മാനിക്യൂർ ചെയ്യുകയും  നിറം പുരട്ടി മനോഹരമാക്കുകയും ചെയ്യുമ്പോൾ, നമ്മൾ പൊതുവെ നഖ സൗന്ദര്യത്തിന് മോടികൂട്ടാനാണ് ശ്രമിക്കാറുള്ളത്. നഖങ്ങൾ പൊട്ടുമ്പോഴോ നിറം മാറുമ്പോഴോ നീളം വെയ്ക്കാതെ വരുമ്പോഴോ മാത്രമാണ് പലരും അവയെ ശ്രദ്ധിക്കുന്നത് പോലും. പലപ്പോഴും മാനിക്യൂറിനും നെയിൽ പോളിഷിനും പിന്നിൽ നഖത്തിന്റെ യഥാർത്ഥ അവസ്ഥ നമ്മൾ മറച്ചുവെക്കാറുമുണ്ട്. 

എന്നാൽ വൈദ്യശാസ്ത്ര വീക്ഷണപ്രകാരം, നഖങ്ങൾ സൗന്ദര്യ ഘടകമല്ല. ശരീരത്തിലെ പോഷകാഹാര നില, രക്തചംക്രമണം, ഹോർമോൺ സന്തുലിതാവസ്ഥ, വിട്ടുമാറാത്ത രോഗങ്ങൾ എന്നിവയെ കൃത്യമായി പ്രതിഫലിപ്പിക്കുന്ന ഒന്നാണ് നഖങ്ങൾ.

ശാരീരിക പ്രശ്നങ്ങൾ സംബന്ധിച്ച ലക്ഷണങ്ങൾ പ്രകടമാകുന്നതിനു മുമ്പ് തന്നെ നഖങ്ങൾ ശരീരത്തിലെ മാറ്റങ്ങളെക്കുറിച്ചുള്ള സൂചനകൾ നൽകുന്നു. ഈ ലക്ഷണങ്ങൾ തിരിച്ചറിയാൻ കഴിഞ്ഞാൽ, ഭാവിയിലുണ്ടായേക്കാവുന്ന വലിയ ആരോഗ്യപ്രശ്നങ്ങളെ തടയാൻ നമുക്ക് സാധിക്കും.

നഖങ്ങൾ: ആന്തരിക ആരോഗ്യത്തിലേക്കു തുറക്കുന്ന ജാലകം

കെരാറ്റിൻ (Keratin) എന്ന പ്രോട്ടീൻ കൊണ്ടാണ് നഖങ്ങൾ  നിർമ്മിക്കപ്പെട്ടിരിക്കുന്നത്. നഖങ്ങളുടെ ആരോഗ്യകരമായ വളർച്ചയ്ക്ക് കൃത്യമായ പോഷകാഹാരം, രക്തചംക്രമണം, കോശനവീകരണം എന്നിവ അത്യാവശ്യമാണ്. കൈവിരലുകളിലെ നഖങ്ങൾ വളരെ സാവധാനത്തിൽ, അതായത് മാസത്തിൽ ഏകദേശം 3 മില്ലിമീറ്റർ മാത്രമാണ് വളരുന്നത്. അതുകൊണ്ടുതന്നെ, പെട്ടെന്നുണ്ടാകുന്ന മാറ്റങ്ങളേക്കാൾ ഉപരിയായി, നഖങ്ങൾ നമ്മുടെ ദീർഘകാല ആരോഗ്യസ്ഥിതി വെളിപ്പെടുത്തുന്നു.

ശരീരത്തിൽ അവശ്യ പോഷകങ്ങളുടെ കുറവുണ്ടാകുമ്പോഴോ അല്ലെങ്കിൽ വിട്ടുമാറാത്ത മാനസിക സമ്മർദ്ദത്തിലൂടെ കടന്നുപോകുമ്പോഴോ, നമ്മുടെ ശരീരം മസ്തിഷ്ക്കം, ഹൃദയം തുടങ്ങിയ പ്രധാന അവയവങ്ങൾക്ക് മുൻഗണന നൽകുന്നു. സ്വാഭാവിക സംരക്ഷണപരിധിയ്ക്കപ്പുറത്തേക്ക് കാര്യങ്ങളെത്തുമ്പോഴാണ് ശരീരത്തിലെ പ്രധാന  അവയവങ്ങൾ ലക്ഷണങ്ങൾ പ്രടമാക്കാൻ തുടങ്ങുന്നത്. നിലനിൽപ്പിന് അത്ര അത്യാവശ്യമല്ലാത്ത ഒന്നായതുകൊണ്ട് തന്നെ, പോഷകങ്ങളുടെ കുറവ് ആദ്യം പ്രതിഫലിക്കുന്നത് നഖങ്ങളിലായിരിക്കും.

ചുരുക്കത്തിൽ, ആന്തരികാരോഗ്യത്തെക്കുറിച്ച് വേഗത്തിലും കൃത്യമായും വിവരങ്ങൾ നൽകുന്ന വിശ്വസ്ത സന്ദേശവാഹകരാണ് നഖങ്ങൾ.

നഖങ്ങളിൽ സാധാരണയായി കാണുന്ന മാറ്റങ്ങളും അവയുടെ കാരണങ്ങളും

1. പെട്ടെന്ന് പൊട്ടിപ്പോകുക, വിണ്ടുകീറുക

സ്ത്രീകളിൽ ഏറ്റവും സാധാരണയായി കണ്ടുവരുന്ന പ്രശ്നമാണ് നഖം ദുർബലമാകുകയും പാളികളായി ഇളകുകയും ചെയ്യുന്നത്.

കാരണങ്ങൾ:

• അയേൺ (ഇരുമ്പ്) കുറവ്

• പ്രോട്ടീന്റെ കുറവ്

• ബയോട്ടിൻ (Biotin) അപര്യാപ്തത

• തൈറോയ്ഡ് പ്രശ്നങ്ങൾ

• വീര്യം കൂടിയ കെമിക്കലുകളുടെ (സോപ്പ്, ഡിറ്റർജന്റുകൾ) ഉപയോഗം

നഖങ്ങൾ പൊട്ടിപ്പോകുന്നത് പലപ്പോഴും നമ്മൾ നിസ്സാര കാര്യമായി തള്ളിക്കളയാറുണ്ട്. എന്നാൽ ഇത് ബാഹ്യമായ തകരാറുകൾ മാത്രമല്ല, ശരീരത്തിലെ പോഷകങ്ങളുടെ കുറവിനെ (Nutritional depletion) കൂടിയാണ് സൂചിപ്പിക്കുന്നത്.

2. വിളറിയതോ വെളുത്തതോ ആയ നഖങ്ങൾ

നഖത്തിനടിയിലെ ചർമ്മം (Nail bed) സാധാരണയുള്ള ചുവപ്പ് കലർന്ന നിറത്തിന് പകരം അമിതമായി വിളറിയോ വെളുത്ത നിറത്തിലോ കാണപ്പെടുന്നുണ്ടെങ്കിൽ അത് താഴെ പറയുന്നവയുടെ ലക്ഷണമാകാം:

കാരണങ്ങൾ:

• അയേൺ ഡെഫിഷ്യൻസി അനീമിയ

• ഹീമോഗ്ലോബിന്റെ കുറവ്

• രക്തചംക്രമണത്തിലെ തകരാറുകൾ

• വിട്ടുമാറാത്ത ആരോഗ്യപ്രശ്നങ്ങൾ

ശരീരത്തിൽ രക്തക്കുറവ് ഉണ്ടാകുമ്പോൾ, ഓക്സിജൻ എത്തിക്കുന്നതിന്റെ അളവ് കുറയുന്നു. ഇത് നഖത്തിനടിയിലെ സ്വാഭാവികമായ പിങ്ക് നിറം നഷ്ടപ്പെടാൻ കാരണമാകുന്നു. മിക്കപ്പോഴും ഇതോടൊപ്പം അമിതമായ ക്ഷീണം, ശ്വാസംമുട്ടൽ അല്ലെങ്കിൽ മുടികൊഴിച്ചിൽ എന്നീ ലക്ഷണങ്ങളും കണ്ടുവരാറുണ്ട്.

3. നഖങ്ങളിലെ മഞ്ഞനിറം

നഖങ്ങൾ മഞ്ഞനിറമാകുന്നത് ഫംഗസ് അണുബാധ (Fungal infection) കൊണ്ടാകണമെന്നില്ല. മറ്റുകാരണങ്ങളും ഉണ്ടാകാം.

കാരണങ്ങൾ:

• വിട്ടുമാറാത്ത ഫംഗസ് അണുബാധ

• പുകവലി

• പ്രമേഹം (Diabetes)

• തൈറോയ്ഡ് പ്രശ്നങ്ങൾ

• ശ്വാസകോശ സംബന്ധമായ അസുഖങ്ങൾ

സാധാരണ ചികിത്സകൾ നൽകിയിട്ടും നഖത്തിലെ മഞ്ഞനിറം മാറുന്നില്ലെങ്കിൽ, ആന്തരികമായ മറ്റ് ആരോഗ്യപ്രശ്നങ്ങളെക്കുറിച്ച് കൃത്യമായ പരിശോധനകൾ നടത്തണം.

4. നഖത്തിലെ വെളുത്ത പാടുകൾ (Leukonychia)

നഖത്തിൽ വെളുത്ത പാടുകൾ കാണുന്നത് കാൽസ്യത്തിന്റെ കുറവ് കൊണ്ടാണെന്നാണ് പൊതുവായ ധാരണ. എന്നാൽ എല്ലായ്‌പ്പോഴും അത് ശരിയാകണമന്നില്ല.

കാരണങ്ങൾ:

• സിങ്ക് (Zinc) അപര്യാപ്തത

• ചെറിയ പരിക്കുകൾ

• പ്രോട്ടീന്റെ കുറവ്

ഒന്നിലധികം നഖങ്ങളിൽ ആവർത്തിച്ച് ഇത്തരം വെളുത്ത പാടുകൾ പ്രത്യക്ഷപ്പെടുന്നുണ്ടെങ്കിൽ, അത് ശരീരത്തിലെ സൂക്ഷ്മ പോഷകങ്ങളുടെ (Micronutrients), പ്രത്യേകിച്ച് സിങ്കിന്റെ കുറവിനെയാണ് സൂചിപ്പിക്കുന്നത്.

5. നീളത്തിലുള്ള വരകൾ (Vertical Ridges)

നഖത്തിന്റെ തുടക്കം മുതൽ അഗ്രം വരെ നീളത്തിൽ കാണപ്പെടുന്ന നേർത്ത വരകൾ വാർദ്ധക്യത്തിന്റെ ഭാഗമായി സാധാരണ കണ്ടുവരാറുണ്ട്. എന്നാൽ ഈ വരകൾ ആഴത്തിലുള്ളതാണെങ്കിൽ (Pronounced ridging) അത് താഴെ പറയുന്നവയുടെ സൂചനയാകാം:

കാരണങ്ങൾ:

• അയേൺ (ഇരുമ്പ്) കുറവ്

• വിറ്റാമിൻ B12 കുറവ്

• മഗ്നീഷ്യം (Magnesium) കുറവ്

• നിർജ്ജലീകരണം (Dehydration)

പ്രായമാകുന്നത് ഇതിനൊരു കാരണമാണെങ്കിലും ചെറുപ്പക്കാരിൽ ഇത്തരം വരകൾ കാണപ്പെടുന്നുണ്ടെങ്കിൽ വിദഗ്ധ നിർദ്ദേശം തേടണം.

6. കുറുകെയുള്ള വരകൾ അഥവാ കുഴികൾ (Beau’s Lines)

നഖത്തിന് കുറുകെ (Horizontal) കാണപ്പെടുന്ന ആഴത്തിലുള്ള വരകളും കുഴികളും വളരെ ഗൗരവമായി കാണേണ്ട ഒന്നാണ്.

കാരണങ്ങൾ:

• കഠിനമായ അസുഖങ്ങൾ

• കടുത്ത പനി

• ശസ്ത്രക്രിയ

• പോഷകാഹാരക്കുറവ്

• ഉപാപചയത്തിലുണ്ടാകുന്ന മാറ്റങ്ങൾ

ഈ വരകൾ ശരീരത്തിന് എപ്പോഴാണ് വലിയ രീതിയിലുള്ള സമ്മർദ്ദം (Stress) ഉണ്ടായതെന്ന് കൃത്യമായി കാണിച്ചുതരുന്ന ടൈംസ്റ്റാമ്പുകൾ (Timestamps) പോലെയാണ് പ്രവർത്തിക്കുന്നത്. അതായത്, നഖത്തിലെ വരയുടെ സ്ഥാനം നോക്കിയാൽ, എത്ര മാസങ്ങൾക്ക് മുമ്പാണ് നിങ്ങൾക്ക് ആരോഗ്യപ്രശ്നമുണ്ടായതെന്ന് ഡോക്ടർമാർക്ക് ഏകദേശം മനസ്സിലാക്കാൻ സാധിക്കും.

7. നഖം സ്പൂൺ പോലെ കുഴിഞ്ഞു പോകുക (Koilonychia)

നഖങ്ങൾ സാധാരണ രീതിയിൽ അല്ലാതെ, പുറത്തേക്ക് തള്ളി സ്പൂണിന്റെ ആകൃതിയിൽ കുഴിഞ്ഞു കാണപ്പെടുന്ന അവസ്ഥയാണിത്.

കാരണങ്ങൾ:

• അയേൺ ഡെഫിഷ്യൻസി അനീമിയ

• നിരന്തരമായ രക്തനഷ്ടം

• പോഷകങ്ങൾ ആഗിരണം ചെയ്യപ്പെടുന്നതിലെ തകരാറുകൾ 

നഖത്തിലുണ്ടാകുന്ന ഈ മാറ്റം കേവലം സൗന്ദര്യവർദ്ധക ചികിത്സകൾ കൊണ്ട് മാറ്റാനാകില്ല. കൃത്യമായ വൈദ്യപരിശോധനയും ചികിത്സയും ആവശ്യമുള്ള ലക്ഷണമാണിത്.

8. നഖത്തിലെ കറുത്ത വരകളും കറകളും (Dark Lines)

നഖത്തിനടിയിൽ തവിട്ട് നിറത്തിലോ കറുപ്പ് നിറത്തിലോ ഉള്ള വരകൾ കാണപ്പെടുന്നത് എല്ലായ്‌പ്പോഴും അപകടകരമാകണമെന്നില്ല. ഇരുണ്ട ചർമ്മപ്രകൃതിയുള്ളവർക്കിടയിൽ സ്വാഭാവികമായും ഇങ്ങനെ കണ്ടുവരാറുണ്ട്. എന്നാൽ, പുതിയതായി പ്രത്യക്ഷപ്പെടുന്നതോ മാറ്റങ്ങൾ സംഭവിക്കുന്നതോ ആയ കറുത്ത നിറം നിസ്സാരമായി കാണരുത്.

കാരണങ്ങൾ:

• മെലാനിൻ അംശം(Melanin deposition)

• നഖത്തിനേൽക്കുന്ന പരിക്ക് മൂലം രക്തം കട്ടപിടിക്കുന്നത്

• മരുന്നുകളുടെ പാർശ്വഫലം

• മെലനോമ (Melanoma): വളരെ അപൂർവ്വമാണെങ്കിലും, ഇത് ചർമ്മത്തിലെ അർബുദത്തിന്റെ (Skin cancer) ലക്ഷണമാകാം. ഇതൊരു മെഡിക്കൽ എമർജൻസിയാണ്.

നഖത്തിൽ പെട്ടെന്ന് കറുത്ത വര പ്രത്യക്ഷപ്പെട്ടാൽ ഉറപ്പായും ചികിൽസ തേടേണ്ടതാണ്.

പ്രധാന പോഷകങ്ങളും നഖത്തിന്റെ ആരോഗ്യവും

നമ്മുടെ ഭക്ഷണത്തിലെ പോഷകങ്ങൾ നഖങ്ങളുടെ കരുത്തിനെയും വളർച്ചയെയും എങ്ങനെ ബാധിക്കുന്നു എന്ന് നോക്കാം:

അയേൺ (ഇരുമ്പ്)

ശരീരത്തിലെ ഓക്സിജൻ വിതരണം, നഖത്തിന്റെ ബലം, വളർച്ച എന്നിവയെ അയേൺ അപര്യാപ്തത നേരിട്ട് ബാധിക്കുന്നു. സാധാരണയായി കുറവ് കണ്ടുവരുന്നത്:

• ആർത്തവസമയത്ത് കൂടുതൽ രക്തനഷ്ടം ഉണ്ടാകുന്ന സ്ത്രീകളിൽ

• ഗർഭിണികളിൽ

• പോഷകാഹാരം ശരിയായ രീതിയിൽ ഉൾപ്പെടുത്താത്ത സസ്യഭുക്കുകളിൽ

വിറ്റാമിൻ B12

കോശവിഭജനത്തിനും നാഡീവ്യൂഹത്തിന്റെ ആരോഗ്യത്തിനും ഈ വിറ്റാമിൻ അത്യന്താപേക്ഷിതമാണ്. കുറവുണ്ടായാൽ സംഭവിക്കുന്നത്:

• നഖങ്ങൾ ഇരുണ്ട നിറമാകുക

• വരകൾ പ്രത്യക്ഷപ്പെടുക

• നഖത്തിന്റെ വളർച്ച സാവധാനത്തിലാകുക

സിങ്ക് (Zinc)

ശരീരത്തിലെ കോശങ്ങളുടെയും കോശജാലങ്ങളുടെയും അറ്റകുറ്റപ്പണികൾ നടത്താനും (Tissue repair) വളർച്ചയ്ക്കും സിങ്ക് വലിയ പങ്ക് വഹിക്കുന്നു. കുറവുണ്ടായാൽ സംഭവിക്കുന്നത്:

• നഖങ്ങളിൽ വെളുത്ത പാടുകൾ ഉണ്ടാകുക

• നഖങ്ങൾ പെട്ടെന്ന് പൊട്ടിപ്പോകുക

• നഖത്തിനുണ്ടാകുന്ന മുറിവുകളോ കേടുപാടുകളോ മാറാൻ കാലതാമസമുണ്ടാകുക

 പ്രോട്ടീൻ (Protein)

അടിസ്ഥാനപരമായി നഖങ്ങൾ പ്രോട്ടീൻ കൊണ്ട് നിർമ്മിക്കപ്പെട്ടവയാണ്. അതിനാൽ ഭക്ഷണത്തിൽ പ്രോട്ടീന്റെ അളവ് കുറയുന്നത് നഖങ്ങളെ നേരിട്ട് ബാധിക്കും. പ്രോട്ടീൻ കുറഞ്ഞാൽ സംഭവിക്കുന്നത്:

• നഖങ്ങൾ മൃദുവാകുകയും പാളികളായി ഇളകിപ്പോകുകയും ചെയ്യും

• നഖ വളർച്ച ഗണ്യമായി കുറയും

ബയോട്ടിൻ (Biotin – Vitamin B7)

നഖത്തിന് ഘടന നൽകുന്ന കെരാറ്റിൻ ഉൽപ്പാദനത്തിന് ബയോട്ടിൻ അത്യാവശ്യമാണ്. ശരീരത്തിൽ ഇതിന്റെ അളവ് നേരിയ തോതിൽ കുറയുന്നത് പോലും നഖങ്ങളുടെ ബലം കുറയ്ക്കാനും അവ വേഗത്തിൽ പൊട്ടിപ്പോകാനും കാരണമാകും.

നഖങ്ങൾ, ഹോർമോണുകൾ, മാനസിക സമ്മർദ്ദം

നഖങ്ങളിലെ മാറ്റങ്ങൾ എല്ലായ്പ്പോഴും ഭക്ഷണവുമായി മാത്രം ബന്ധപ്പെട്ടതാകണമെന്നില്ല. ഹോർമോൺ വ്യതിയാനങ്ങളും വിട്ടുമാറാത്ത മാനസിക സമ്മർദ്ദവും (Chronic Stress) ഇതിൽ വലിയ പങ്ക് വഹിക്കുന്നുണ്ട്.

• തൈറോയ്ഡ് ഗ്രന്ഥിയുടെ പ്രവർത്തനത്തിലെ അപാകതകൾ നഖങ്ങൾ പെട്ടെന്ന് പൊട്ടിപ്പോകുന്നതിനും വളർച്ച കുറയുന്നതിനും കാരണമാകുന്നു.

• മാനസിക സമ്മർദ്ദം കൂടുമ്പോൾ ശരീരത്തിൽ കോർട്ടിസോൾ ഹോർമോൺ വർദ്ധിക്കുന്നു. ഇത് പോഷകങ്ങൾ ആഗിരണം ചെയ്യാനുള്ള ശരീരത്തിന്റെ കഴിവിനെ തടസ്സപ്പെടുത്തുന്നു.

• കൃത്യമായ ഉറക്കം ലഭിക്കാത്തത് നഖങ്ങളുടെ വളർച്ചയെയും കോശങ്ങളുടെ അറ്റകുറ്റപ്പണികളെയും (Tissue repair) ബാധിക്കുന്നു

അതുകൊണ്ടുതന്നെയാണ് പലപ്പോഴും സപ്ളിമെൻ്റുകൾ മാത്രം കഴിക്കുന്നത് കൊണ്ട് നഖങ്ങളുടെ പ്രശ്നങ്ങൾ പൂർണ്ണമായി മാറാത്തത്. ജീവിതശൈലിയിലെ മാറ്റങ്ങളും അത്യാവശ്യമാണ്.

നഖങ്ങളിലെ മാറ്റങ്ങൾ ഗൗരവമായി കാണേണ്ടതെപ്പോൾ?

താഴെ പറയുന്ന ലക്ഷണങ്ങൾ ശ്രദ്ധയിൽപ്പെട്ടാൽ ഒരു ഡോക്ടറെ കാണാൻ വൈകരുത്:

• നഖത്തിന്റെ നിറത്തിൽ പെട്ടെന്നു വ്യത്യാസം വന്നാൽ

• നഖത്തിന് ചുറ്റും വേദനയും നീർവീക്കവും

• ഇടയ്ക്കിടെ നഖം സ്പൂൺ പോലെ കുഴിയുകയോ ആഴത്തിലുള്ള വരകൾ വരുകയോ ചെയ്താൽ

• നഖത്തിനടിയിൽ കറുത്ത വരകൾ പെട്ടെന്ന് പ്രത്യക്ഷപ്പെടുകയോ പടരുകയോ ചെയ്താൽ

• നഖത്തിലെ മാറ്റങ്ങളോടൊപ്പം അമിതമായ ക്ഷീണം, ഭാരം കുറയുക, ശ്വാസംമുട്ടൽ എന്നിവ അനുഭവപ്പെട്ടാൽ.

നഖങ്ങൾ ശരീരത്തിനകത്തെ ഗുരുതരമായ പ്രശ്നങ്ങളുടെ സൂചന നൽകും. അതവഗണിക്കുന്നത് രോഗനിർണ്ണയം വൈകാൻ കാരണമാകും.

നഖങ്ങളുടെ ആരോഗ്യം ശരിയായ രീതിയിൽ സംരക്ഷിക്കാം

നഖങ്ങളിലെ പ്രശ്നങ്ങൾ മറച്ചുവെക്കാൻ നെയിൽ പോളിഷുകളെയോ കൃത്രിമ മാർഗ്ഗങ്ങളെയോ (Artificial enhancements) ആശ്രയിക്കുന്നതിന് പകരം, അവയുടെ അടിസ്ഥാനപരമായ ആരോഗ്യത്തിൽ ശ്രദ്ധ കേന്ദ്രീകരിക്കുക:

• അയേൺ, പ്രോട്ടീൻ, മറ്റ് സൂക്ഷ്മ പോഷകങ്ങൾ എന്നിവ അടങ്ങിയ ഭക്ഷണം ശീലമാക്കുക.

• ഭക്ഷണത്തിലെ പോഷകങ്ങൾ ശരീരം ശരിയായി ആഗിരണം ചെയ്യുന്നുണ്ടെന്ന് ഉറപ്പാക്കാൻ ദഹനാരോഗ്യം ശ്രദ്ധിക്കുക.

• മാനസിക സമ്മർദ്ദം കുറയ്ക്കുകയും ദിവസവും കൃത്യമായ സമയത്ത് ഉറങ്ങുകയും ചെയ്യുക.

• ഡോക്ടറുടെ നിർദ്ദേശമില്ലാതെ അമിതമായി പോഷക ഗുളികകൾ കഴിക്കുന്നത് ദോഷം ചെയ്തേക്കാം

• ലക്ഷണങ്ങൾക്കല്ല, അതിന് പിന്നിലെ ആരോഗ്യപ്രശ്നങ്ങൾക്ക് ചികിത്സ തേടുക

നെല്ലിക്ക.ലൈഫ് വീക്ഷണം

നഖങ്ങളിലെ മാറ്റങ്ങളെ വെറും സൗന്ദര്യപ്രശ്നങ്ങളായല്ല, മറിച്ച് നമ്മുടെ ശരീരത്തിന്റെ ജൈവിക സൂചനകളായി (Biological signals) വേണം കാണാൻ. നമ്മുടെ ശരീരം ആന്തരികമായ വെല്ലുവിളികളെ എങ്ങനെ നേരിടുന്നുവെന്നും എവിടെയാണ് പോരായ്മകൾ അനുഭവപ്പെടുന്നതെന്നും ഈ മാറ്റങ്ങൾ വെളിപ്പെടുത്തുന്നു.

നഖങ്ങൾ നൽകുന്ന സൂചനകൾ നേരത്തെ തിരിച്ചറിയുന്നത് വഴി, ചെറിയ അപാകതകൾ വലിയ രോഗങ്ങളായി മാറുന്നതിന് മുമ്പ് തന്നെ നമുക്ക്  പരിഹരിക്കാൻ സാധിക്കും.

ഈ ലേഖനം നഖങ്ങളെക്കുറിച്ചുള്ള കാഴ്ച്ചപ്പാടിൽ വ്യത്യാസം വരുത്തിയെങ്കിൽ, ആരോഗ്യത്തെക്കുറിച്ചുള്ള സമഗ്രവിവരങ്ങൾക്കായി നെല്ലിക്ക.ലൈഫ് സന്ദർശിക്കൂ. അങ്ങനെ,ചെറിയ സൂചനകൾക്കുപോലും അതർഹിക്കുന്ന ഗൌരവം നൽകിക്കൊണ്ട് ആരോഗ്യത്തെ അതിന്റെ പൂർണ്ണരൂപത്തിൽ മനസ്സിലാക്കുന്ന ഒരു സംസ്‌കാരം നമുക്ക് കെട്ടിപ്പടുക്കാം.