സ്ത്രീയുടെ ജീവിതത്തിലെ സുപ്രധാന കാലമാണ് ഗർഭകാലം. ശാരീരികവും മാനസികവുമായ നിരവധി മാറ്റങ്ങളിലൂടെ സഞ്ചരിക്കുന്ന കാലമാണിത്. ശാരീരിക ആരോഗ്യത്തിൻ്റെ കാര്യത്തിൽ മാത്രം ശ്രദ്ധ നൽകുകയും ഗർഭിണി, മാനസികമായി അനുഭവിക്കുന്ന സങ്കീർണ്ണതകൾ അവഗണിക്കുകയും ചെയ്യുന്ന ധാരാളം പേർ നമുക്കിടയിലുണ്ട്. ആഹാരം കൂടുതൽ കഴിക്കുകയും സമയാസമയങ്ങളിൽ ഡോക്ടറെക്കണ്ട് വേണ്ടി വന്നാൽ മരുന്നു കഴിക്കുകയും മാത്രമാണ് ഗർഭകാലത്തെ പ്രത്യേക കരുതൽ എന്ന് കണക്കാക്കുന്നവർ, മാനസികാരോഗ്യത്തിൻ്റെ പ്രാധാന്യത്തെക്കുറിച്ച് വേണ്ടത്ര അവബോധമില്ലാത്തവരാണെന്ന് തന്നെ പറയേണ്ടിവരും. കാരണം, വീട്ടിലേക്ക് കുഞ്ഞതിഥി വരുന്ന സന്തോഷത്തിനും കുഞ്ഞിനെക്കുറിച്ചുള്ള പ്രതീക്ഷകൾക്കുമപ്പുറം, ഗർഭകാലം പല സ്ത്രീകൾക്കും മാനസിക പിരിമുറുക്കങ്ങളുടെയും ഭാവിയെക്കുറിച്ചുള്ള ഉത്കണ്ഠകളുടെയും കാലം കൂടിയാണ്. ആരോഗ്യകരമായ ഭക്ഷണത്തിനും സപ്ലിമെന്റുകൾക്കും, ഡോക്ടറെക്കാണുന്നതിനും നൽകുന്ന അതേ പ്രാധാന്യം, ഗർഭിണിയുടെ  മാനസികാരോഗ്യത്തിനും നൽകേണ്ടതുണ്ട്.

ആരോഗ്യമുള്ള ശരീരത്തിനൊപ്പം ഉൻമേഷമുള്ള മനസ്സും വേണം, പ്രത്യേകിച്ചും പുതിയൊരു ജീവൻ ഉള്ളിൽ തുടിക്കുമ്പോൾ. ഗർഭിണികൾക്ക് അവരുടെ വൈകാരികവും മാനസികവുമായ ആരോഗ്യം എങ്ങനെ സംരക്ഷിക്കാമെന്ന് നമുക്ക് മനസ്സിലാക്കാം.

ഗർഭകാലത്തെ മാനസികാരോഗ്യത്തിൻ്റെ പ്രാധാന്യം 

ഗർഭകാലത്ത് ശരീരത്തിലുണ്ടാകുന്ന ഹോർമോൺ വ്യതിയാനങ്ങൾ സ്ത്രീയുടെ മാനസികാവസ്ഥയെയും വികാരങ്ങളെയും സാഹചര്യങ്ങളെ നേരിടാനുള്ള കഴിവിനെയുമെല്ലാം വലിയ തോതിൽ ബാധിക്കാം. ശാരീരികമായ അസ്വസ്ഥതകൾക്ക് പുറമെ, പല സ്ത്രീകൾക്കും താഴെ പറയുന്ന ബുദ്ധിമുട്ടുകൾ അനുഭവപ്പെടാറുണ്ട്:

• മാനസികാവസ്ഥയിലുള്ള മാറ്റങ്ങൾ

• ഉറക്കക്കുറവ്

• പ്രസവത്തെക്കുറിച്ചോ മാതൃത്വത്തെക്കുറിച്ചോ ഉള്ള ഉത്കണ്ഠ

• ഒറ്റപ്പെടൽ അല്ലെങ്കിൽ എല്ലാ കാര്യങ്ങളും തനിയെ കൈകാര്യം ചെയ്യേണ്ടി വരുന്ന അവസ്ഥ

• മുൻപ് അനുഭവിച്ച മാനസികാഘാതങ്ങൾ  അല്ലെങ്കിൽ പരിഹരിക്കപ്പെടാതെ പോയ മാനസികാരോഗ്യ പ്രശ്നങ്ങൾ വീണ്ടും തലപൊക്കുന്നത്

ഇവയെല്ലാം അവഗണിച്ചാൽ പ്രസവത്തിനു മുമ്പുള്ള വിഷാദമോ ഉത്കണ്ഠയോ ഗർഭിണിക്കുണ്ടാകാൻ സാധ്യതയുണ്ട്. ഇത് അമ്മയെ മാത്രമല്ല, കുഞ്ഞിന്റെ വളർച്ചയെയും അമ്മയുമായുള്ള ബന്ധത്തെയും ഭാവിയിലുള്ള ആരോഗ്യത്തെയും ദോഷകരമായി ബാധിക്കാം.

ഗർഭകാലത്തെ വൈകാരിക പ്രശ്നങ്ങൾ

ഓരോ ഗർഭകാലവും വ്യത്യസ്തമാണെങ്കിലും, സാധാരണയായി കണ്ടുവരുന്ന ചില വൈകാരിക പ്രശ്നങ്ങൾ ഇവയാണ്:

1.ഭയവും അനിശ്ചിതത്വവും

പ്രസവത്തെക്കുറിച്ചും കുഞ്ഞിന്റെ ആരോഗ്യത്തെക്കുറിച്ചുമുള്ള ആശങ്കകൾ സാധാരണമാണ്, പ്രത്യേകിച്ചും ആദ്യമായി അമ്മയാകുന്നവർക്ക്.

2.ശാരീരിക മാറ്റവും ആത്മവിശ്വാസവും

ഗർഭകാലത്തെ ശാരീരിക മാറ്റങ്ങൾ പലപ്പോഴും ആത്മവിശ്വാസക്കുറവിനും അസ്വസ്ഥതകൾക്കും കാരണമാകും.

3.ബന്ധങ്ങളിലെ സമ്മർദ്ദം

പങ്കാളിയുമായോ കുടുംബാംഗങ്ങളുമായോ ഉള്ള ബന്ധങ്ങളിലെ റോളുകളിലും പ്രതീക്ഷകളിലുമുണ്ടാകുന്ന മാറ്റങ്ങൾ പിരിമുറുക്കങ്ങൾക്ക് വഴിവെക്കും.

4.ഏറ്റവും മികച്ച അമ്മയാകാനുള്ള സമ്മർദ്ദം

സമൂഹത്തിൽ പൊതുവെ അമ്മമാർ എപ്പോഴും സന്തോഷത്തോടെയും സ്നേഹത്തോടെയും പെരുമാറേണ്ടവരാണെന്ന ധാരണയുണ്ട്. ഇത് വൈകാരികമായ ഉയർച്ചതാഴ്ചകൾ വരുമ്പോൾ കൂടുതൽ സമ്മർദ്ദത്തിലേക്ക് നയിച്ചേക്കാം.

ഗർഭകാലത്ത് മാനസികാരോഗ്യം നിലനിർത്താനുള്ള വഴികൾ

ഗർഭിണികൾക്ക് അവരുടെ വൈകാരിക ആരോഗ്യം എങ്ങനെ സംരക്ഷിക്കാമെന്ന് നോക്കാം:

1.നിങ്ങളുടെ വികാരങ്ങളെ അംഗീകരിക്കുക

എല്ലാ സമയത്തും സന്തോഷമായിത്തന്നെ ഇരിക്കണമെന്ന് നിർബന്ധമില്ല. സന്തോഷം, ഭയം, ക്ഷീണം, ആകാംക്ഷ, ഉത്കണ്ഠ തുടങ്ങിയ എല്ലാ വികാരങ്ങളും ഈ അവസ്ഥയിൽ സ്വാഭാവികമാണെന്ന് തിരിച്ചറിഞ്ഞ് ഉൾക്കൊള്ളാൻ സ്വയം അനുവദിക്കുക.

2.പിന്തുണയ്ക്കുന്നവരുമായുള്ള ബന്ധത്തിന് കരുത്തേകാം

നിങ്ങളെ പിന്തുണയ്ക്കുന്നവരുമായി ബന്ധം നിലനിർത്തുക. കുടുംബാംഗങ്ങൾ, സുഹൃത്തുക്കൾ, മറ്റ് ഗർഭിണികൾ, അല്ലെങ്കിൽ സപ്പോർട്ട് ഗ്രൂപ്പുകൾ എന്നിവയുമായി നിങ്ങൾ അനുഭവിക്കുന്ന കാര്യങ്ങൾ തുറന്ന്  സംസാരിക്കുന്നത് ഏറെ പ്രയോജനം ചെയ്യും. 

3. മൈൻഡ്ഫുൾനെസും റിലാക്സേഷനും

താഴെപ്പറയുന്ന ലളിതമായ കാര്യങ്ങൾ ചെയ്യുന്നത് ഉത്കണ്ഠ കുറയ്ക്കാനും ഉറക്കം മെച്ചപ്പെടുത്താനും സഹായിക്കും:

• ദീർഘമായി ശ്വാസമെടുക്കുന്നത്

• ഗർഭകാല യോഗ

• ധ്യാനം

4.ചിട്ടയായ ദിനചര്യ പാലിക്കാം

പോഷകസമൃദ്ധമായ ആഹാരം, ലളിതമായ വ്യായാമം,  വേണ്ടത്ര വിശ്രമം, സന്തോഷം നൽകുന്ന കാര്യങ്ങൾക്കായി സമയം കണ്ടെത്തുക എന്നിവയെല്ലാം ഉൾപ്പെടുന്ന ഒരു ചിട്ടയായ ദിനചര്യ വൈകാരിക സ്ഥിരത നൽകും.

5.മാനസികാരോഗ്യ വിദഗ്ദ്ധനുമായി സംസാരിക്കുക

നിങ്ങൾക്ക് തുടർച്ചയായി ദുഃഖം, ഉത്കണ്ഠ, അല്ലെങ്കിൽ ഒറ്റപ്പെടൽ എന്നിവ തോന്നുന്നുണ്ടെങ്കിൽ, ഒട്ടും വൈകാതെ മാനസികാരോഗ്യ വിദഗ്ധനെ കാണണം. ഗർഭകാലത്തെ വിഷാദവും ഉത്കണ്ഠയും ചികിത്സിച്ചു മാറ്റാവുന്നതാണ്. അവശ്യസമയത്ത് സഹായം തേടുന്നത് ബലഹീനതയല്ല, പ്രശ്നങ്ങളെ അതിജീവിക്കാനുള്ള കരുത്ത് നേടലാണത്. 

🛌6.ഉറക്കത്തിന് മുൻഗണന നൽകുക

ഉറക്കക്കുറവ് മാനസികാരോഗ്യത്തെ മോശമായി ബാധിച്ചേക്കാം. ഉറങ്ങുന്നതിന് മുമ്പ് മനസ്സിൽ ശാന്തത നിറയ്ക്കുക, രാത്രിയിൽ സ്ക്രീൻ ഉപയോഗിക്കുന്നത് ഒഴിവാക്കുക, ആവശ്യമെങ്കിൽ പകൽ സമയങ്ങളിൽ അൽപ്പനേരം ഉറങ്ങാം.

7.വിവരങ്ങൾ മനസ്സിലാക്കാം, പക്ഷെ അമിതമാകണ്ട

ഗർഭകാലത്തെക്കുറിച്ചും മാതൃത്വത്തെക്കുറിച്ചും അറിഞ്ഞിരിക്കുന്നത് നല്ലതാണ്, എന്നാൽ അമിതമായ വിവരങ്ങൾ, പ്രത്യേകിച്ചും ഓൺലൈനിൽ നിന്ന് പഠിക്കുന്നത്,  ഉത്കണ്ഠ വർദ്ധിപ്പിക്കും. വിശ്വസനീയമായ, ആധികാരികമായ കേന്ദ്രങ്ങളിൽ  മാത്രം ശ്രദ്ധ നൽകുക.

പങ്കാളികൾക്കും കുടുംബാംഗങ്ങൾക്കും ചെയ്യാൻ കഴിയുന്നത്

ഗർഭകാലത്തെ മാനസികാരോഗ്യം ഗർഭിണിയുടെ മാത്രം ഉത്തരവാദിത്തമല്ല. പങ്കാളികൾക്കും കുടുംബാംഗങ്ങൾക്കും അതിൽ നിർണ്ണായകമായ പങ്കുണ്ട്.

മുൻവിധികളില്ലാതെ കേൾക്കുക.

• വീട്ടുജോലികൾ, അപ്പോയിന്റ്മെന്റുകൾ, മറ്റ് ആവശ്യങ്ങൾ തുടങ്ങിയ കാര്യങ്ങളിൽ പ്രായോഗികമായ സഹായം നൽകുക.

• വൈകാരിക വ്യതിയാനങ്ങൾ കാണുമ്പോൾ ക്ഷമയോടെ പെരുമാറുക.

• വിശ്രമിക്കാനും സ്വയം സമയം കണ്ടെത്താനും അവരെ പ്രോത്സാഹിപ്പിക്കുക.

• വിഷമത്തിന്റെ ലക്ഷണങ്ങൾ ശ്രദ്ധിക്കുക, തുറന്നു സംസാരിക്കുക, ആവശ്യമെങ്കിൽ വിദഗ്ദ്ധ സഹായം തേടാൻ നിർദ്ദേശിക്കാം.

എപ്പോൾ സഹായം തേടണം?

താഴെപ്പറയുന്ന ലക്ഷണങ്ങൾ അനുഭവപ്പെടുകയാണെങ്കിൽ ഒരു ഡോക്ടറെയോ, സൈക്കോളജിസ്റ്റിനെയോ, കൗൺസിലറെയോ സമീപിക്കുക:

• നിരന്തരമായ ദുഃഖം അല്ലെങ്കിൽ നിരാശ.

• അതിയായ ഉത്കണ്ഠ അല്ലെങ്കിൽ പരിഭ്രാന്തി.

• ഇഷ്ടപ്പെട്ട കാര്യങ്ങളിൽ താൽപ്പര്യം നഷ്ടപ്പെടുക.

• കുഞ്ഞുമായി മാനസിക അടുപ്പം സ്ഥാപിക്കാൻ ബുദ്ധിമുട്ട് അനുഭവപ്പെടുക.

• സ്വയം ഉപദ്രവിക്കാനോ കുഞ്ഞിനെ ദ്രോഹിക്കാനോ ഉള്ള ചിന്തകൾ.

സഹായം തേടുന്നതിൽ ഒരു ബുദ്ധിമുട്ടും തോന്നേണ്ട കാര്യമില്ല. പ്രയാസങ്ങൾ എത്ര നേരത്തെ പരിഹരിക്കുന്നോ, അത്രയും ഗുണകരമാകും. കൃത്യസമയത്തെ ഇടപെടൽ അമ്മയ്ക്കും കുഞ്ഞിനും ആരോഗ്യവും സ്വസ്ഥതയും ഉറപ്പാക്കുന്നു.

മനസ്സ് ശാന്തമാക്കാം, ആരോഗ്യകരമായി ജീവിക്കാം

ഗർഭകാലം ശാരീരികമായും വൈകാരികമായും ആത്മീയമായും ഒരു വലിയ മാറ്റത്തിന്റെ സമയമാണ്. മാനസികാരോഗ്യം മെച്ചപ്പെടുത്തുന്നത്, മാതൃത്വത്തിലേക്കുള്ള യാത്ര കൂടുതൽ സുന്ദരവും ആനന്ദകരവുമാക്കാൻ കരുത്തേകും.