കാവിറ്റിയുടെ കാരണങ്ങളും പരിഹാരവും 

പല്ലിന് പോടുകൾ വരുന്നത് മധുരം അമിതമായി കഴിക്കുന്നതു കൊണ്ടാണെന്ന ധാരണയുള്ള ധാരാളം പേർ നമുക്കിടയിലുണ്ട്. കുട്ടികൾക്ക് പല്ലുവേദന വരുമ്പോഴും രക്ഷിതാക്കൾ പറയുക ചോക്ളേറ്റും മധുര പലഹാരങ്ങളും കഴിക്കുന്നത് കുറയ്ക്കാനാണ്. ആഹാരത്തിൽ പഞ്ചസാരയുടെ അളവ് കൂടുമ്പോൾ പല്ലുകൾക്ക് കേടു സംഭവിക്കുമെന്നും അളവ് കുറച്ചാൽ ആരോഗ്യമുള്ള പല്ലുകൾ സ്വന്തമാക്കാമെന്നുമുള്ള ധാരണയിൽ വാസ്തവത്തിൽ എത്രത്തോളം കഴമ്പുണ്ട്?

ആധുനിക ദന്തശാസ്ത്രം, പല്ലുകളുടെ ആരോഗ്യം നിലനിർത്താനായി നൽകുന്ന നിർദ്ദേശങ്ങളിൽ മറ്റു പല ഘടകങ്ങൾക്കും പ്രസക്തിയുണ്ട്.

പല്ലിന് കേടുണ്ടാക്കുന്നത് പഞ്ചസാര മാത്രമല്ല; ബാക്ടീരിയ, ഉമിനീർ, ഭക്ഷണക്രമം, വായയുടെ ശുചിത്വം,  ജീവിതശൈലി എന്നിവയെല്ലാം ഇതിൽ ഉൾപ്പെടുന്നു.

പഞ്ചസാരയെ മാത്രം വില്ലനായി ചിത്രീകരിക്കുന്ന പൊതുധാരണയിൽ നിന്ന് ശാസ്ത്രം എത്രമാത്രം മുന്നോട്ട് സഞ്ചരിച്ചു എന്നും തെറ്റിദ്ധാരണകൾ ഒഴിവാക്കി, കൃത്യമായ അവബോധം ആർജിക്കേണ്ടത് ദന്താരോഗ്യ സംരക്ഷണത്തിന് എത്രത്തോളം അനിവാര്യമാണെന്നും nellikka.life പരിശോധിക്കുന്നു.

പഴയ ധാരണ: പഞ്ചസാര എന്ന വില്ലൻ

പല്ലുകൾ കേടു വരുത്തുന്നതിൽ പഞ്ചസാരയ്ക്ക് പങ്കുണ്ട് എന്നത് സത്യമാണ്— പക്ഷെ അത് മാത്രമല്ല കാരണം. മധുരമുള്ള ഭക്ഷണങ്ങൾ കഴിക്കുമ്പോൾ, വായിലെ ബാക്ടീരിയകൾ (പ്രത്യേകിച്ച് സ്ട്രെപ്റ്റോകോക്കസ് മ്യൂട്ടൻസ്) ഈ പഞ്ചസാരയെ ഭക്ഷിക്കുകയും അതിൻ്റെ ഉപോൽപ്പന്നമായി ആസിഡ് പുറത്തുവിടുകയും ചെയ്യുന്നു. ഈ ആസിഡ് പല്ലിൻ്റെ സംരക്ഷണ കവചമായ ഇനാമലിനെ നശിപ്പിക്കുന്നു, ഇത് സൂക്ഷ്മ സുഷിരങ്ങളുണ്ടാകുന്നതിനോ ദന്തക്ഷയത്തിനോ കാരണമാകുന്നു.

എത്ര തവണ പഞ്ചസാരയുമായി പല്ലിന് സമ്പർക്കമുണ്ടാകുന്നു എന്നതിനാണ് എത്ര അളവിൽ മധുരം കഴിക്കുന്നു എന്നതിനേക്കാൾ പ്രാധാന്യം എന്ന കാര്യം എപ്പോഴും ഓർമ്മ വേണം. ഒരു കുപ്പി കോള അൽപ്പാൽപ്പമായി ഇടയ്ക്കിടെ കുടിക്കുന്നത്,  ഒരു കഷ്ണം കേക്ക് ഒറ്റയടിക്ക് കഴിക്കുന്നതിനേക്കാൾ ദോഷം ചെയ്യും. മധുരവുമായുള്ള ഓരോ തവണത്തെ  സമ്പർക്കവും പല്ലിൽ  20–30 മിനിറ്റ് നേരത്തെ ആസിഡ് ആക്രമണത്തിന് കാരണമാകുന്നുണ്ട്. 

അതുകൊണ്ട്, എത്ര പഞ്ചസാര കഴിക്കുന്നു എന്നതിലല്ല, പല്ലുകൾ എത്ര സമയം ആസിഡുമായി സമ്പർക്കത്തിൽ വരുന്നു എന്നതിലാണ് കാര്യം.

യഥാർത്ഥ വില്ലൻമാർ: ബാക്ടീരിയ, ആസിഡ്, അസന്തുലിതാവസ്ഥ

പല്ലിൻ്റെ കേട് തുടങ്ങുന്നത് വായിലെ സ്വാഭാവിക          ആവാസവ്യവസ്ഥയിലുണ്ടാകുന്ന മാറ്റത്തിൽ നിന്നാണ്. ആരോഗ്യകരമായ അവസ്ഥയിൽ, വായിൽ  ന്യൂട്രൽ pH ഏകദേശം ഏഴായി  നിലനിർത്തുന്നു. ഭക്ഷണം കഴിച്ച ശേഷം, ബാക്ടീരിയകൾ ആസിഡ് പുറത്തുവിടുമ്പോൾ pH കുറയുന്നു. സാധാരണയായി, ഉമിനീർ ഈ ആസിഡിനെ നിർവീര്യമാക്കാൻ സഹായിക്കും.

എന്നാൽ, ശരിയായ രീതിയിൽ ബ്രഷ് ചെയ്യാത്തതു മൂലവും കാർബോഹൈഡ്രേറ്റ് അടങ്ങിയ ലഘുഭക്ഷണം അല്ലെങ്കിൽ നിർജ്ജലീകരണം മൂലവും വായിലെ സൂക്ഷ്മാണുക്കളുടെ സന്തുലിതാവസ്ഥ തെറ്റിയാൽ, ദോഷകരമായ ബാക്ടീരിയകൾ ആധിപത്യം സ്ഥാപിക്കാൻ തുടങ്ങുന്നു.

ഈ ബാക്ടീരിയകൾ പഞ്ചസാരയെ മാത്രമല്ല, ശുദ്ധീകരിച്ച കാർബോഹൈഡ്രേറ്റുകളെയും (വെളുത്ത അരി, ബ്രെഡ്, ചിപ്സ് പോലുള്ളവ) ആസിഡായി മാറ്റുന്നു. ദിവസത്തിൽ പലതവണ ആവർത്തിക്കുന്ന ഈ പ്രക്രിയ ഇനാമലിനെ ദുർബലപ്പെടുത്തുകയും കേടു വർദ്ധിക്കാനുള്ള സാഹചര്യം സൃഷ്ടിക്കുകയും ചെയ്യുന്നു.

ചുരുക്കത്തിൽ: ദന്തക്ഷയമെന്നത് ബാക്ടീരിയ കാരണമുണ്ടാകുന്ന രോഗമാണ്, പഞ്ചസാര അതിൻ്റെ ഇന്ധനം മാത്രമാണ്.

ഉമിനീർ : വായുടെ നിശ്ശബ്ദ സംരക്ഷകൻ

പല്ലുകളുടെ സംരക്ഷകരിൽ ഉമിനീർ പലപ്പോഴും ശ്രദ്ധിക്കപ്പെടാതെ പോകുന്നു. ഇത് ഒരു ബഫർ (Buffer) പോലെ പ്രവർത്തിക്കുകയും, ഭക്ഷണത്തിൻ്റെ അംശങ്ങളെ കഴുകിക്കളയുകയും ആസിഡിനെ നിർവീര്യമാക്കുകയും ചെയ്യുന്നു.

ഉമിനീരിൽ കാൽസ്യം, ഫോസ്ഫേറ്റ്, ബൈകാർബണേറ്റ് അയോണുകൾ എന്നിവ അടങ്ങിയിട്ടുണ്ട്. ഇവ പുനർ ധാതുവൽക്കരണം എന്ന പ്രക്രിയയിലൂടെ ഇനാമലിന് പ്രാരംഭഘട്ടത്തിലുണ്ടാകുന്ന കേടുപാടുകൾ നന്നാക്കുന്നു. എന്നാൽ (മാനസിക സമ്മർദ്ദം, ചില മരുന്നുകൾ, അല്ലെങ്കിൽ നിർജ്ജലീകരണം എന്നിവ കാരണം) ഉമിനീരിൻ്റെ ഉത്പാദനം കുറയുമ്പോൾ, സ്വാഭാവിക പ്രതിരോധം ദുർബലപ്പെടുന്നു.

അതുകൊണ്ടാണ്, പഞ്ചസാര കുറച്ച് കഴിക്കുന്നവരിൽ പോലും വായ വരളുന്ന അവസ്ഥ (Xerostomia) ഉള്ളവർക്ക് പോടുവരാനുള്ള സാധ്യത കൂടുതലായിരിക്കുന്നത്.

ഇവ പരീക്ഷിക്കാം:

• ദിവസം മുഴുവൻ നന്നായി വെള്ളം കുടിച്ച് നിർജ്ജലീകരണം ഒഴിവാക്കുക.

• ഉമിനീരിനെ ഉത്തേജിപ്പിക്കാൻ പഞ്ചസാര രഹിത ച്യൂയിങ് ഗം (Sugar-free gum) ചവയ്ക്കുക.

• വായ വരണ്ടതാക്കുന്ന ആൽക്കഹോളും കഫീനും പരിമിതപ്പെടുത്തുക.

ഭക്ഷണത്തിന് പ്രധാന പങ്ക്

നമ്മൾ എന്തു കഴിക്കുന്നു എന്നത് മാത്രമല്ല പ്രധാനം, നമ്മുടെ ഭക്ഷണക്രമം

വായിലെ രാസഘടനയെ എങ്ങനെ സ്വാധീനിക്കുന്നു എന്നതും പ്രാധാന്യമർഹിക്കുന്ന ഘടകമാണ്. 

കൂടുതൽ പ്രശ്നസാധ്യതയുള്ള ഭക്ഷണങ്ങൾ: ഒട്ടിപ്പിടിക്കുന്ന തരം മധുരപലഹാരങ്ങൾ, ശുദ്ധീകരിച്ച കാർബോഹൈഡ്രേറ്റുകൾ, ആസിഡ് അടങ്ങിയ സോഡകൾ, എനർജി ഡ്രിങ്കുകൾ, സിട്രസ് ജ്യൂസുകൾ.

സംരക്ഷണം നൽകുന്ന ഭക്ഷണങ്ങൾ:

• പാൽ ഉൽപ്പന്നങ്ങൾ (പാൽ, ചീസ്, തൈര്) — ഇനാമലിനെ ശക്തിപ്പെടുത്തുന്ന കാൽസ്യം ധാരാളമായി അടങ്ങിയിരിക്കുന്നു.

• പരിപ്പുകളും വിത്തുകളും — ധാതുക്കളും നല്ല കൊഴുപ്പുകളും നൽകുന്നു.

• കറുമുറെ കഴിക്കാൻ പറ്റുന്ന പഴങ്ങളും പച്ചക്കറികളും (ആപ്പിളും കാരറ്റും പോലെ) — സ്വാഭാവികമായി വൃത്തിയാക്കാനും ഉമിനീരിനെ ഉത്തേജിപ്പിക്കാനും സഹായിക്കുന്നു.

കൂടാതെ, വിറ്റാമിൻ ഡി, കെ 2 എന്നിവ കാൽസ്യം ആഗിരണം ചെയ്യുന്നതിലും ഇനാമൽ പുനരുജ്ജീവിപ്പിക്കുന്നതിലും നിർണായക പങ്ക് വഹിക്കുന്നതായി പഠനങ്ങൾ വ്യക്തമാക്കുന്നു. ഈ വിറ്റാമിനുകൾ കുറവുള്ള ഭക്ഷണക്രമം ആണെങ്കിൽ, അത് ഇനാമലിൻ്റെ കട്ടി കുറയ്ക്കുകയും പഞ്ചസാര കുറച്ച് കഴിക്കുന്നവരിൽ പോലും ദന്തക്ഷയത്തിന് വഴിയൊരുക്കുകയും ചെയ്യും.

ബ്രഷ് ചെയ്തതുകൊണ്ട് മാത്രം പൂർണ്ണമാകില്ല

പല്ലുകൾക്കിടയിൽ ബാക്ടീരിയകൾ ഒളിച്ചിരുന്നാൽ, ഏറ്റവും മികച്ച ബ്രഷിംഗ് ശീലങ്ങൾക്ക് പോലും കേടുകൾ പൂർണ്ണമായി തടയാൻ കഴിയില്ല.

അതുകൊണ്ടാണ് ഫ്ലോസിംഗും നാവ് വൃത്തിയാക്കലും ഒഴിവാക്കാനാവാത്ത കാര്യങ്ങളായി കണക്കാക്കുന്നത്.

• ദിവസവും ഫ്ലോസ് ചെയ്യുക: ടൂത്ത് ബ്രഷിന് എത്താൻ കഴിയാത്ത പല്ലുകൾക്കിടയിലെ പ്ലാക്ക് ഇത് നീക്കം ചെയ്യുന്നു.

• നാവ് വൃത്തിയാക്കുക: ബാക്ടീരിയകൾ അടിഞ്ഞുകൂടുന്നത് കുറയ്ക്കുകയും വായ്‌നാറ്റം തടയുകയും ചെയ്യുന്നു.

• ഫ്ലൂറൈഡ് ടൂത്ത് പേസ്റ്റ് ഉപയോഗിക്കുക: ഫ്ലൂറൈഡ് ഇനാമലിനുണ്ടായ പ്രാരംഭ കേടുപാടുകൾ പുനഃസ്ഥാപിക്കാൻ സഹായിക്കുകയും ആസിഡിനെ പ്രതിരോധിക്കാനുള്ള കരുത്ത് നൽകുകയും ചെയ്യുന്നു.

പല്ല് രണ്ട് മിനിറ്റെങ്കിലും വൃത്താകൃതിയിലുള്ള സൗമ്യമായ ചലനങ്ങളോടെ (പരുപരുത്ത രീതിയിൽ ഉരസരുത്) ദിവസത്തിൽ രണ്ടുതവണ ബ്രഷ് ചെയ്യണമെന്നാണ് ദന്താരോഗ്യവിദഗ്ദ്ധർ ശുപാർശ ചെയ്യുന്നത്.

പല്ലിന്റെ കേടും ഓറൽ മൈക്രോബയോമും

നമ്മുടെ വായിൽ 700ൽ അധികം തരം ബാക്ടീരിയകളുടെ ഒരു ആവാസവ്യവസ്ഥ തന്നെയുണ്ട് — അവയിൽ മിക്കതും പ്രയോജനം ചെയ്യുന്നതുമാണ്.

ഈ ആവാസവ്യവസ്ഥ സന്തുലിതമാകുമ്പോൾ, നല്ല ബാക്ടീരിയകൾ, ദോഷകരമായ സൂക്ഷ്മാണുക്കൾ ആധിപത്യം സ്ഥാപിക്കുന്നത് തടയുന്നു.

മോണരോഗം,പോട്, ശരീരത്തിലെ വീക്കം എന്നിവയിൽ നിന്ന് സംരക്ഷിക്കാൻ ആരോഗ്യകരമായ ബാക്ടീരിയൽ സമൂഹം സഹായിക്കുമെന്ന് ഓറൽ മൈക്രോബയോമിക്സിലെ (Oral Microbiomics) പുതിയ ഗവേഷണങ്ങൾ പറയുന്നു.

അമിതമായി ആൻ്റി ബാക്ടീരിയൽ മൗത്ത് വാഷ് ഉപയോഗിക്കുന്നത് ഈ സന്തുലിതാവസ്ഥയെ തകർക്കുകയും നല്ലതും ചീത്തയുമായ ബാക്ടീരിയകളെ നശിപ്പിക്കുകയും ചെയ്‌തേക്കാം — ഇത് വിപരീത ഫലങ്ങൾക്ക് കാരണമാകും.

സമ്മർദ്ദവും ഉറക്കക്കുറവും ദന്താരോഗ്യത്തെ ബാധിക്കുന്നതെങ്ങനെ?

സമ്മർദ്ദം (Stress) കോർട്ടിസോളിന്റെ അളവ് വർദ്ധിപ്പിക്കുന്നു, ഉമിനീരിന്റെ ഒഴുക്ക് കുറയ്ക്കുന്നു, പല്ലുകൾ കടിച്ചുപിടിക്കുന്നത് (Bruxism) പോലുള്ള അനാരോഗ്യകരമായ ശീലങ്ങളെ പ്രോത്സാഹിപ്പിക്കുന്നു. ഇതെല്ലാം ഇനാമലിന്റെ തേയ്മാനം വർദ്ധിപ്പിക്കുന്നു.

ഉറക്കമില്ലായ്മ ഉമിനീരിൻ്റെ ഘടനയെ മാറ്റുകയും വീക്കം വർദ്ധിപ്പിക്കുകയും ചെയ്യുന്നു — ഇത് വായുടെ ആരോഗ്യത്തെ പരോക്ഷമായി വഷളാക്കുന്നു.

അതുകൊണ്ടാണ് ആധുനിക ദന്തശാസ്ത്രം ദന്തക്ഷയത്തെ മൊത്തത്തിലുള്ള ആരോഗ്യ പ്രശ്നമായി കണക്കാക്കുന്നത്.

ശാസ്ത്രീയ പിന്തുണയോടെയുള്ള പ്രതിരോധ മാർഗ്ഗങ്ങൾ

1.ഇനാമൽ നന്നാക്കാൻ ഫ്ലൂറൈഡ് അല്ലെങ്കിൽ ഹൈഡ്രോക്സിയപാറ്റൈറ്റ് (Hydroxyapatite) ടൂത്ത് പേസ്റ്റ് ഉപയോഗിക്കുക.

2.സൈലിറ്റോൾ (Xylitol) അടിസ്ഥാനമാക്കിയുള്ള മൗത്ത് വാഷ് ഉപയോഗിച്ച് കഴുകുക — ഇത് ബാക്ടീരിയയുടെ ഉപാപചയ പ്രവർത്തനങ്ങളെ തടസ്സപ്പെടുത്തുന്നു.

3.പ്രൊഫഷണൽ ക്ലീനിംഗിനും ആവശ്യമെങ്കിൽ ഫ്ലൂറൈഡ് വാർണിഷിനും വേണ്ടി ഓരോ 6 മാസം കൂടുമ്പോഴും ഡോക്ടറെ സന്ദർശിക്കുക.

4.സന്തുലിതമായ ഭക്ഷണം കഴിക്കുക, ഭക്ഷണങ്ങൾക്കിടയിൽ ലഘുഭക്ഷണം ഒഴിവാക്കുക

5.ഭക്ഷണത്തിന് ശേഷം ഉമിനീരിനെ ഉത്തേജിപ്പിക്കാനും ആസിഡുകളെ നിർവീര്യമാക്കാനും പഞ്ചസാര രഹിത ഗം ചവയ്ക്കുക.

ഓർമ്മിക്കാൻ:

പല്ലിന് കേട് വരുന്നത് മധുരം കഴിച്ചതുകൊണ്ട് മാത്രമല്ല, ഭക്ഷണക്രമം, ഉമിനീർ, ആഹാരശീലങ്ങൾ, മൈക്രോബയോം എന്നിവയുടെ സ്വാധീനത്തിലുള്ള ഒരു ബയോളജിക്കൽ അസന്തുലിതാവസ്ഥ കാരണമാണ്. ദന്തക്ഷയത്തിന് പങ്ക് വഹിക്കുന്ന ഒരു ഘടകം മാത്രമാണ് പഞ്ചസാര.

ആരോഗ്യം തുളുമ്പുന്ന ഓരോ പുഞ്ചിരിയും കുറ്റബോധത്തിൽ നിന്നല്ല, കൃത്യമായ അവബോധത്തിൽ നിന്നാണ് ആരംഭിക്കുന്നത് എന്ന് nellikka.life ഉറച്ച് വിശ്വസിക്കുന്നു. കാരണങ്ങൾ മനസ്സിലാക്കുക, അവബോധമുള്ളവരാകുക.

Science-Backed References

1. Featherstone, J.D.B. (2008). The Science and Practice of Caries Prevention. Journal of the American Dental Association.
2. Moynihan, P. & Kelly, S. (2014). Effect on caries of restricting sugars intake: systematic review to inform WHO guidelines. Journal of Dental Research.
3. Takahashi, N. & Nyvad, B. (2011). The Role of Bacteria in the Caries Process: Ecological Perspectives. Journal of Dental Research.
4. Dawes, C. (2008). Salivary flow patterns and the health of hard and soft oral tissues. Journal of the American Dental Association.