമിൻ (Antihistamines) മരുന്നുകൾ ഡോക്ടർമാർ നിർദ്ദേശിച്ചേക്കാം.
മുന്നറിയിപ്പ്: ഡോക്ടറുടെ നിർദ്ദേശമില്ലാതെ വീര്യം കൂടിയ സ്റ്റിറോയ്ഡ് ക്രീമുകൾ വാങ്ങി ഉപയോഗിക്കുന്നത് ഗുണത്തേക്കാളേറെ ദോഷം ചെയ്യും.
എപ്പോഴാണ് ഡോക്ടറെ കാണേണ്ടത്?
താഴെ പറയുന്ന സാഹചര്യങ്ങളിൽ ഒരു ചർമ്മരോഗ വിദഗ്ദ്ധന്റെ (Dermatologist) സഹായം തേടാൻ മടിക്കരുത്:
- ലക്ഷണങ്ങൾ ഒരാഴ്ചയിൽ കൂടുതൽ നീണ്ടുനിൽക്കുകയാണെങ്കിൽ.
- കടുത്ത വേദന, പഴുപ്പ് അല്ലെങ്കിൽ അണുബാധയുടെ ലക്ഷണങ്ങൾ എന്നിവ കണ്ടാൽ.
- ഇടയ്ക്കിടെ അലർജി വരികയാണെങ്കിൽ.
- കുട്ടികളിൽ അലർജി ഉണ്ടാകുകയാണെങ്കിൽ, അവർക്ക് നേരത്തെ തന്നെ മറ്റ് ചർമ്മരോഗങ്ങൾ ഉണ്ടെങ്കിൽ.
കൃത്യസമയത്തുള്ള ഇടപെടൽ സങ്കീർണ്ണതകൾ ഒഴിവാക്കാനും വേഗത്തിൽ സുഖം പ്രാപിക്കാനും സഹായിക്കും.
അവബോധം പ്രധാനം
ടോയ്ലറ്റ് സീറ്റ് ഡെർമറ്റൈറ്റിസ്, ശാസ്ത്രീയമായി തെളിയിക്കപ്പെട്ട ഒരു ചർമ്മരോഗമാണ്. ഈ അസുഖത്തെക്കുറിച്ചുള്ള കൃത്യമായ അറിവും ലളിതമായ ചില മുൻകരുതലുകളും, ചർമ്മത്തിലുണ്ടാകുന്ന അനാവശ്യ ബുദ്ധിമുട്ടുകളെ എളുപ്പത്തിൽ ഒഴിവാക്കാൻ സഹായിക്കും.
References
