പ്രമേഹം എന്നത് രോഗലക്ഷണങ്ങൾ പ്രകടമാകുമ്പോൾ മാത്രം ഒന്നുരണ്ടു ദിവസത്തേക്ക്  ശ്രദ്ധ നൽകുകയും പിന്നീട് അവഗണിക്കുകയും ചെയ്യേണ്ട ഒരു കാര്യമല്ല, അത്  ജീവിതകാലം മുഴുവൻ ശ്രദ്ധ നൽകേണ്ട ഒരവസ്ഥയാണ്. 

പ്രമേഹം ഉണ്ടെന്ന് ആദ്യമായി അറിയുമ്പോൾ ആളുകൾക്ക് വല്ലാത്തൊരു പ്രയാസം തോന്നാം. ഭക്ഷണക്രമം, ജീവിതശൈലി, മരുന്നുകൾ, ഭാവിജീവിതം… ഇങ്ങനെ നൂറുകണക്കിന് ചോദ്യങ്ങൾ മനസ്സിലേക്ക് കടന്നുവരും. എന്നാൽ നമ്മളെല്ലാവരും തിരിച്ചറിയേണ്ട ഒരു യാഥാർത്ഥ്യമുണ്ട്: ശരിയായ പരിചരണത്തിലൂടെ, പ്രമേഹമുള്ളവർക്കും ദീർഘവും ആരോഗ്യകരവും സംതൃപ്തവുമായ ജീവിതം നയിക്കാൻ കഴിയും. ഈ യാത്ര നിയന്ത്രണങ്ങളെക്കുറിച്ച് മാത്രമുള്ളതല്ല; അത് സന്തുലിതാവസ്ഥയെക്കുറിച്ചും കൃത്യമായ അവബോധമുണ്ടാകേണ്ടതിനെക്കുറിച്ചും ആരോഗ്യം സംരക്ഷിക്കുന്നതിന് വേണ്ടിയുള്ള ദിനചര്യകളെക്കുറിച്ചും കൂടിയാണ്.

പ്രമേഹ പരിചരണം എങ്ങനെ വേണം? 

പ്രമേഹ ചികിത്സ എല്ലാവർക്കും ഒരേ തരത്തിലല്ല. ഓരോ വ്യക്തിയുടെയും ശാരീരിക പ്രത്യേകതകൾ, ജീവിതശൈലി, ആവശ്യങ്ങൾ എന്നിവ വ്യത്യസ്തമാണ്. അതിനനുസരിച്ചുള്ള പരിചരണമാണ് വേണ്ടത്. രക്തത്തിലെ പഞ്ചസാരയുടെ അളവ് ആരോഗ്യകരമായ പരിധിക്കുള്ളിൽ നിലനിർത്തുക, സങ്കീർണ്ണതകൾ തടയുക, ജീവിത നിലവാരം മെച്ചപ്പെടുത്തുക എന്നിവയാണ് ചികിത്സയുടെ ലക്ഷ്യം.

പ്രമേഹ പരിചരണം മൂന്ന് പ്രധാന ഘടകങ്ങളിൽ അധിഷ്ഠിതമാണ്:

1. മരുന്നുകളും ഇൻസുലിൻ തെറാപ്പിയും

1.ടൈപ്പ് 1 പ്രമേഹത്തിന് ദിവസേനയുള്ള ഇൻസുലിൻ ആവശ്യമാണ്. ടൈപ്പ് 2 പ്രമേഹത്തിന് അകത്തേക്ക് കഴിക്കാനുള്ള മരുന്നുകൾ, ഇൻസുലിൻ അല്ലെങ്കിൽ ഇവ രണ്ടും വേണ്ടിവന്നേക്കാം.

2.സ്മാർട്ട് ഇൻസുലിൻ പേനകളും പമ്പുകളും ഇപ്പോൾ ജീവിതം കൂടുതൽ എളുപ്പമാക്കുന്നുണ്ട്, മികച്ച ഗ്ളൂക്കോസ് നിയന്ത്രണം ഉറപ്പു വരുത്തുന്നതിനോടൊപ്പം ഇവ കൂടുതൽ സൗകര്യപ്രദവുമാണ്.

2. പോഷകാഹാരവും ഭക്ഷണക്രമവും

1.ധാന്യങ്ങൾ, പച്ചക്കറികൾ, കൊഴുപ്പ് കുറഞ്ഞ മാംസങ്ങൾ, ആരോഗ്യകരമായ കൊഴുപ്പുകൾ എന്നിവയടങ്ങിയ സമീകൃതാഹാരം വളരെ പ്രധാനമാണ്.

2. ആഹാരത്തിൻറെ അളവ് നിയന്ത്രിക്കുന്നതും കാർബോഹൈഡ്രേറ്റ് തിട്ടപ്പെടുത്തുന്നതും ഷുഗർ ലെവൽ സ്ഥിരപ്പെടുത്താൻ സഹായിക്കും.

3. ഇഷ്ടവിഭവങ്ങൾ പാടേ  ഒഴിവാക്കേണ്ടതില്ല – മിതമായ രീതിയിൽ വല്ലപ്പോഴും കഴിക്കാം.

3. ശാരീരിക പ്രവർത്തനങ്ങൾ

1.പതിവായ വ്യായാമം ഇൻസുലിൻ സംവേദനക്ഷമത വർദ്ധിപ്പിക്കുകയും ഹൃദയത്തെ ശക്തിപ്പെടുത്തുകയും ചെയ്യുന്നു.

2.ഭക്ഷണം കഴിച്ചതിന് ശേഷം അൽപ്പം നടക്കുകയോ യോഗ ചെയ്യുകയോ ചെയ്യുന്നത് പോലുള്ള ചെറിയ കാര്യങ്ങൾ പോലും വലിയ മാറ്റങ്ങൾ സൃഷ്ടിക്കും.

സാങ്കേതികവിദ്യയും ഗ്ളൂക്കോസ് നിരീക്ഷണവും

സ്വയം ഗ്ലൂക്കോസ് നിരീക്ഷിക്കുന്നതിനുള്ള ഉപകരണങ്ങളും (SMBG), കണ്ടിന്യൂവസ് ഗ്ലൂക്കോസ് മോണിറ്ററുകളും (CGM) പ്രമേഹരോഗികൾക്ക് വലിയ ആശ്വാസം നൽകുന്നു. ഇവ അപ്പപ്പോഴുള്ള വിവരങ്ങൾ നൽകുന്നതിനൊപ്പം, രക്തത്തിലെ പഞ്ചസാരയുടെ അളവിലെ മാറ്റങ്ങൾ മുൻകൂട്ടി അറിയാനും സഹായിക്കുന്നു. ഇതോടൊപ്പം, ആർട്ടിഫിഷ്യൽ ഇന്റലിജൻസ് ഉപയോഗിച്ചുള്ള ആപ്പുകൾ കൂടിയാകുമ്പോൾ,  പ്രമേഹ നിയന്ത്രണം കൂടുതൽ ആത്മവിശ്വാസത്തോടെ കൈകാര്യം ചെയ്യാൻ രോഗികൾക്ക് കഴിയും.

വൈകാരിക വശം

പ്രമേഹവുമായി ജീവിക്കുന്നത് ശാരീരികാരോഗ്യത്തെക്കുറിച്ചുള്ള സന്ദേഹത്തോടൊപ്പം, നിരന്തരമായ നിരീക്ഷണം, രോഗം സങ്കീർണ്ണമാകുമോ എന്ന ഭയം, ഭക്ഷണ നിയന്ത്രണങ്ങൾ എന്നീ ഘടകങ്ങളെല്ലാം മാനസികാരോഗ്യത്തെ ബാധിച്ചേക്കാം.

• സപ്പോർട്ട് ഗ്രൂപ്പുകൾ, കൗൺസിലിംഗ്, മൈൻഡ്ഫുൾനെസ് പരിശീലനങ്ങൾ എന്നിവ മാനസിക സമ്മർദ്ദം കുറയ്ക്കാൻ സഹായിക്കും.

• കുടുംബാംഗങ്ങളുടെ പിന്തുണയും വളരെ പ്രധാനമാണ് – അവരുടെ സഹായം സ്വയം പരിചരണം തുടരാൻ കൂടുതൽ എളുപ്പമാക്കും.

പതിവായ പരിശോധനകൾ വേണം: പ്രതിരോധമാണ് ശക്തി

പ്രമേഹം കാലക്രമേണ കണ്ണുകൾ, വൃക്കകൾ, ഹൃദയം, നാഡികൾ എന്നിവയെ നിശ്ശബ്ദമായി ബാധിച്ചേക്കാം. പതിവായുള്ള പരിശോധനകൾ വളരെ നിർണായകമാകുന്നത് അതുകൊണ്ടാണ് :

• റെറ്റിനോപ്പതി കണ്ടെത്താനുള്ള നേത്ര പരിശോധനകൾ

• വൃക്കകളുടെ പ്രവർത്തനം പരിശോധിക്കാനുള്ള ടെസ്റ്റുകൾ

• പാദ സംരക്ഷണവും ന്യൂറോപ്പതി പരിശോധനയും

• ഹൃദയാരോഗ്യം അറിയാനുള്ള പരിശോധനകൾ

ഈ പ്രതിരോധ നടപടികൾ സങ്കീർണ്ണതകളെ നേരത്തെ കണ്ടെത്തുന്നതിനുള്ള ഏറ്റവും നല്ല മാർഗ്ഗമാണ്, ഒപ്പം ഇത് ഭാവിജീവിതത്തിന്  സംരക്ഷണമൊരുക്കുകയും ചെയ്യും.

പ്രമേഹത്തോടൊപ്പം ജീവിക്കാം, സ്ഥസ്ഥമായിത്തന്നെ 

പ്രമേഹമുണ്ടെന്ന് കരുതി സ്വപ്നങ്ങളോടും യാത്രകളോടും ആഘോഷങ്ങളോടും ‘നോ’ പറയേണ്ടതില്ല. വസ്തുതകൾ മനസ്സിലാക്കിക്കൊണ്ടുള്ള തെരഞ്ഞെടുപ്പുകൾ നടത്തുക എന്നതാണ് പ്രധാനം:

• അത്യാവശ്യ ഘട്ടങ്ങളിൽ കഴിക്കാനായി ലഘുഭക്ഷണങ്ങളോ ഗ്ലൂക്കോസ് ഗുളികകളോ കൈയിൽ കരുതുക.

• യാത്രകളിലും ആഘോഷങ്ങളിലും ശരീരത്തിന് ആവശ്യമായ വെള്ളം കുടിച്ച് ജലാംശം നിലനിർത്തുക.

• ഉത്സവങ്ങൾക്കും, യാത്രകൾക്കും, പുറത്തുപോകുന്നതിനും മുൻകൂട്ടി ആസൂത്രണം ചെയ്യുക.

സ്ഥിരതയോടെ അനുവർത്തിച്ചാൽ, പ്രമേഹ പരിചരണം എന്നത് വളരെ ലളിതമാണ്. പല്ലു തേക്കുന്നത് പോലെ, അത് നമ്മുടെ ദൈനംദിന ജീവിതത്തിൻ്റെ ഭാഗമായി മാറും.

പ്രമേഹരോഗം  ജീവിതത്തിൻ്റെ ഒരു ഭാഗം മാത്രമാണ്, അത് മുഴുവൻ ജീവിതത്തെയും ബാധിക്കുന്ന ഒരു പ്രതിസന്ധിയല്ല. ശരിയായ ചികിത്സയും പരിചരണവും രോഗത്തിന് പരിഗണന നൽകുന്ന മനോഭാവവും ഉണ്ടെങ്കിൽ, എല്ലാ പ്രമേഹരോഗികൾക്കും ആരോഗ്യത്തോടെ തന്നെ ജീവിക്കാനാകും. ഓർക്കുക: പ്രമേഹത്തോടൊപ്പം ജീവിക്കുക എന്നതല്ല, പ്രമേഹത്തോടൊപ്പം നന്നായി ജീവിക്കുക എന്നതാണ് പ്രധാനം.