എന്തുകൊണ്ടാണ് വേനൽക്കാലത്ത് നമുക്ക് കൂടുതൽ ക്ഷീണം അനുഭവപ്പെടുന്നത്?

വേനൽക്കാലം എന്ന് കേൾക്കുമ്പോൾ തന്നെ മധുരമൂറുന്ന മാമ്പഴസീസണും അവധിക്കാലവും യാത്രകളുമൊക്കെയാണ് നമ്മുടെ മനസ്സിലേക്ക് ഓടിയെത്തുക. തൊട്ടടുന്ന നിമിഷം തന്നെ ഉഷ്ണവും പൊള്ളുന്ന ചൂടും കടുത്ത ക്ഷീണവും തളർച്ചയും ഓർമ്മ വരും. മാത്രമല്ല, വേനൽക്കാലത്ത് എപ്പോഴും ഉറക്കം വരുന്നത് പോലെ തോന്നാം, ഊർജ്ജമില്ലായ്മ അനുഭവപ്പെടാം, ശരീരത്തിന് വല്ലാത്ത അസ്വസ്ഥതയും ഈ സമയത്ത് സാധാരണമാണ്.

ഉയർന്ന അന്തരീക്ഷോഷ്മാവിനോട്  നമ്മുടെ ശരീരത്തിലെ ആന്തരിക വ്യവസ്ഥകൾ പ്രതികരിക്കുന്നത് കൊണ്ടാണ് ഇങ്ങനെ സംഭവിക്കുന്നത്. വേനൽക്കാലത്തെ തളർച്ചക്ക് കാരണം വെയിലും വിയർപ്പും മാത്രമല്ല. അമിതമായചൂട്, നിർജ്ജലീകരണം, കഠിനമായ സൂര്യപ്രകാശം എന്നിവയോട് നമ്മുടെ ശരീരം പൊരുത്തപ്പെടുന്നു എന്നതിന്റെ പ്രതിഫലനമാണ് ഈ മാറ്റങ്ങൾ.

വേനൽക്കാലത്തെ ഈ മാറ്റങ്ങളെക്കുറിച്ച് ശാസ്ത്രീയമായി മനസ്സിലാക്കുന്നത്, നമ്മുടെ ഊർജ്ജം ശരിയായ രീതിയിൽ ക്രമീകരിക്കാനും വേനൽക്കാലം ആരോഗ്യകരമായി ആസ്വദിക്കാനും നമ്മെ സഹായിക്കും.

എന്താണ് വേനൽക്കാല തളർച്ച?

ഉയർന്ന താപനിലയിൽ ദീർഘനേരം ചെലവഴിക്കുന്നത് മൂലം ഉണ്ടാകുന്ന ശാരീരികവും മാനസികവുമായ ക്ഷീണത്തെയാണ് ‘ഹീറ്റ് ഫറ്റീഗ്’ എന്ന് വിശേഷിപ്പിക്കുന്നത്.

ഇതിന്റെ പ്രധാന ലക്ഷണങ്ങൾ:

• അമിതമായ ക്ഷീണം

• ഏകാഗ്രത കുറയുക

• ശരീരത്തിന് ഭാരം അനുഭവപ്പെടുക

• അമിതമായ ഉറക്കം

• ജോലികളിലും വിനോദങ്ങളിലും താൽപ്പര്യക്കുറവ് 

ക്ഷീണം പൊതുവെ സാധാരണമാണെങ്കിലും, വേനൽക്കാലത്ത് തുടർച്ചയായി അനുഭവപ്പെടുന്ന തളർച്ചയ്ക്ക് ജീവശാസ്ത്രപരമായ ചില കാരണങ്ങളുണ്ട്. നമ്മുടെ ശരീരത്തിന്റെ താപനില ക്രമീകരിക്കുന്ന രീതി (Temperature regulation), ദ്രാവകങ്ങളുടെ സന്തുലിതാവസ്ഥ (Fluid balance), ഉപാപചയ ഊർജ്ജം (Metabolic energy) എന്നിവയുമായി ഇത് നേരിട്ട് ബന്ധപ്പെട്ടിരിക്കുന്നു.

വേനൽക്കാല തളർച്ചയുടെ അടിസ്ഥാന ശാസ്ത്രം

പുറത്ത് എത്ര ചൂടാണെങ്കിലും ശരീരത്തിന്റെ ആന്തരിക താപനില ഏകദേശം 37°C എന്ന നിലയിൽ സ്ഥിരമായി നിലനിർത്താൻ ശരീരം തുടർച്ചയായി പരിശ്രമിക്കുന്നു. അന്തരീക്ഷത്തിൽ ചൂട് കൂടുമ്പോൾ, ശരീരം സ്വയം തണുപ്പിക്കാനായി താഴെ പറയുന്ന മാർഗ്ഗങ്ങൾ ഉപയോഗിക്കുന്നു:

• വിയർപ്പ് (Sweating): ചർമ്മത്തിലൂടെ വിയർപ്പ് പുറത്തുവിട്ട് അത് ബാഷ്പീകരിക്കപ്പെടുന്നത് വഴി ശരീരം തണുക്കുന്നു.

• ചർമ്മത്തിലേക്കുള്ള രക്തയോട്ടം വർദ്ധിപ്പിക്കുന്നു: രക്തത്തെ ചർമ്മത്തിന്റെ ഉപരിതലത്തിലേക്ക് എത്തിക്കുന്നതിലൂടെ ശരീരത്തിനുള്ളിലെ ചൂടിനെ പുറന്തള്ളാൻ സഹായിക്കുന്നു.

• വേഗത്തിലുള്ള ശ്വാസോച്ഛ്വാസം: ശ്വാസം പുറത്തേക്ക് വിടുന്നതിലൂടെയും ചെറിയ അളവിൽ ചൂട് പുറന്തള്ളപ്പെടുന്നു.

ഈ പ്രതികരണങ്ങൾക്കെല്ലാം ശരീരത്തിന് വലിയ അളവിൽ അധിക ഊർജ്ജം ആവശ്യമാണ്. അതായത്, നിങ്ങൾ വിശ്രമിക്കുമ്പോൾ പോലും ചൂടിനെ പ്രതിരോധിക്കാൻ ശരീരം കൂടുതൽ കലോറി എരിച്ചുകളയുന്നു. ഈ ക്രമീകരണങ്ങൾ ഏകോപിപ്പിക്കുന്നതിന് തലച്ചോറും നാഡീവ്യൂഹവും കഠിനമായി പ്രവർത്തിക്കേണ്ടതുണ്ട്.

ഇത്തരത്തിൽ ശരീരം തണുപ്പിക്കാൻ വേണ്ടി മാത്രം കൂടുതൽ ഊർജ്ജം (Metabolic load) ചെലവാക്കുന്നത് നമ്മളെ വേഗത്തിൽ ക്ഷീണിപ്പിക്കുന്നു. നമ്മുടെ ഊർജ്ജശേഖരം മുഴുവൻ ചൂടിനെ പ്രതിരോധിക്കാൻ വേണ്ടി മാത്രം തീർന്നുപോകുന്നത് പോലെയാണ് അനുഭവപ്പെടുക.

ഊർജ്ജത്തെയും ഏകാഗ്രതയെയും ബാധിക്കുന്ന നിർജ്ജലീകരണം

വേനൽക്കാലത്ത് ശരീരത്തിലെ എത്രത്തോളം ജലം വിയർപ്പിലൂടെ നഷ്ടമാകുന്നു എന്ന് പലപ്പോഴും  നമ്മൾ തിരിച്ചറിയാറില്ല. വെള്ളവും ലവണങ്ങളും (സോഡിയം, പൊട്ടാസ്യം പോലുള്ള ഇലക്ട്രോലൈറ്റുകൾ) താഴെ പറയുന്ന കാര്യങ്ങൾക്ക് അത്യന്താപേക്ഷിതമാണ്:

• നാഡീപ്രവർത്തനം: ശരീരത്തിലെ സന്ദേശങ്ങൾ കൈമാറാൻ

• പേശികളുടെ പ്രവർത്തനം: പേശികൾ ചുരുങ്ങാനും വികസിക്കാനും

• രക്തചംക്രമണം: രക്തം ശരിയായ രീതിയിൽ ശരീരത്തിൽ സജീവമാകാൻ

• തലച്ചോറിലെ സിഗ്നലുകൾ: വേഗത്തിൽ ചിന്തിക്കാനും തീരുമാനങ്ങൾ കൈക്കൊള്ളാനും

ശരീരഭാരത്തിന്റെ 1-2% എന്ന, വളരെ ചെറിയ അളവിൽ മാത്രമേ വെള്ളം കുറയുന്നുള്ളൂ എങ്കിൽ പോലും അത് വലിയ തളർച്ചയ്ക്കും തലവേദനയ്ക്കും തലകറക്കത്തിനും കാരണമാകും. കൂടാതെ കാര്യങ്ങളിൽ ശ്രദ്ധ കേന്ദ്രീകരിക്കാൻ പ്രയാസം അനുഭവപ്പെടുകയും ചെയ്യും. വേനൽക്കാലത്ത് മിക്കവരിലും കണ്ടുവരുന്ന വിട്ടുമാറാത്ത നിർജ്ജലീകരണം (Chronic dehydration) ഈ പ്രശ്നങ്ങളെ ഇരട്ടിയാക്കുന്നു.

രക്തയോട്ടത്തിലെ മാറ്റങ്ങൾ ഊർജ്ജത്തെ ബാധിക്കുന്നു

ശരീരത്തിന്റെ താപനില ഉയരുമ്പോൾ, ചൂട് പുറന്തള്ളാനായി ചർമ്മത്തിലെ രക്തക്കുഴലുകൾ വികസിക്കുന്നു (Vasodilation). ഇതുവഴി ശരീരത്തിന്റെ ഉൾഭാഗത്തുള്ള അവയവങ്ങളിൽ നിന്നും പേശികളിൽ നിന്നും രക്തം ചർമ്മത്തിന്റെ ഉപരിതലത്തിലേക്ക് കൂടുതലായി ഒഴുകുന്നു.

ശരീരം തണുപ്പിക്കാൻ ഈ പ്രക്രിയ അത്യാവശ്യമാണെങ്കിലും, ഇത് ചില ബുദ്ധിമുട്ടുകൾക്ക് ഇടയാക്കുന്നു:

• പേശികളിലേക്കുള്ള ഓക്സിജൻ കുറയുന്നു: രക്തം ചർമ്മത്തിലേക്ക് കൂടുതലായി എത്തുന്നതിനാൽ പേശികൾക്ക് ലഭിക്കേണ്ട ഓക്സിജന്റെ അളവിൽ കുറവുണ്ടാകുന്നു

• കായികശേഷി കുറയുന്നു: പെട്ടെന്ന് കിതപ്പും തളർച്ചയും അനുഭവപ്പെടാൻ ഇത് കാരണമാകും

• ശരീരത്തിന് ഭാരം അനുഭവപ്പെടുക: ചെറിയ ജോലികൾ ചെയ്താൽ പോലും ശരീരം തളരുകയും കൈകാലുകൾക്ക് ഭാരം അനുഭവപ്പെടുകയും ചെയ്യുന്നു

കൂടാതെ, രക്തചംക്രമണം ശരിയായ രീതിയിൽ നിലനിർത്താൻ ഹൃദയത്തിന് കൂടുതൽ വേഗത്തിൽ പ്രവർത്തിക്കേണ്ടി വരുന്നു. ഹൃദയത്തിന്റെ ഈ അധിക അധ്വാനം ശരീരത്തെ വേഗത്തിൽ ക്ഷീണിപ്പിക്കുന്നു.

ചൂട് മൂലമുള്ള ഉറക്കപ്രശ്നങ്ങൾ 

തലച്ചോറിന്റെ ശരിയായ പ്രവർത്തനത്തിനും ശരീരത്തിന്റെ ഊർജ്ജം വീണ്ടെടുക്കാനും നല്ല ഉറക്കം അത്യാവശ്യമാണ്. എന്നാൽ ചൂടുള്ള രാത്രികളിൽ ശരീരത്തിന്റെ താപനില കുറയാൻ പ്രയാസം അനുഭവപ്പെടുന്നു. ഗാഢനിദ്രയിലേക്ക് കടക്കാൻ (Restorative sleep) ശരീരത്തിൻ്റെ താപനില കുറയേണ്ടതുണ്ട്.

പല പഠനങ്ങളും തെളിയിക്കുന്നത് ഇതാണ്:

• രാത്രിയിലെ ഉയർന്ന താപനില ഉറക്കത്തിന്റെ ഗുണനിലവാരം കുറയ്ക്കുന്നു: ശരീരം തണുപ്പിക്കാനുള്ള ശ്രമത്തിൽ തലച്ചോറ് സജീവമായിരിക്കുന്നതിനാൽ ആഴത്തിലുള്ള ഉറക്കം ലഭിക്കില്ല.

• പകൽസമയത്തെ തളർച്ച: രാത്രിയിലെ വിശ്രമത്തിന്റെ കുറവ് പിറ്റേന്നു പകൽ മുഴുവൻ ക്ഷീണം അനുഭവപ്പെടാൻ കാരണമാകുന്നു

• മാനസികാവസ്ഥയിലെ മാറ്റങ്ങൾ: ഉറക്കമില്ലായ്മ, അമിതമായ ദേഷ്യം, മാനസിക സമ്മർദ്ദം, തളർച്ച എന്നിവയ്ക്ക് കാരണമാകുന്നു

വേനൽക്കാലത്ത് രാത്രി മുഴുവൻ ഉറങ്ങിയാലും രാവിലെ ഉന്മേഷം തോന്നാത്തതിന് പിന്നിലെ പ്രധാന കാരണമിതാണ്.

സൂര്യപ്രകാശവും ജൈവതാളവും

സൂര്യപ്രകാശം നമ്മുടെ ശരീരത്തിന്റെ ആന്തരിക ഘടികാരത്തെ അഥവാ സിർകേഡിയൻ റിഥത്തെ നേരിട്ട് സ്വാധീനിക്കുന്നു. രാവിലെ ലഭിക്കുന്ന പ്രകാശം നമ്മളെ ഉന്മേഷവാന്മാരാക്കുമെങ്കിലും വൈകുന്നേരം  ലഭിക്കുന്ന തീവ്രമായ സൂര്യപ്രകാശം മെലറ്റോണിൻ (Melatonin) എന്ന ഹോർമോണിന്റെ ഉല്പാദനത്തെ തടസ്സപ്പെടുത്തുന്നു. നമ്മുടെ ശരീരത്തെ ഉറക്കത്തിനായി തയ്യാറാക്കുന്നത് ഈ ഹോർമോണാണ്.

വേനൽക്കാലത്ത് പകൽ സമയം കൂടുതലായതുകൊണ്ട് വൈകുന്നേരങ്ങളിലും സൂര്യപ്രകാശം നീണ്ടുനിൽക്കുന്നു. ഇത് ഉറക്കത്തിന്റെ സമയക്രമത്തെ പതുക്കെ മാറ്റുകയും വൈകുന്നേരങ്ങളിൽ കടുത്ത ക്ഷീണം അനുഭവപ്പെടാൻ കാരണമാവുകയും ചെയ്യുന്നു.

നീർവീക്കവും ഹീറ്റ് സ്ട്രെസ്സും 

അമിതമായ ചൂട് ശരീരത്തിൽ നേരിയ തോതിലുള്ള സമ്മർദ്ദം (Stress) ഉണ്ടാക്കുന്നു. ഇത് ശരീരത്തിലെ ഇൻഫ്ലമേറ്ററി മാർക്കറുകൾ (Inflammatory markers) വർദ്ധിക്കാനിടയാക്കും. ഇത്തരം മാറ്റങ്ങൾ താഴെ പറയുന്നവയ്ക്ക് കാരണമാകുന്നു:

• തളർച്ച: കഠിനമായ ജോലിയൊന്നും ചെയ്തില്ലെങ്കിലും ക്ഷീണം തോന്നുക

• ശാരീരിക ഊർജ്ജക്കുറവ്: ശരീരം തളർന്നിരിക്കുന്നത് പോലെ തോന്നുക

• മാനസികാവസ്ഥയിലെ മാറ്റങ്ങൾ: പെട്ടെന്ന് ദേഷ്യമോ അസ്വസ്ഥതയോ ഉണ്ടാകുക

ഇത് അസുഖമല്ല; നീണ്ടുനിൽക്കുന്ന ചൂടിനോട് നമ്മുടെ പ്രതിരോധ സംവിധാനവും നാഡീവ്യൂഹവും പ്രതികരിക്കുന്ന രീതിയാണിത്. ഈ സമ്മർദ്ദം നമ്മെ വേഗത്തിൽ ക്ഷീണിപ്പിക്കുന്നു.

ചിലർക്ക് കൂടുതൽ തളർച്ച അനുഭവപ്പെടുന്നത് എന്തുകൊണ്ടാണ്?

വേനൽക്കാലം എല്ലാവരെയും ഒരേപോലെയല്ല ബാധിക്കുന്നത്. ഓരോരുത്തരുടെയും ശാരീരിക അവസ്ഥകളും ജീവിതശൈലിയും ഇതിൽ വലിയ പങ്ക് വഹിക്കുന്നു:

ജനിതക കാരണങ്ങൾ (Genetics): 

ചിലരുടെ ശരീരം സ്വാഭാവികമായും ചൂടിനോട് കൂടുതൽ സെൻസിറ്റീവ് ആയിരിക്കും. അവരുടെ ശരീരത്തിന് താപനില ക്രമീകരിക്കാൻ മറ്റുള്ളവരേക്കാൾ കൂടുതൽ അധ്വാനിക്കേണ്ടി വരുന്നു.

ശാരീരിക ക്ഷമത (Fitness Level): 

കായികമായി കൂടുതൽ കരുത്തുള്ളവരുടെ ശരീരം വളരെ പെട്ടെന്നും കാര്യക്ഷമമായും തണുക്കാൻ പ്രാപ്തിയുള്ളവയായിരിക്കും. വ്യായാമം ചെയ്യുന്നവരുടെ വിയർപ്പ് ഗ്രന്ഥികൾ കൂടുതൽ കൃത്യമായി പ്രവർത്തിക്കുന്നു.

പ്രായം:

മുതിർന്ന ആളുകളിൽ വിയർപ്പ് പുറത്തുവിടാനുള്ള ശരീരത്തിന്റെ കഴിവ് കുറവായിരിക്കും. അതിനാൽ അവർക്ക് വേനൽക്കാല തളർച്ച കഠിനമായി അനുഭവപ്പെടുന്നു.

ആരോഗ്യസ്ഥിതി: 

അനീമിയ (രക്തക്കുറവ്), ഹൈപ്പോതൈറോയിഡിസം, വിട്ടുമാറാത്ത നിർജ്ജലീകരണം എന്നിവയുള്ളവർക്ക് ചൂട് കൂടുമ്പോൾ ക്ഷീണം ഇരട്ടിയായി അനുഭവപ്പെടും.

ഭക്ഷണക്രമവും ലവണങ്ങളും: 

ശരീരത്തിലെ സോഡിയം, പൊട്ടാസ്യം എന്നിവയുടെ അളവ് കുറയുന്നത് വേനൽക്കാലത്തെ തളർച്ച വർദ്ധിപ്പിക്കാൻ കാരണമാകുന്നു.

വേനൽക്കാല തളർച്ചയെ മറികടക്കാനുള്ള ചില മാർഗ്ഗങ്ങൾ

• ധാരാളം വെള്ളം കുടിക്കുക: ദാഹം തോന്നിയില്ലെങ്കിലും ഇടയ്ക്കിടെ വെള്ളം കുടിക്കുന്നത് ശീലമാക്കുക

• ഇലക്ട്രോലൈറ്റുകൾ: കരിക്കിൻ വെള്ളം, നാരങ്ങാവെള്ളം (ഉപ്പിട്ടത്), മോര് എന്നിവ കുടിക്കുന്നത് ശരീരത്തിലെ ലവണങ്ങൾ നിലനിർത്താൻ സഹായിക്കും

• ഭക്ഷണക്രമം: അമിതമായി ഭക്ഷണം കഴിക്കാതെ ചെറിയ അളവിൽ പലപ്പോഴായി കഴിക്കുക. തണ്ണിമത്തൻ, വെള്ളരിക്ക തുടങ്ങിയ ജലാംശമുള്ള പഴങ്ങൾ ഭക്ഷണത്തിൽ ഉൾപ്പെടുത്തുക

• ഉറക്കം: രാത്രിയിൽ മുറി തണുപ്പുള്ളതാക്കിയാൽ സ്വസ്ഥമായി ഉറങ്ങാനാകും

തളർച്ച വർദ്ധിപ്പിക്കുന്ന വേനൽക്കാല ശീലങ്ങൾ

നമ്മുടെ ചില ദൈനംദിന ശീലങ്ങൾ അറിയാതെ തന്നെ വേനൽക്കാലത്തെ തളർച്ച വർദ്ധിപ്പിക്കാറുണ്ട്:

• വൈകിയുള്ള ഉറക്കം: വേനൽക്കാലത്ത് രാത്രികൾ ദൈർഘ്യം കുറഞ്ഞതായി തോന്നുന്നതും വിനോദങ്ങളിൽ ഏർപ്പെടുന്നതും ഉറക്കം കുറയാൻ കാരണമാകുന്നു

• അമിതമായ ഔട്ട്‌ഡോർ ആക്റ്റിവിറ്റി: കഠിനമായ വെയിലിൽ കൂടുതൽ സമയം ചെലവഴിക്കുന്നത് ശരീരത്തിലെ ഊർജ്ജം വേഗത്തിൽ കുറയ്ക്കുന്നു

• നിർജ്ജലീകരണം ഉണ്ടാക്കുന്ന പാനീയങ്ങൾ: അമിതമായ കാപ്പി, ചായ, മദ്യം എന്നിവയുടെ ഉപയോഗം ശരീരത്തിലെ ജലാംശം വേഗത്തിൽ നഷ്ടപ്പെടുത്തുന്നു

• എ സിയുടെ (AC) അമിതോപയോഗം: എ സി മുറിയിൽ നിന്നും പുറത്തെ ചൂടിലേക്കും തിരിച്ചും പെട്ടെന്ന് മാറുന്നത് ശരീരത്തിന്റെ താപനില ക്രമീകരണ സംവിധാനത്തെ (Thermoregulation) സമ്മർദ്ദത്തിലാക്കുന്നു

വേനൽക്കാല തളർച്ചയുടെ ലക്ഷണങ്ങൾ 

കൈകാലുകൾക്ക് ഭാരം അനുഭവപ്പെടുക: ശരീരം അനക്കാൻ പോലും മടി തോന്നുന്ന അവസ്ഥ

ചിന്തകളിൽ വ്യക്തതയില്ലാതാകുക, കാര്യങ്ങൾ പെട്ടെന്ന് മറന്നുപോകുക

രാവിലെ എഴുന്നേൽക്കാൻ പ്രയാസം, രാത്രി എത്ര ഉറങ്ങിയാലും രാവിലെ ഉന്മേഷം തോന്നാതിരിക്കുക

വിശ്രമിച്ചാൽ പോലും മാറാത്ത തളർച്ചയും ഉന്മേഷക്കുറവും

ഇത് ഒരിക്കലും മടി കൊണ്ടുണ്ടാകുന്ന ബുദ്ധിമുട്ടുകളല്ല. ശരീരത്തിലെ ഊർജ്ജശേഖരവും താപനില നിയന്ത്രണ സംവിധാനവും അമിതമായ സമ്മർദ്ദത്തിലാണെന്ന് ശരീരം നൽകുന്ന സൂചനയാണിത്.

ഭക്ഷണക്രമവും വെള്ളം കുടിക്കേണ്ടതിൻ്റെ പ്രാധാന്യവും

നമ്മുടെ ദൈനംദിന ജീവിതത്തിലെ ചെറിയ മാറ്റങ്ങൾ ശരീരത്തിന് ചൂടിനെ പ്രതിരോധിക്കാൻ വലിയ കരുത്ത് നൽകുമെന്ന് പഠനങ്ങൾ തെളിയിക്കുന്നു.

🥤 വെള്ളം കുടിക്കേണ്ടതിൻ്റെ പ്രാധാന്യം 

ശരീരത്തിൽ ആവശ്യത്തിന് ജലാംശം നിലനിർത്തുന്നത് താഴെ പറയുന്ന കാര്യങ്ങൾക്ക് സഹായകമാകുന്നു:

• കണ്ണുനീർ, ഉമിനീർ ഉല്പാദനം: ശരീരത്തിലെ ഈർപ്പം നിലനിർത്താൻ ഇവ അത്യാവശ്യമാണ്

• ആവശ്യത്തിന് വെള്ളം കുടിക്കുന്നത് രക്തചംക്രമണം സുഗമമാക്കുകയും ഹൃദയത്തിന്റെ അധ്വാനം കുറയ്ക്കുകയും ചെയ്യുന്നു

• ലവണങ്ങളുടെ സന്തുലിതാവസ്ഥ: ശരീരത്തിലെ ഇലക്ട്രോലൈറ്റുകളുടെ അളവ് കൃത്യമായി നിലനിർത്തുന്നു

നേരിയ തോതിലുള്ള നിർജ്ജലീകരണം പോലും ചെറിയ ജോലികൾ ചെയ്യുന്നത് വലിയ പ്രയാസമുള്ള കാര്യമായി തോന്നിപ്പിക്കാൻ കാരണമാകും.

ശരീരം തണുപ്പിക്കുന്ന ഭക്ഷണങ്ങൾ 

ധാരാളം ജലാംശം അടങ്ങിയ ഭക്ഷണങ്ങൾ വേനൽക്കാലത്ത് ശീലമാക്കുന്നത് വളരെ നല്ലതാണ്.

• തണ്ണിമത്തൻ: ഇതിലെ ഉയർന്ന ജലാംശം ശരീരത്തെ തണുപ്പിക്കുന്നു

• വെള്ളരിക്ക: ദാഹം ശമിപ്പിക്കാനും ശരീരത്തിന് ഉന്മേഷം നൽകാനും മികച്ചതാണ്

• സിട്രസ്  അടങ്ങിയ പഴങ്ങൾ (നാരങ്ങ, ഓറഞ്ച്): വൈറ്റമിൻ സി നൽകുന്നതിനൊപ്പം ജലാംശം ഉറപ്പാക്കുന്നു

• കരിക്കിൻ വെള്ളം: ശരീരത്തിന് ആവശ്യമായ പൊട്ടാസ്യം, സോഡിയം തുടങ്ങിയ ലവണങ്ങൾ നൽകുന്നു

ഇത്തരം ഭക്ഷണങ്ങൾ വെള്ളത്തോടൊപ്പം കോശങ്ങളുടെ പ്രവർത്തനത്തിനും ഊർജ്ജോല്പാദനത്തിനും ആവശ്യമായ സൂക്ഷ്മ പോഷകങ്ങളും (Micro-nutrients) നൽകുന്നു. വേനൽച്ചൂടിൽ ഇത്തരം ഭക്ഷണങ്ങൾ ശീലിക്കുന്നത് തളർച്ച കുറയ്ക്കാനും ഉൻമേഷം വർദ്ധിപ്പിക്കാനും സഹായിക്കുമെന്ന് പഠനങ്ങൾ വ്യക്തമാക്കുന്നു.

അവബോധം നൽകുന്ന പരിചരണം

വേനൽക്കാലത്തെ തളർച്ച ശരീരത്തിന്റെ സ്വാഭാവികമായ ജൈവ പ്രതികരണമാണ്. ഇതിനെ ശാസ്ത്രീയമായി മനസ്സിലാക്കുന്നത് പലതരത്തിലും ഗുണം ചെയ്യും:

• ശരീരത്തിന്റെ ആവശ്യങ്ങൾ തിരിച്ചറിയാൻ: വിശ്രമവും ജലപാനവും എപ്പോൾ വേണമെന്ന് മനസ്സിലാക്കാം

• ദിനചര്യകൾ ക്രമീകരിക്കാൻ: വെയിൽ കുറഞ്ഞ സമയങ്ങളിൽ ജോലികൾ ആസൂത്രണം ചെയ്യാൻ സഹായിക്കുന്നു

• ഊർജ്ജം നിലനിർത്താൻ: അനാവശ്യമായ നിരാശ ഒഴിവാക്കി പോസിറ്റീവ് ആയിരിക്കാൻ സാധിക്കുന്നു

ചൂട് കാരണം തളർന്നു പോകുന്നു എന്നതിലുപരി, ശരീരത്തിലെ പ്രതിരോധ സംവിധാനങ്ങൾ അമിതമായി ജോലി ചെയ്യുന്നു എന്നതിന്റെ സൂചനയാണ് ഈ ക്ഷീണം.

വേനൽക്കാല തളർച്ച

മനുഷ്യശരീരത്തിന് അതിന്റെ സ്വാഭാവികമായ പരിമിതികളുണ്ട്. ആ പരിധികളെ പരിഗണിക്കുമ്പോഴാണ് ശരീരം ഏറ്റവും മികച്ച രീതിയിൽ പ്രവർത്തിക്കുന്നത് എന്നതിന്റെ ഓർമ്മപ്പെടുത്തലാണ്, വാസ്തവത്തിൽ വേനൽക്കാലത്ത് അനുഭവപ്പെടുന്ന ഈ തളർച്ച.

ഏതു പ്രതികൂല സാഹചര്യത്തോടും  പൊരുത്തപ്പെടാനുള്ള കഴിവ് നമ്മുടെ ശരീരത്തിനുണ്ട്. എന്നാൽ ആവശ്യമായ കരുതൽ (വെള്ളം, വിശ്രമം, ശരിയായ ഭക്ഷണം) നൽകാതെ കഠിനമായ ചൂടിൽ അമിതമായി ജോലി ചെയ്യുന്നത് ശരീരത്തിന്റെ സന്തുലിതാവസ്ഥ തെറ്റിക്കും.

ചൂടിനോട് പൊരുതാൻ നിൽക്കാതെ ബുദ്ധിപൂർവ്വം ജീവിക്കാൻ പഠിക്കേണ്ട സമയമാണ് വേനൽക്കാലം.