ദന്തചികിത്സാമേഖലയിൽ കഴിഞ്ഞ കുറച്ചു വർഷങ്ങളായി വിപ്ലവകരമായ പല മാറ്റങ്ങളും വന്നുകൊണ്ടിരിക്കുകയാണ്. പണ്ട് വലിയ ഫാക്ടറികളിലും ബഹിരാകാശ ഗവേഷണ മേഖലയിലും മാത്രം കേട്ടിരുന്ന റോബോട്ടിക്‌സും ഓട്ടോമേഷനും ഇന്ന് ദന്ത ചികിത്സയുടേയും ഒഴിച്ചുകൂടാനാകാത്ത ഭാഗമായിക്കഴിഞ്ഞു.

കമ്പ്യൂട്ടറിന്റെ സഹായത്തോടെ ഇംപ്ലാന്റുകൾ സൂക്ഷ്മതയോടെ സ്ഥാപിക്കുന്നത് മുതൽ, നിർമ്മിത ബുദ്ധി ഉപയോഗിച്ച് അസുഖങ്ങൾ നിർണ്ണയിക്കുന്നതുവരെയുള്ള  ഈ പുതിയ മുന്നേറ്റങ്ങൾ, ദന്ത ശസ്ത്രക്രിയകൾക്ക് വേണ്ട തയ്യാറെടുപ്പുകൾ, ശസ്ത്രക്രിയാരീതി, രോഗികളുടെ അനുഭവങ്ങൾ തുടങ്ങിയവയിൽ എല്ലാം വലിയ മാറ്റങ്ങൾ കൊണ്ടുവന്നിരിക്കുന്നു.

1. ദന്ത ചികിത്സയിൽ റോബോട്ടുകളുടെ പ്രസക്തി

വായ്ക്കുള്ളിൽ വളരെ ഇടുങ്ങിയ ഇടങ്ങളിൽ അതീവ ശ്രദ്ധയോടെ നടത്തേണ്ട ചികിൽസാരീതിയാണിത്. ദന്തരോഗ ചികിത്സയുടെ ഭാഗമായി ഡ്രിൽ ചെയ്യുമ്പോഴോ ഇംപ്ലാന്റ് വെക്കുമ്പോഴോ ഉണ്ടാകുന്ന നേരിയ വ്യത്യാസം പോലും രോഗിയുടെ ജീവിതത്തിൽ വലിയ പ്രത്യാഘാതങ്ങൾ സൃഷ്ടിച്ചേക്കാം. ഈ വെല്ലുവിളിയെ അനായാസം മറികടക്കാൻ റോബോട്ടിക് സാങ്കേതികവിദ്യ സഹായിക്കുന്നു. 

റോബോട്ടിക്സ് കാഴ്ച്ച വെയ്ക്കുന്ന മേന്മകൾ ഇവയാണ്:

• അതീവസൂക്ഷ്മത: മനുഷ്യന് സാധ്യമാകുന്നതിനേക്കാൾ മികച്ച കൃത്യതയോടെ ശസ്ത്രക്രിയകൾ ചെയ്യാൻ സഹായിക്കുന്നു.

• മനുഷ്യ സഹജമായ പിഴവുകൾ കുറയ്ക്കുന്നു: ഒരേപോലെയുള്ള ചികിത്സാരീതികൾക്കിടയിൽ മനുഷ്യർക്ക് സ്വാഭാവികമായി സംഭവിക്കാൻ സാധ്യതയുള്ള പിഴവുകൾ ഒഴിവാക്കുന്നു.

• വേഗത്തിലുള്ള ചികിത്സയും രോഗമുക്തിയും: ചികിത്സയ്ക്ക് എടുക്കുന്ന സമയം കുറയ്ക്കുന്നു, ശസ്ത്രക്രിയയ്ക്ക്  ശേഷം വേഗത്തിൽ സുഖം പ്രാപിക്കാൻ കഴിയുന്നു.

2.ദന്ത ശസ്ത്രക്രിയാ രംഗവും റോബോട്ടിക്സും

ഈ അതിനൂതന സാങ്കേതികവിദ്യ സഹായകമാകുന്ന പ്രധാന മേഖലകൾ:

a. റോബോട്ടിന്റെ സഹായത്തോടെയുള്ള ഡെന്റൽ ഇംപ്ലാന്റ് സർജറി

കൃത്രിമമായി പല്ല് വെച്ചുപിടിപ്പിക്കുന്ന (ഇംപ്ലാന്റ്) ഈ ചികിൽസാരീതിയിൽ റോബോട്ടുകൾ വളരെ സഹായകരമാണ്.

അമേരിക്കയിൽ അംഗീകാരം ലഭിച്ച ‘യോമി’ (Yomi®) എന്ന റോബോട്ടിക് സംവിധാനമാണ് ഈ രംഗത്തെ ആദ്യത്തേത്. ശസ്ത്രകിയയ്ക്ക്  മുൻപ് കമ്പ്യൂട്ടറിൽ തയ്യാറാക്കിയ പല്ലിന്റെ 3D മാതൃക അനുസരിച്ച്, അണുവിട വ്യത്യാസം വരാതെ  ഇംപ്ലാന്റ് ചെയ്യാൻ ഇത് സഹായിക്കുന്നു. ശസ്ത്രക്രിയയുടെ സമയത്ത്, ഡോക്ടറുടെ കൈകളിൽ പ്രത്യേകതരം സ്പർശനത്തിലൂടെ (haptic guidance) ഇത് വഴികാട്ടുന്നു. അതായത് കൈകൾ തെറ്റായ ദിശയിലേക്ക് നീങ്ങുന്നയുടൻ തന്നെ, റോബോട്ടിൽ നിന്ന് ഡോക്ടർക്ക് മുന്നറിയിപ്പ് ലഭിക്കും.

ഗുണങ്ങൾ: വളരെ ചെറിയ മുറിവുകളേ വേണ്ടി വരുന്നുള്ളൂ.രോഗിക്ക്  വേദനയും ബുദ്ധിമുട്ടുകളും താരതമ്യേന കുറവായിരിക്കും. മുറിവ് വേഗത്തിൽ ഉണങ്ങുകയും ചെയ്യും. 

b. താടിയെല്ലിന്റെ ഘടന ശരിയാക്കുന്ന ശസ്ത്രക്രിയകൾ

പുറത്തേക്കോ അകത്തേക്കോ തള്ളിയിരിക്കുന്ന താടിയെല്ലുകൾ, അഭംഗിക്കൊപ്പം, മുഖം കോടുന്നതിനും കാരണമാകും. ഇത്തരം ഘടനാപരമായ പ്രശ്നങ്ങൾ പരിഹരിക്കാനുള്ള ശസ്ത്രക്രിയകളിൽ, അതിസൂക്ഷ്മമായ അളവുകളിൽ, അതായത് മുടിനാരിഴയേക്കാൾ കുറഞ്ഞ കനത്തിൽപ്പോലും അസ്ഥികൾ  മുറിക്കാനും ശരിയായ സ്ഥാനത്ത് പുനഃസ്ഥാപിക്കാനും റോബോട്ടുകൾ സഹായിക്കുന്നു. ഇത് മുഖത്തിന് നല്ല ആകൃതി നൽകുന്നതിനൊപ്പം, താടിയെല്ലിന്റെ പ്രവർത്തനം മെച്ചപ്പെടുത്താനും സഹായിക്കുന്നു. സാധാരണ വേണ്ടതിനേക്കാൾ കുറവ് സമയം കൊണ്ട് ശസ്ത്രക്രിയ പൂർത്തീകരിക്കാനും കഴിയുന്നു.  

c. റൂട്ട് കനാൽ ചികിത്സ

റൂട്ട് കനാൽ ചികിത്സയിലും ഓട്ടോമേഷൻ വലിയ മാറ്റങ്ങൾ കൊണ്ടുവരുന്നുണ്ട്. നിർമ്മിത ബുദ്ധിയുടെ സഹായത്തോടെ പ്രവർത്തിക്കുന്ന ഉപകരണങ്ങൾ പല്ലിന്റെ വേരുകൾ വൃത്തിയാക്കുമ്പോൾ അവയുടെ വേഗതയും മർദ്ദവും  സ്വയം ക്രമീകരിക്കുന്നു. ഇതിലൂടെ ഉപകരണങ്ങൾ വേണ്ടതിനേക്കാൾ കൂടുതൽ പ്രവർത്തിക്കുന്നത് മൂലമുള്ള അപകടസാധ്യത ഒഴിവാക്കാനും രോഗിക്ക് കൂടുതൽ ആശ്വാസം നൽകാനും സാധിക്കുന്നു.

d. ക്രൗൺ, ബ്രിഡ്ജ്, സെറ്റ് എന്നിവ നിർമ്മിക്കുന്നതിന്

മുൻപൊക്കെ പല്ലിൽ വെക്കുന്ന ക്രൗൺ, ബ്രിഡ്ജ്, വെപ്പുപല്ലുകൾ എന്നിവയ്ക്കെല്ലാം അളവുകളെടുത്ത്, ലാബിൽ കൊടുത്ത് ദിവസങ്ങളോളം കാത്തിരുന്ന ശേഷമാണ് ലഭിക്കാറ്. എന്നാൽ ഇന്ന്, ഓട്ടോമേറ്റഡ് മില്ലിംഗ് മെഷീനുകളും 3D പ്രിന്റിംഗ് സംവിധാനങ്ങളും ഉപയോഗിച്ച് ഇവയെല്ലാം ഒരൊറ്റ ദിവസം കൊണ്ടുതന്നെ, അഥവാ രോഗി ആശുപത്രിയിൽ ഇരിക്കുന്ന സമയത്ത്  തന്നെ നിർമ്മിച്ചെടുക്കാൻ സാധിക്കും. റോബോട്ടിന്റെ കൈകൾ പോലുള്ള മില്ലിംഗ് ഉപകരണങ്ങളും AI ഡിസൈൻ സോഫ്റ്റ്‌വെയറും ഒന്നിക്കുന്നതോടെ ദിവസങ്ങൾ നീണ്ട കാത്തിരിപ്പ് ഒഴിവാക്കാൻ കഴിയുന്നു.

3. ദന്തരോഗനിർണ്ണയ രംഗത്തെ ഓട്ടോമേഷൻ

ശസ്ത്രക്രിയ ആരംഭിക്കുന്നതിന് മുൻപ് തന്നെ, ഏറ്റവും നന്നായി അത് ആസൂത്രണം ചെയ്യാൻ ഓട്ടോമേഷൻ സഹായിക്കുന്നു:

• AI സഹായത്തോടെയുള്ള എക്സ്-റേ: നിർമ്മിത ബുദ്ധി  ഉപയോഗിച്ച് എക്സ്-റേ ചിത്രങ്ങൾ പരിശോധിക്കുന്നതിലൂടെ, പല്ലിലെ പോടുകൾ, എല്ലിനുണ്ടാകുന്ന തേയ്മാനം എന്നിവ മനുഷ്യരേക്കാൾ വേഗത്തിലും കൃത്യതയോടെയും കണ്ടെത്താൻ സാധിക്കും.

• CBCT സ്കാനും റോബോട്ടുകളും: പല്ലിന്റെയും താടിയെല്ലിന്റെയും വളരെ വ്യക്തമായ 3D ചിത്രം നൽകുന്ന സംവിധാനമാണ് ആണ് CBCT. ഈ  ചിത്രങ്ങൾ റോബോട്ടിക് സംവിധാനവുമായി ചേർക്കുമ്പോൾ, രോഗിയുടെ ആന്തരിക ഘടനയുടെ പ്രത്യേകതകൾ തിരിച്ചറിഞ്ഞ് ഏറ്റവും സുരക്ഷിതമായി ശസ്ത്രക്രിയ നടത്താൻ സാധിക്കുന്നു.

• ഡിജിറ്റൽ അളവെടുപ്പ്: മുൻപൊക്കെ പല്ലിന്റെ അളവെടുക്കാനായി പശപോലുള്ള  വസ്തു വായിൽ വെച്ച് കടിപ്പിക്കുമായിരുന്നു. കൃത്യമായ അളവുകൾ തിരിച്ചറിയാൻ ഇത് ആവർത്തിക്കേണ്ടിയും വന്നിരുന്നു. ഇപ്പോഴാകട്ടെ, ചെറിയ സ്കാനറുകൾ  ഉപയോഗിച്ച്  ഡിജിറ്റലായി അളവെടുക്കാം. ഈ അളവുകൾ ഉടൻ തന്നെ പല്ല് നിർമ്മിക്കുന്ന ഓട്ടോമേറ്റഡ് മെഷീനുകളിലേക്ക് അയയ്ക്കുകയും ചെയ്യാം.

4. രോഗികൾക്കും ഡോക്ടർമാർക്കുമുള്ള പ്രയോജനങ്ങൾ

ഈ നൂതന  സാങ്കേതികവിദ്യ രോഗികൾക്കും ഡോക്ടർമാർക്കും ഒരുപോലെ ഗുണകരമാണ്.

രോഗികൾക്ക്: 

• ശസ്ത്രക്രിയ മൂലമുള്ള വേദനയും ബുദ്ധിമുട്ടുകളും കുറയുന്നു, വേഗത്തിൽ സുഖം പ്രാപിക്കാൻ സാധിക്കുന്നു.

• ശസ്ത്രക്രിയയ്ക്ക്  ശേഷമുണ്ടാകാവുന്ന അണുബാധ പോലുള്ള സങ്കീർണ്ണതകൾ കുറവാണ്.

• കൃത്യമായ സ്ഥാനത്തുതന്നെ ഇംപ്ലാന്റുകളും മറ്റും സ്ഥാപിക്കുന്നതിനാൽ, അവ കൂടുതൽ കാലം ഈടുനിൽക്കുകയും മികച്ച ഫലം നൽകുകയും ചെയ്യുന്നു.

ഡോക്ടർമാർക്ക്: 

• സങ്കീർണ്ണ ശസ്ത്രക്രിയകൾ ചെയ്യുമ്പോൾ ആത്മവിശ്വാസം വർദ്ധിക്കുന്നു.

• കുറഞ്ഞ ശാരീരികാധ്വാനത്തോടെ പ്രയാസമേറിയ ചികിത്സകൾ നൽകാൻ കഴിയുന്നു.

• ഓരോ ശസ്ത്രക്രിയയിൽ നിന്നും അപ്പപ്പോൾ വിവരങ്ങൾ പഠിക്കുന്നതുകൊണ്ട് (machine learning), കാലക്രമേണ ചികിത്സകൾ കൂടുതൽ മെച്ചപ്പെടുത്താൻ സഹായിക്കുന്നു.

5. വെല്ലുവിളികളും പരിമിതികളും

നിരവധി പ്രയോജനങ്ങൾ ഉണ്ടെങ്കിൽക്കൂടി, ചില വെല്ലുവിളികളും റോബോട്ടിക് ദന്തചികിൽസയ്ക്കുണ്ട് :

• ഉയർന്ന ചെലവ്: ഈ റോബോട്ടിക് സംവിധാനങ്ങൾ വാങ്ങാൻ തുടക്കത്തിൽ വലിയ തുക ചെലവഴിക്കേണ്ടി വരുന്നു.

• പഠിച്ചെടുക്കാൻ വേണ്ട സമയം: ഡോക്ടർമാർക്കും മറ്റ് ജീവനക്കാർക്കും ഈ പുതിയ സാങ്കേതികവിദ്യ ഉപയോഗിച്ച് പരിശീലനം നേടാൻ സമയമെടുക്കും.

• ലഭ്യതക്കുറവ്:  വലിയ നഗരങ്ങളിൽ ലഭ്യമായിത്തുടങ്ങിയെങ്കിലും, പലയിടങ്ങളിലും ഈ സംവിധാനങ്ങൾ നിലവിൽ വന്നിട്ടില്ല.

• സുരക്ഷാമാനദണ്ഡങ്ങൾ: യന്ത്രങ്ങൾക്കോ സോഫ്റ്റ്‌വെയറിനോ ചെറിയ പിഴവ് പോലും വരാതെ നോക്കാൻ, കർശനമായ സുരക്ഷാ നിബന്ധനകൾ ആവശ്യമാണ്.

6. ഭാവിയിലെ സാധ്യതകൾ

അടുത്ത പതിറ്റാണ്ടിൽ ഈ മേഖലയിൽ പ്രതീക്ഷിക്കാവുന്ന നേട്ടങ്ങൾ ഇവയാണ്:

• മനുഷ്യന്റെ മേൽനോട്ടത്തിൽ, പൂർണ്ണമായും സ്വയം പ്രവർത്തിക്കുന്ന ദന്ത ചികിത്സാരീതികൾ.

• ടെലി-ഡെന്റിസ്ട്രി, അതായത് വിദഗ്ദ്ധനായ ഡോക്ടർക്ക് റോബോട്ടിന്റെ സഹായത്തോടെ അതിവിദൂര സ്ഥലത്തിരുന്നുകൊണ്ട് ശസ്ത്രക്രിയ ചെയ്യാൻ പോലും സാധിക്കുന്ന തരത്തിൽ ഈ മേഖല വികസിച്ചേക്കാം.

• വായിൽ വളരെ ചെറിയ മുറിവുകൾ ഉണ്ടാക്കി ശസ്ത്രക്രിയ ചെയ്യാൻ സഹായിക്കുന്ന കുഞ്ഞൻ റോബോട്ടിക് ഉപകരണങ്ങൾ വന്നേക്കാം.

• ഓരോ രോഗിയുടെയും ശരീരഘടനയ്ക്കും ജനിതക പ്രത്യേകതകൾക്കും അനുസൃതമായി അവർക്ക് ഏറ്റവും അനുയോജ്യമായ ചികിത്സ ഏതാണെന്ന വിവരങ്ങൾ മുൻകൂട്ടി നൽകാൻ കഴിയുന്ന AI മാതൃകകൾ ലഭിച്ചേക്കാം.

റോബോട്ടിക്‌സും ഓട്ടോമേഷനും ദന്തചികിത്സയെ കൂടുതൽ കൃത്യവും, കാര്യക്ഷമവും, രോഗികൾക്ക് ആശ്വാസം നൽകുന്ന ഒരനുഭവവുമാക്കി മാറ്റിക്കൊണ്ടിരിക്കുന്നു.

ചില വെല്ലുവിളികൾ നിലനിൽക്കുന്നുണ്ടെങ്കിലും, നിർമ്മിത ബുദ്ധി, 3D ഇമേജിംഗ്, റോബോട്ടിക് സംവിധാനങ്ങൾ എന്നിവ സംയോജിപ്പിക്കുന്നതിലൂടെ, സങ്കീർണ്ണ ചികിത്സകൾ പോലും അതീവ സൂക്ഷ്മതയോടെയും ആത്മവിശ്വാസത്തോടെയും ചെയ്യാൻ കഴിയുന്ന കാലത്തിലേക്കാണ് സാങ്കേതികത മുന്നേറുന്നത് എന്ന് നിസ്സംശയം പറയാൻ കഴിയും.