“ഡോക്ടർ, എല്ലാം പഠിച്ചതാണ്… പക്ഷേ പരീക്ഷാഹാളിൽ എത്തുമ്പോൾ ഒന്നും ഓർമ്മ കിട്ടുന്നില്ല.”

പരീക്ഷാക്കാലത്ത് ക്ലിനിക്കുകളിൽ എത്തുന്ന വിദ്യാർത്ഥികളിൽ നിന്നും രക്ഷിതാക്കളിൽ നിന്നും ഏറ്റവും കൂടുതൽ കേൾക്കുന്ന ഒരു പരാതിയാണിത്. 

ഒരു പീഡിയാട്രിക് ആൻഡ് അഡോളസെന്റ് എൻഡോക്രൈനോളജിസ്റ്റ് (Pediatric and Adolescent Endocrinologist) എന്ന നിലയിൽ, മാനസിക സമ്മർദ്ദമുണ്ടാക്കുന്ന ഹോർമോണുകളും ഉറക്കമില്ലായ്മയും തെറ്റായ ഭക്ഷണക്രമവുമൊക്കെ എങ്ങനെ കുട്ടികളുടെ ഓർമ്മശക്തിയെ ബാധിക്കുന്നു എന്ന് ഞാൻ നേരിട്ട് കാണാറുണ്ട്.

നമ്മൾ മനസ്സിലാക്കേണ്ട പ്രധാനപ്പെട്ട ഒരു കാര്യമുണ്ട്: ഓർമ്മശക്തി എന്നത് കേവലം ഒരു കഴിവ് എന്നതിനപ്പുറം, നമ്മുടെ ശരീരത്തിലെ ജൈവികമായ പ്രവർത്തനമാണ്. അതിനെ പരിശീലിപ്പിച്ചെടുക്കാനും ജീവിതശൈലിയിലൂടെ മെച്ചപ്പെടുത്താനും സാധിക്കും.

മസ്തിഷ്ക്കം ഓർമ്മകളെ എങ്ങനെയാണ് സൂക്ഷിച്ചുവെയ്ക്കുന്നതെന്ന് നമുക്ക് പരിശോധിക്കാം. ഒപ്പം പരീക്ഷയ്ക്ക് തയ്യാറെടുക്കുമ്പോൾ എന്തെല്ലാം കാര്യങ്ങൾ ശ്രദ്ധിക്കണം എന്നതു സംബന്ധിച്ച് ശാസ്ത്രം പറയുന്നതെന്താണെന്നും നമുക്ക് മനസ്സിലാക്കാം.  

തലച്ചോറിനുള്ളിലെ ഓർമ്മയുടെ പ്രവർത്തനം

നമ്മുടെ തലച്ചോറിൽ ഓർമ്മകൾ രൂപപ്പെടുന്നത് പ്രധാനമായും മൂന്ന് ഘട്ടങ്ങളിലൂടെയാണ്:

1.എൻകോഡിംഗ് അഥവാ ശേഖരണം (Encoding): പുതിയ വിവരങ്ങൾ തലച്ചോർ സ്വീകരിക്കുന്ന ആദ്യ ഘട്ടം.

2.കൺസോളിഡേഷൻ അഥവാ ഏകീകരണം (Consolidation): സ്വീകരിച്ച വിവരങ്ങളെ ദീർഘകാല ഓർമ്മകളായി മാറ്റി തലച്ചോറിൽ ഉറപ്പിക്കുന്ന ഘട്ടം. ഇത് പ്രധാനമായും നടക്കുന്നത് നമ്മൾ ഉറങ്ങുമ്പോഴാണ്.

3.റിട്രീവൽ അഥവാ  അനുസ്മരണം(Retrieval): ആവശ്യമുള്ള സമയത്ത് (ഉദാഹരണത്തിന് പരീക്ഷാഹാളിൽ) പഠിച്ച കാര്യങ്ങൾ കൃത്യമായി ഓർത്തെടുക്കുന്ന രീതി

തലച്ചോറിലെ ഹിപ്പോകാമ്പസ് (Hippocampus) എന്ന ഭാഗമാണ് ഓർമ്മകളെ ഉറപ്പിക്കുന്നതിൽ പ്രധാന പങ്ക് വഹിക്കുന്നത്. എന്നാൽ പരീക്ഷാ പേടി കാരണം ശരീരത്തിൽ കോർട്ടിസോൾ (Cortisol) എന്ന സ്ട്രെസ് ഹോർമോൺ അമിതമായി ഉത്പാദിപ്പിക്കപ്പെടുമ്പോൾ, അത് ഹിപ്പോകാമ്പസിന്റെ പ്രവർത്തനത്തെ തടസ്സപ്പെടുത്തുന്നു. പരീക്ഷാഹാളിൽ ഇരിക്കുമ്പോൾ പെട്ടെന്ന് എല്ലാം മറന്നുപോകുന്നതിന് (Blanking out) പ്രധാന കാരണം ഇതാണ്.

ഓർമ്മശക്തി കേവലം ബുദ്ധിശക്തിയുമായി മാത്രം ബന്ധപ്പെട്ട ഒന്നല്ല. താഴെ പറയുന്ന കാര്യങ്ങൾ കൃത്യമായി ക്രമീകരിച്ചാൽ ആർക്കും ഓർമ്മശക്തി വർദ്ധിപ്പിക്കാം:

• തലച്ചോറിലെ രാസപ്രവർത്തനങ്ങൾ

• ഉറക്കം

• സമ്മർദ്ദ നിയന്ത്രണം

• പഠന രീതി

1. ആക്ടീവ് റീകോൾ: പഠനത്തിലെ ഏറ്റവും കരുത്തുറ്റ ആയുധം

പഠിച്ച കാര്യങ്ങൾ വീണ്ടും ഓർത്തെടുക്കാൻ ശ്രമിക്കുന്നതാണ് വെറുതെ വായിച്ചു പോകുന്നതിനേക്കാൾ ഗുണകരമെന്ന് വിദ്യാഭ്യാസ മനഃശാസ്ത്രത്തിലെ (Cognitive Psychology) പഠനങ്ങൾ 

സൂചിപ്പിക്കുന്നു. ‘ടെസ്റ്റിംഗ് ഇഫക്റ്റ്’ (Testing Effect) എന്നും ഇതറിയപ്പെടുന്നു.

പഠിക്കാനുള്ളവ ആവർത്തിച്ച് വായിക്കുന്നതിന് പകരം വിദ്യാർത്ഥികൾ താഴെ പറയുന്നവ പരീക്ഷിക്കുക:

• ഒരു ഭാഗം വായിച്ചു കഴിഞ്ഞാൽ പുസ്തകം അടച്ചു വെച്ച് നിങ്ങൾ ഓർക്കുന്ന കാര്യങ്ങൾ ഒരു പേപ്പറിൽ എഴുതാൻ ശ്രമിക്കുക

• പ്രധാനപ്പെട്ട സൂത്രവാക്യങ്ങളും (Formulas) തീയതികളും ഫ്ലാഷ് കാർഡുകളിൽ (Flashcards) എഴുതി സ്വയം ചോദിച്ചു പഠിക്കുക

• മുൻവർഷങ്ങളിലെ ചോദ്യപേപ്പറുകൾക്ക് ഉത്തരം കണ്ടെത്താൻ ശ്രമിക്കുന്നത് ആത്മവിശ്വാസം വർദ്ധിപ്പിക്കും

• പുസ്തകത്തിലേക്ക് നോക്കാതെ ഓരോ പാഠഭാഗവും സ്വയം പറഞ്ഞു നോക്കുക

ഓരോ തവണയും നമ്മൾ ഒരു വിവരം ഓർത്തെടുക്കാൻ ശ്രമിക്കുമ്പോൾ, തലച്ചോറിലെ നാഡീവ്യൂഹങ്ങൾ (Neural Pathways) കൂടുതൽ ശക്തമാകുന്നു. ഇത് പരീക്ഷാഹാളിലെ സമ്മർദ്ദത്തിനിടയിലും വിവരങ്ങൾ വേഗത്തിലും കൃത്യമായും ഓർത്തെടുക്കാൻ തലച്ചോറിനെ പ്രാപ്തമാക്കുന്നു.

2. സ്പേസ്ഡ് റെപ്പിറ്റീഷൻ: ദീർഘകാല ഓർമ്മശക്തി വർദ്ധിപ്പിക്കാൻ

പരീക്ഷാത്തലേന്ന് എല്ലാം കൂടി ഒറ്റയടിക്ക് പഠിച്ചു തീർക്കുന്നത് (Cramming) നമ്മുടെ ഹ്രസ്വകാല ഓർമ്മയെ (Short-term memory) അമിതമായി തളർത്തും. ഇത് വിവരങ്ങൾ തലച്ചോറിൽ സ്ഥിരമായി നിൽക്കാൻ സഹായിക്കില്ല.

മറവി എന്ന പ്രതിഭാസത്തെ (Forgetting Curve) മറികടക്കാൻ തലച്ചോറിനെ സഹായിക്കുന്ന രീതിയാണ് സ്പേസ്ഡ് റെപ്പിറ്റീഷൻ. കൃത്യമായ ഇടവേളകളിൽ വിവരങ്ങൾ വീണ്ടും ഓർത്തെടുക്കുന്നതിലൂടെ അത് ദീർഘകാല ഓർമ്മയായി മാറുന്നു.

ഉദാഹരണത്തിന്:

• ഒന്നാം ദിവസം: പുതിയ പാഠഭാഗം പഠിക്കുന്നു

• മൂന്നാം ദിവസം: പഠിച്ച കാര്യങ്ങൾ ഒരിക്കൽ കൂടി ഓടിച്ചു നോക്കുന്നു

• ഏഴാം ദിവസം: വീണ്ടും അത് നോക്കി ഒന്നുകൂടി പഠിക്കുന്നു

• പതിനാലാം ദിവസം: പുസ്തകം നോക്കാതെ സ്വയം പരീക്ഷിക്കുന്നു

ഓരോ തവണയും കൃത്യമായ ഇടവേളകളിൽ വിവരങ്ങൾ ഓർത്തെടുക്കുമ്പോൾ തലച്ചോറിലെ കോശങ്ങൾ തമ്മിലുള്ള ബന്ധം (Synaptic Connections) കൂടുതൽ ശക്തമാകുന്നു. ഇത് പരീക്ഷാഹാളിലെ സമ്മർദ്ദത്തിനിടയിലും വിവരങ്ങൾ മറന്നുപോകാതിരിക്കാൻ സഹായിക്കുന്നു.

3. ഉറക്കം: ഓർമ്മശക്തി വർദ്ധിപ്പിക്കുന്ന അദൃശ്യ സഹായി

പഠനത്തിനായി ഉറക്കം ഉപേക്ഷിക്കുന്നത് നല്ലതാണെന്ന് പലരും കരുതാറുണ്ട്. എന്നാൽ,  നമ്മൾ സ്വസ്ഥമായി ഉറങ്ങുമ്പോഴാണ്, പഠിച്ച കാര്യങ്ങൾ ദീർഘകാല ഓർമ്മകളായി മാറുന്നത് (Memory Consolidation). പ്രത്യേകിച്ച് ‘ഡീപ് സ്ലീപ്പ്’ (Deep sleep), ‘റെം സ്ലീപ്പ്’ (REM sleep) എന്നീ ഘട്ടങ്ങൾ ഓർമ്മശക്തിക്ക് അതിപ്രധാനമാണ്.

വൈദ്യശാസ്ത്ര പഠനങ്ങൾ പറയുന്നത്:

• 6 മണിക്കൂറിൽത്താഴെ മാത്രം ഉറങ്ങുന്ന വിദ്യാർത്ഥികളിൽ കാര്യങ്ങൾ ഓർത്തെടുക്കാനുള്ള കഴിവ് (Recall accuracy) വളരെ കുറവാണെന്ന് പഠനങ്ങൾ തെളിയിക്കുന്നു

• പരീക്ഷയുടെ തലേന്ന് രാത്രി മുഴുവൻ ഉറക്കമിളച്ച് പഠിക്കുന്നത് ശരീരത്തിൽ കോർട്ടിസോൾ എന്ന സ്ട്രെസ് ഹോർമോൺ വർദ്ധിപ്പിക്കും. ഇത് പരീക്ഷാഹാളിൽ കാര്യങ്ങൾ പെട്ടെന്ന് മറന്നുപോകാൻ കാരണമാകും.

വിദ്യാർത്ഥികൾ ചെയ്യേണ്ടത്:

• എല്ലാ ദിവസവും7 മുതൽ 9 മണിക്കൂർ വരെ  ഉറങ്ങാൻ ശ്രമിക്കുക

• പരീക്ഷയുടെ തലേദിവസം നന്നായുറങ്ങണം. ഇത് മസ്തിഷ്ക്കത്തെ കൂടുതൽ ഉന്മേഷത്തോടെ പ്രവർത്തിക്കാൻ സഹായിക്കും

ഉറങ്ങിയാൽ പഠിക്കാനുള്ള സമയം നഷ്ടപ്പെടുമെന്നത് മിഥ്യാധാരണയാണ്, നിങ്ങൾ പഠിച്ച കാര്യങ്ങൾ തലച്ചോറിൽ ഉറപ്പിക്കുന്ന പ്രക്രിയയാണ് ഉറക്കത്തിൽ നടക്കുക.

4. വ്യായാമം: തലച്ചോറിന്റെ പ്രവർത്തനക്ഷമത വർദ്ധിപ്പിക്കാൻ

ശാരീരികമായ അധ്വാനം നമ്മുടെ തലച്ചോറിൽ ബി ഡി എൻ എഫ് (Brain-Derived Neurotrophic Factor) എന്ന ഒരു പ്രത്യേക പ്രോട്ടീൻ ഉത്പാദിപ്പിക്കാൻ സഹായിക്കുന്നു. തലച്ചോറിലെ കോശങ്ങളെ വളരാനും പുതിയ കാര്യങ്ങൾ വേഗത്തിൽ പഠിക്കാനും സഹായിക്കുന്ന ഒരു പോഷകമായി ഇതിനെ വിശേഷിപ്പിക്കാം.

ബി ഡി എൻ എഫ് എങ്ങനെയെല്ലാം സഹായിക്കുന്നു?

• പുതിയ കാര്യങ്ങൾ വേഗത്തിൽ ഗ്രഹിക്കാൻ തലച്ചോറിനെ പ്രാപ്തമാക്കുന്നു

• തലച്ചോറിലെ നാഡീവ്യൂഹങ്ങൾ തമ്മിലുള്ള ബന്ധം ശക്തമാക്കുന്നതിലൂടെ പഠിച്ച കാര്യങ്ങൾ ദീർഘകാലം ഓർമ്മയിൽ നിൽക്കുന്നു

• ചിന്താശേഷി വർദ്ധിപ്പിക്കുന്നു

ദിവസവും 20–30 മിനിറ്റ് വേഗത്തിൽ നടക്കുക (Brisk walking), സൈക്ലിംഗ്, അല്ലെങ്കിൽ സ്കിപ്പിംഗ് എന്നിവയിലേതെങ്കിലും ചെയ്യാം. ദീർഘനേരം ഒരേയിരുപ്പിൽ പഠിക്കാതെ ഇടയ്ക്ക് എഴുന്നേറ്റ് നടക്കുന്നത് തലച്ചോറിലേക്കുള്ള രക്തയോട്ടം വർദ്ധിപ്പിക്കും. ശരീരം ചലിക്കുമ്പോൾ നിങ്ങളുടെ തലച്ചോറും കൂടുതൽ ഉന്മേഷത്തോടെ പ്രവർത്തിക്കാൻ തയ്യാറെടുക്കുന്നു.

5. പോഷകാഹാരം: ബുദ്ധിശക്തിയെ സ്വാധീനിക്കുന്ന ഇന്ധനം

നമ്മുടെ ശരീരത്തിലെ മൊത്തം ഊർജ്ജത്തിന്റെ ഏകദേശം 20 ശതമാനവും ഉപയോഗിക്കുന്നത് തലച്ചോറാണ്. അതുകൊണ്ട് തന്നെ നമ്മൾ കഴിക്കുന്ന ഭക്ഷണം ചിന്താശേഷിയെയും ഓർമ്മശക്തിയെയും നേരിട്ട് ബാധിക്കുന്നു.

രക്തത്തിലെ പഞ്ചസാരയുടെ (Glucose) അളവ് കൃത്യമായി നിലനിർത്തുന്നത് ഏകാഗ്രത വർദ്ധിപ്പിക്കാൻ സഹായിക്കും. മധുരം അമിതമായടങ്ങിയ ഭക്ഷണങ്ങൾ കഴിക്കുമ്പോൾ ഊർജ്ജം പെട്ടെന്ന് കൂടുകയും പിന്നീട് ദ്രുതഗതിയിൽ കുറയുകയും ചെയ്യുന്നത് ശ്രദ്ധ കേന്ദ്രീകരിക്കുന്നതിനെ ദോഷകരമായി ബാധിക്കും.

തലച്ചോറിന് ഗുണകരമായ ഭക്ഷണങ്ങൾ:

• നട്സ് (Nuts): പ്രത്യേകിച്ച് വാൾനട്ട് (Walnut)

• മുട്ട (Eggs)

• മത്സ്യം

• പഴങ്ങളും പച്ചക്കറികളും

ഒഴിവാക്കേണ്ടവ:

• എനർജി ഡ്രിങ്കുകൾ

• അമിതമായ അളവിലുള്ള കഫീൻ

• രാത്രി വൈകി പഠിക്കുമ്പോൾ മധുരപലഹാരങ്ങൾ ഒഴിവാക്കുക

ശരീരത്തിൽ വെള്ളത്തിന്റെ അളവ് നേരിയ തോതിൽ കുറയുന്നത് പോലും ഓർമ്മശക്തിയെയും ഏകാഗ്രതയെയും ബാധിക്കും. പഠനത്തിനിടയിൽ ധാരാളം വെള്ളം കുടിക്കാൻ ശ്രദ്ധിക്കുക.

6. സമ്മർദ്ദം കുറയ്ക്കാം; ഓർമ്മശക്തി വീണ്ടെടുക്കാം

നമ്മൾ അമിതമായി പരിഭ്രമിക്കുമ്പോൾ ശരീരത്തിലെ സിംപതെറ്റിക് നെർവസ് സിസ്റ്റം (Sympathetic Nervous System) ഉണരുകയും ശരീരം ഒരു പോരാട്ടത്തിന് തയ്യാറെടുക്കുന്നതുപോലെയുള്ള അവസ്ഥയിൽ (Fight-or-flight response) എത്തുകയും ചെയ്യുന്നു. ഈ സമയത്ത് ഉത്പാദിപ്പിക്കപ്പെടുന്ന കോർട്ടിസോൾ എന്ന ഹോർമോൺ പഠിച്ച കാര്യങ്ങൾ ഓർത്തെടുക്കുന്ന  പ്രക്രിയയെ താൽക്കാലികമായി തടസ്സപ്പെടുത്തുന്നു.

നന്നായി പഠിച്ചിട്ടും പരീക്ഷാഹാളിൽ എത്തുമ്പോൾ പെട്ടെന്ന്, എല്ലാം മറന്നുപോയി എന്ന് തോന്നുന്നതിന്റെ (Blanking out) പ്രധാന കാരണം ഇതാണ്.

സമ്മർദ്ദം കുറയ്ക്കാനുള്ള ചില മാർഗ്ഗങ്ങൾ:

• 4-7-8 ശ്വസന രീതി

• മൈൻഡ്ഫുൾനെസ് (Mindfulness) അഥവാ മനോനിറവ്

• മോക്ക് ടെസ്റ്റുകൾ (Mock Tests)

• പോസിറ്റീവ് ചിന്തകൾ

യഥാർത്ഥ പരീക്ഷാ സാഹചര്യത്തിന് സമാനമായ രീതിയിൽ വീട്ടിലിരുന്ന് പരിശീലിക്കുന്നത് പരീക്ഷാസമയത്തെ ശാരീരിക സമ്മർദ്ദം കുറയ്ക്കാൻ സഹായിക്കും.

7. പഠിച്ച കാര്യങ്ങൾ മറ്റൊരാൾക്ക് പറഞ്ഞുകൊടുക്കാം

പ്രശസ്ത ശാസ്ത്രജ്ഞനായ റിച്ചാർഡ് ഫെയ്ൻമാന്റെ പേരിൽ അറിയപ്പെടുന്ന ‘ഫെയ്ൻമാൻ ടെക്നിക്’ (The Feynman Technique) അനുസരിച്ച്, ഒരു കാര്യം ലളിതമായ വാക്കുകളിൽ മറ്റൊരാൾക്ക് വിശദീകരിച്ചു കൊടുക്കുന്നത്, നമ്മുടെ തലച്ചോറിൽ അതാഴത്തിൽ പതിയാൻ സഹായിക്കുന്നു.

നമ്മൾ ഒരു കാര്യം മറ്റൊരാൾക്ക് പറഞ്ഞുകൊടുക്കുമ്പോൾ, സങ്കീർണ്ണമായ വിവരങ്ങളെ ലളിതമാക്കാൻ നമ്മുടെ തലച്ചോർ കഠിനമായി പരിശ്രമിക്കുന്നു. ഈ പ്രക്രിയയിലൂടെ പഠിച്ച കാര്യങ്ങൾ തലച്ചോറിലെ നാഡീവ്യൂഹങ്ങളിൽ (Neural Pathways) കൂടുതൽ ശക്തമായി ഉറയ്ക്കുകയും (Consolidation) പിന്നീട് എളുപ്പത്തിൽ ഓർത്തെടുക്കാൻ സാധിക്കുകയും ചെയ്യുന്നു.

വിദ്യാർത്ഥികൾക്ക് ചെയ്യാവുന്ന കാര്യങ്ങൾ:

• കൂട്ടുകാരെ പഠിപ്പിക്കുക (Peer Teaching)

• പഠിച്ച കാര്യങ്ങൾ ശബ്ദമുയർത്തി പറഞ്ഞു നോക്കുക

• വീട്ടിലുള്ളവർക്ക് മനസ്സിലാകുന്ന രീതിയിൽ ലളിതമായി പറഞ്ഞു കൊടുക്കാൻ ശ്രമിക്കുക

8. എപ്പോഴാണ് വിദഗ്ദ്ധ സഹായം തേടേണ്ടത്?

മിക്ക കുട്ടികൾക്കും പരീക്ഷാസമയത്ത് ചെറിയ ഉത്കണ്ഠ ഉണ്ടാകുന്നത് സ്വാഭാവികമാണ്. എന്നാൽ താഴെ പറയുന്ന ലക്ഷണങ്ങൾ കാണുന്നുണ്ടെങ്കിൽ ഒരു ഡോക്ടറുടെയോ കൗൺസിലറുടെയോ സഹായം തേടുന്നത് നന്നായിരിക്കും:

• അമിതമായ പരിഭ്രാന്തി (Persistent Panic): പരീക്ഷയ്ക്ക് മുൻപ് വല്ലാത്ത പേടിയും വെപ്രാളവും

• ഉറക്കമില്ലായ്മ: ദിവസങ്ങളോളം നീണ്ടുനിൽക്കുന്ന കഠിനമായ ഉറക്കക്കുറവ്

• ഏകാഗ്രത കുറവ്: ആഴ്ചകളോളം ഒരു കാര്യത്തിലും ശ്രദ്ധ കേന്ദ്രീകരിക്കാൻ കഴിയാത്ത അവസ്ഥ

• ശാരീരിക ലക്ഷണങ്ങൾ: കൈകാൽ വിറയൽ, അമിതമായ നെഞ്ചിടിപ്പ്, ശ്വാസംമുട്ടൽ, അല്ലെങ്കിൽ ഓക്കാനം (Nausea)

എന്തുകൊണ്ടാണ് ഇങ്ങനെ സംഭവിക്കുന്നത്?

• ഉത്കണ്ഠാ രോഗങ്ങൾ (Anxiety Disorders)

• ഉറക്കത്തകരാറുകൾ (Sleep Disorders)

• ഹോർമോൺ വ്യതിയാനങ്ങൾ

• പോഷകാഹാരക്കുറവ്

ലക്ഷണങ്ങൾ തുടക്കത്തിലേ തിരിച്ചറിഞ്ഞ് വിദഗ്ദ്ധ സഹായം തേടുന്നത് കുട്ടികളുടെ പഠനമികവ് വർദ്ധിപ്പിക്കാനും അവരുടെ മാനസികാരോഗ്യം സംരക്ഷിക്കാനും സഹായിക്കും.

9. ‘മെമ്മറി ബൂസ്റ്ററുകൾ’ (Memory Boosters) ഫലപ്രദമാണോ?

ലഭ്യമായ മെഡിക്കൽ പഠനങ്ങൾ അനുസരിച്ച്, പൂർണ്ണ ആരോഗ്യവാനായ ഒരു വിദ്യാർത്ഥിക്ക് ഇത്തരം സപ്ലിമെന്റുകൾ കൊണ്ട് ഓർമ്മശക്തിയിൽ വലിയ മാറ്റങ്ങൾ ഉണ്ടാകുമെന്ന് തെളിയിക്കപ്പെട്ടിട്ടില്ല.

ഒമേഗ-3 ഗുളികകൾ ഒരു പരിധിവരെ സഹായിച്ചേക്കാം. എന്നാൽ ഭക്ഷണത്തിലൂടെ (മത്സ്യം, നട്സ് എന്നിവ) ഇത് ലഭ്യമാക്കുന്നതാണ് ഏറ്റവും ഉചിതം.

എത്ര നല്ല സപ്ലിമെന്റ് കഴിച്ചാലും അതൊന്നും സ്വസ്ഥമായ ഉറക്കത്തിനും കൃത്യമായ പഠനരീതിക്കും  വ്യായാമത്തിനും സമ്മർദ്ദനിയന്ത്രണത്തിനും  പകരമാകില്ല.

ഏതെങ്കിലും തരത്തിലുള്ള വിറ്റാമിൻ ഗുളികകളോ സപ്ലിമെന്റുകളോ കഴിക്കുന്നതിന് മുൻപ് നിർബന്ധമായും ഒരു ഡോക്ടറുടെ അഭിപ്രായം തേടണം. സ്വയം ചികിത്സ ഒഴിവാക്കുകയാണ് എപ്പോഴും നല്ലത്.

വിദ്യാർത്ഥികളോടും രക്ഷിതാക്കളോടും ഒരു വാക്ക്

സ്വയം കൂടുതൽക്കൂടുതൽ സമ്മർദ്ദം ചെലുത്തിക്കൊണ്ട് പ്രവർത്തിക്കുന്നത് ഓർമ്മശക്തി കൂട്ടാൻ സഹായകമാകില്ല. 

നമ്മുടെ ശരീരത്തിന്റെ ജൈവികമായ പ്രത്യേകതകൾ മനസ്സിലാക്കി ബുദ്ധിപൂർവ്വം പ്രവർത്തിക്കുകയാണ് വേണ്ടത്.

വിദ്യാർത്ഥികൾ താഴെ പറയുന്ന കാര്യങ്ങൾ കൃത്യമായി ഏകോപിപ്പിക്കുമ്പോൾ:

✔ പഠന രീതി (Study Strategy): ആക്ടീവ് റീകോൾ പോലുള്ള ശാസ്ത്രീയ രീതികൾ

✔ ഉറക്കം (Sleep): തലച്ചോറിന് ആവശ്യമായ വിശ്രമം

✔ പോഷകാഹാരം (Nutrition): ബുദ്ധിശക്തിക്ക് ആവശ്യമായ ഇന്ധനം

✔ കായികാധ്വാനം (Physical Activity): തലച്ചോറിന്റെ ഉന്മേഷത്തിന് വ്യായാമം

✔ വികാര നിയന്ത്രണം (Emotional Regulation): സമ്മർദ്ദമില്ലാത്ത ശാന്തമായ മനസ്സ്

ഇതുവഴി കുട്ടികളുടെ ഓർമ്മശക്തി വർദ്ധിക്കുന്നതോടൊപ്പം ആത്മവിശ്വാസവും വളർത്തിയെടുക്കാനാകുന്നു.

ഓർക്കുക, പരീക്ഷകൾ നിങ്ങളുടെ ഓർമ്മിച്ചെടുക്കാനുള്ള കഴിവിനെ അളക്കുകയാണ് ചെയ്യുന്നത്. എന്നാൽ കൃത്യമായ തയ്യാറെടുപ്പ്, നിങ്ങളുടെ തലച്ചോറിനെ കൂടുതൽ കരുത്തുറ്റതാക്കും.