കാലങ്ങളായി,  കുഞ്ഞുങ്ങളുള്ള വീടുകളിൽ എപ്പോഴും കരുതിവെയ്ക്കുന്നൊരു മരുന്നാണ് ഗ്രൈപ്പ് വാട്ടർ. തീരെച്ചെറിയ കുഞ്ഞുങ്ങൾ നിർത്താതെ കരയുമ്പോൾ, വയറുവേദനയും വയറിലെ അസ്വസ്ഥതകളുമാണ് കാരണമെന്നു തീരുമാനിച്ച് അമ്മമാർ ഗ്രൈപ്പ് വാട്ടർ നൽകുന്നു. ഗ്യാസ്, വയറുവേദന (Colic), എക്കിൾ എന്നിവയ്ക്ക് ആശ്വാസം നൽകുന്ന മധുരമുള്ള ഔഷധക്കൂട്ടായാണ് ഇതിനെ പൊതുവെ കണക്കാക്കുന്നത്. കുടുംബത്തിലെ മുതിർന്നവർ വിശ്വാസ്യതയോടെ നിർദ്ദേശിക്കുന്ന മരുന്നാണിത്. മാത്രമല്ല, കടകളിൽ എളുപ്പത്തിൽ ലഭിക്കുമെന്ന സൗകര്യവുമുണ്ട്. അതുകൊണ്ടുതന്നെ, ഗ്രൈപ്പ് വാട്ടർ വ്യാപകമായി ഉപയോഗിക്കപ്പെടുന്നു.

ഗ്രൈപ്പ് വാട്ടർ ഫലപ്രദമാണെന്ന് ശാസ്ത്രീയമായി തെളിയിക്കപ്പെട്ടിട്ടുണ്ടോ? ഇത് കുഞ്ഞുങ്ങൾക്ക് സുരക്ഷിതമാണോ? 

വിശദമായി മനസ്സിലാക്കേണ്ട കാര്യമാണിത്. ഇതിന് പിന്നിലെ മിഥ്യാധാരണകൾ മാറ്റിവെച്ച് നമുക്ക് വസ്തുതകൾ പരിശോധിക്കാം.

എന്താണ് യഥാർത്ഥത്തിൽ ഗ്രൈപ്പ് വാട്ടർ?

ഗ്രൈപ്പ് വാട്ടർ എന്നത് കൃത്യമായ അളവുകൾ നിശ്ചയിച്ചിട്ടുള്ള ഒരു പ്രത്യേകമരുന്നല്ല. ഉൽപ്പന്ന വിഭാഗത്തിൽ ഉൾപ്പെടുന്ന ദ്രാവകമാണിത്. പല  ബ്രാൻഡുകൾക്കും വ്യത്യസ്ത രാജ്യങ്ങളിലെ നിർമ്മാണ രീതികൾക്കും അനുസൃതമായി ഇതിലെ ചേരുവകളിൽ വലിയ വ്യത്യസങ്ങൾ കാണാം.

സാധാരണയായി ഇതിൽ അടങ്ങിയിരിക്കുന്ന പ്രധാന ചേരുവകൾ ഇവയാണ്:

• ഔഷധസസ്യങ്ങൾ: പെരുംജീരകം, ചതകുപ്പ, ഇഞ്ചി, ചമോമൈൽ തുടങ്ങിയവയുടെ സത്തുകൾ

• മധുരം: ചില ബ്രാൻഡുകളിൽ പഞ്ചസാരയോ സിറപ്പുകളോ ചേർക്കാറുണ്ട്

• സോഡിയം ബൈകാർബണേറ്റ്: ചില പ്രത്യേക ബ്രാൻഡുകളിൽ ഇത് അടങ്ങിയിട്ടുണ്ടാകാം

• പ്രിസർവേറ്റീവുകൾ: കേടുകൂടാതെ ഇരിക്കാനുള്ള പദാർത്ഥങ്ങളും രുചി കൂട്ടാനുള്ള ഏജന്റുകളും 

ഒരു പ്രധാന കാര്യം ശ്രദ്ധിക്കേണ്ടത്, പലപ്പോഴും ഇതൊരു സപ്ളിമെൻ്റ് എന്ന നിലയിലാണ് വിൽക്കപ്പെടുന്നത്. അതുകൊണ്ട് തന്നെ, സാധാരണ മരുന്നുകൾക്ക് ലഭിക്കുന്നതുപോലുള്ള കർശനമായ പരിശോധനകളോ അംഗീകാരങ്ങളോ ഇതിനുണ്ടാകണമെന്നില്ല.

ഗ്രൈപ്പ് വാട്ടർ നൽകുന്ന സാഹചര്യങ്ങൾ

• കോളിക് (Colic): മറ്റ് ആരോഗ്യപ്രശ്നങ്ങളൊന്നുമില്ലാത്ത കുഞ്ഞുങ്ങൾ വൈകുന്നേരങ്ങളിലും മറ്റും അകാരണമായി നിർത്താതെ കരയുന്ന അവസ്ഥ

• ഗ്യാസ് / വയർ വീർക്കൽ: കുഞ്ഞിന്റെ വയറ്റിൽ ഗ്യാസ് നിറയുന്നതും അതുകാരണമുള്ള അസ്വസ്ഥതകളും

• എക്കിൾ (Hiccups): കുഞ്ഞുങ്ങളിൽ തുടർച്ചയായുണ്ടാകുന്ന എക്കിൾ നിർത്താൻ

• പാൽ കുടിച്ച ശേഷമുള്ള അസ്വസ്ഥത: ആഹാരത്തിന് ശേഷം കുഞ്ഞ് കാണിക്കുന്ന അസ്വസ്ഥത കുറയ്ക്കാൻ

• ദഹനത്തിന്: ദഹനം സുഗമമാക്കാൻ സഹായിക്കും എന്നൊരു വിശ്വാസം നിലവിലുണ്ട്

ഇവിടെ നമ്മൾ ശ്രദ്ധിക്കേണ്ട ഒരു കാര്യമുണ്ട്: വ്യാപകമായി ഉപയോഗിക്കപ്പെടുന്നു എന്നതുകൊണ്ടുമാത്രം  ആ മരുന്ന് ശാസ്ത്രീയമായി ഫലപ്രദമാണ് എന്നുറപ്പിക്കാനാകില്ല.

ഗ്രൈപ്പ് വാട്ടർ ശരിക്കും ഫലപ്രദമാണോ?

ലഭ്യമായ പഠനങ്ങളും തെളിവുകളും സൂചിപ്പിക്കുന്നത്:

• ശാസ്ത്രീയ തെളിവുകളുടെ കുറവ്: ഗ്രൈപ്പ് വാട്ടർ നൽകുന്നത് കുഞ്ഞുങ്ങളിലെ വയറുവേദനയും (Colic) ഗ്യാസും കുറയ്ക്കുന്നു എന്നതിന് ശാസ്ത്രീയ തെളിവുകൾ ലഭ്യമല്ലെന്ന് പ്രമുഖ ആരോഗ്യ സംഘടനകൾ ചൂണ്ടിക്കാട്ടുന്നു

• ചില പഠനങ്ങളിലെ സൂചനകൾ: ഗ്രൈപ്പ് വാട്ടർ ഉപയോഗിക്കാത്ത കുഞ്ഞുങ്ങളെ അപേക്ഷിച്ച്, ഇത് ഉപയോഗിക്കുന്ന കുഞ്ഞുങ്ങളിൽ ഛർദ്ദി, മലബന്ധം, വയറുവേദനയ്ക്ക് സമാനമായ ലക്ഷണങ്ങൾ തുടങ്ങിയവ കൂടുതലായി കണ്ടുവരുന്നതായി ചില പഠനങ്ങൾ സൂചിപ്പിക്കുന്നു

• അംഗീകാരമില്ലാത്ത ചികിത്സ: ശിശുരോഗ വിദഗ്ദ്ധർ (Pediatricians) വയറുവേദനയ്ക്കുള്ള അംഗീകൃത ചികിത്സകളുടെ പട്ടികയിൽ ഗ്രൈപ്പ് വാട്ടർ ഉൾപ്പെടുത്തിയിട്ടില്ല.

പിന്നെ എന്തുകൊണ്ടാണ് ഇത് നൽകിയാൽ കുഞ്ഞ് ശാന്തനാകുന്നത്?

ഗ്രൈപ്പ് വാട്ടർ നൽകിയാൽ കുഞ്ഞ് കരച്ചിൽ നിർത്തുന്നത് ചിലപ്പോൾ താഴെ പറയുന്ന കാരണങ്ങൾ കൊണ്ടാകാം:

• മധുരം: അതിലെ മധുരമുള്ള രുചി കുഞ്ഞിനെ താൽക്കാലികമായി ശാന്തനാക്കിയേക്കാം

• ശുശ്രൂഷാ രീതികൾ: ഗ്രൈപ്പ് വാട്ടർ നൽകുന്ന സമയത്ത് നമ്മൾ കുഞ്ഞിനെ എടുക്കുന്നതും താരാട്ടു പാടുന്നതും ആഹാരം നൽകുന്നത് താൽക്കാലികമായി നിർത്തുന്നതുമെല്ലാം കുഞ്ഞിന് ആശ്വാസം നൽകുന്നുണ്ടാകാം

• സ്വാഭാവികമായ മാറ്റം: വയറുവേദന (Colic) എന്നത് പ്രായത്തിനനുസരിച്ച് മാറുന്ന ഒന്നാണ്. സാധാരണയായി 3 മുതൽ 6 മാസം വരെയാകുമ്പോഴേക്കും ഇത് തനിയെ മാറിക്കൊള്ളും

ഗ്രൈപ്പ് വാട്ടർ സുരക്ഷിതമാണോ?

ചില കുഞ്ഞുങ്ങളിൽ ഇത് സുരക്ഷിതമായിരിക്കാം, എങ്കിലും ഇത് പൂർണ്ണമായും അപകടസാധ്യതകളില്ലാത്തതല്ല. കുഞ്ഞിന്റെ പ്രായം, അതിലെ ചേരുവകൾ, നൽകുന്ന അളവ്, ഉൽപ്പന്നത്തിന്റെ ഗുണനിലവാരം എന്നിവയെ ആശ്രയിച്ചിരിക്കും ഇതിന്റെ സുരക്ഷ.

1. ഗുണനിലവാരം സംബന്ധിച്ച ആശങ്കകൾ

പലപ്പോഴും ഇതൊരു മരുന്നായല്ല, ഡയറ്ററി സപ്ലിമെന്റ് ആയാണ് വിൽക്കപ്പെടുന്നത്. അതുകൊണ്ട് തന്നെ സാധാരണ മരുന്നുകൾക്ക് ഉള്ളതുപോലുള്ള കർശനമായ ഗുണനിലവാര പരിശോധനകൾ എല്ലാ ബ്രാൻഡുകൾക്കും ഉണ്ടാകണമെന്നില്ല.

2. വിപണിയിൽ നിന്ന് പിൻവലിക്കുന്ന സാഹചര്യം

സുരക്ഷാ പ്രശ്നങ്ങൾ കാരണം ചില ഗ്രൈപ്പ് വാട്ടർ ബ്രാൻഡുകൾ വിപണിയിൽ നിന്ന് പിൻവലിച്ച സംഭവങ്ങളുണ്ട്. ഉദാഹരണത്തിന്, ചില കുപ്പികളിൽ ഖരപദാർത്ഥങ്ങൾ കണ്ടത്തിയത് കുഞ്ഞുങ്ങൾക്ക് തൊണ്ടയിൽ തങ്ങാനോ ശ്വാസംമുട്ടാനോ (Choking risk) ഇടയാക്കുമെന്ന് കണ്ടെത്തിയിരുന്നു.

3. ദോഷകരമായേക്കാവുന്ന ചേരുവകൾ

താഴെ പറയുന്ന ചേരുവകൾ അടങ്ങിയ ഗ്രൈപ്പ് വാട്ടർ ഒഴിവാക്കണമെന്ന് വിദഗ്ദ്ധർ മുന്നറിയിപ്പ് നൽകുന്നു:

• ആൽക്കഹോൾ (Alcohol): പഴയകാലത്തെ ഗ്രൈപ്പ് വാട്ടറുകളിൽ ഇത് അടങ്ങിയിരുന്നു, കുഞ്ഞുങ്ങൾക്ക് ഇത് ഏറെ അപകടകരമാണ്

• അമിതമായ അളവിൽ പഞ്ചസാര: പല്ലുകൾക്കും ദഹനത്തിനും ദോഷം വരുത്തിയേക്കാം

• സോഡിയം ബൈകാർബണേറ്റ്: ചില പ്രത്യേക സാഹചര്യങ്ങളിൽ ഇത് കുഞ്ഞുങ്ങളുടെ ശരീരത്തിലെ സ്വാഭാവികമായ അമ്ലാംശത്തെ (pH balance) ബാധിച്ചേക്കാം

ശ്രദ്ധിക്കേണ്ട പാർശ്വഫലങ്ങൾ

എല്ലാ കുട്ടികളിലും പാർശ്വഫലങ്ങൾ ഉണ്ടാകണമെന്നില്ല, എങ്കിലും സെൻസിറ്റീവ് ആയ കുഞ്ഞുങ്ങളിൽ ചില ബുദ്ധിമുട്ടുകൾ കണ്ടേക്കാം. പ്രധാനമായും താഴെ പറയുന്നവ ശ്രദ്ധിക്കുക:

• ഛർദ്ദി

• മലബന്ധം അല്ലെങ്കിൽ വയറിളക്കം

• അലർജി

• ഭക്ഷണത്തോടുള്ള താല്പര്യം കുറയുക

ചില പഠന റിപ്പോർട്ടുകൾ പ്രകാരം, ഗ്രൈപ്പ് വാട്ടർ ഉപയോഗിക്കുന്ന കുഞ്ഞുങ്ങളിൽ ഛർദ്ദിയും മലബന്ധവും കൂടുതലായി കണ്ടുവരാറുണ്ട്. കൂടാതെ, മുലപ്പാലല്ലാതെ മറ്റ് പദാർത്ഥങ്ങൾ (Non-breastmilk substances) വളരെ നേരത്തെ കുഞ്ഞുങ്ങൾക്ക് നൽകുന്നത് അവരുടെ ആരോഗ്യത്തെ ദോഷകരമായി ബാധിക്കുമെന്ന് ശിശുരോഗ വിദഗ്ദ്ധർ മുന്നറിയിപ്പ് നൽകുന്നു.

ഗ്രൈപ്പ് വാട്ടർ ഒഴിവാക്കേണ്ടതെപ്പോൾ?

• ഒരു മാസത്തിൽ താഴെ പ്രായമുള്ള കുഞ്ഞുങ്ങൾ: നവജാത ശിശുക്കളുടെ കാര്യത്തിൽ അതീവ ജാഗ്രത വേണമെന്ന് ഭൂരിഭാഗം ആരോഗ്യ വിദഗ്ദ്ധരും നിർദ്ദേശിക്കുന്നു

• മാസം തികയാതെ പ്രസവിച്ച കുട്ടികൾ (Premature): തൂക്കം കുറഞ്ഞ കുട്ടികൾക്കോ മറ്റ് ആരോഗ്യപ്രശ്നങ്ങൾ ഉള്ള കുട്ടികൾക്കോ ഇത് നൽകാതിരിക്കുക

• അലർജി പ്രശ്നങ്ങൾ ഉള്ളവർ: കുട്ടിക്ക് ഏതെങ്കിലും തരത്തിലുള്ള അലർജിയോ എക്സിമ (Eczema) പോലുള്ള ചർമ്മരോഗങ്ങളോ ഉണ്ടെങ്കിൽ 

• ചേരുവകൾ വ്യക്തമല്ലാത്തവ:  ആൽക്കഹോൾ, അമിതമായ അളവിൽ പഞ്ചസാര എന്നിവ അടങ്ങിയതോ അല്ലെങ്കിൽ ചേരുവകളെക്കുറിച്ച് വ്യക്തമായ വിവരങ്ങൾ ഇല്ലാത്തതോ ആയ ബ്രാൻഡുകൾ ഒഴിവാക്കുക

• കുപ്പി തുറന്ന് മാസങ്ങൾ കഴിഞ്ഞാൽ: ദീർഘകാലം മുൻപ് തുറന്ന കുപ്പികളിൽ നിന്നോ ശരിയായ രീതിയിൽ സൂക്ഷിക്കാത്ത കുപ്പികളിൽ നിന്നോ  എടുത്ത ഗ്രൈപ്പ് വാട്ടർ അണുബാധയ്ക്ക് കാരണമാകും.

ഗ്രൈപ്പ് വാട്ടർ നൽകുമ്പോൾ ശ്രദ്ധിക്കേണ്ട കാര്യങ്ങൾ

• വിശ്വസനീയമായ ബ്രാൻഡ് തെരഞ്ഞെടുക്കുക

• ലേബൽ കൃത്യമായി പരിശോധിക്കുക

• കാലാവധി നോക്കുക

• കുപ്പിയുടെ പുറത്ത് നൽകിയിരിക്കുന്ന ഏറ്റവും കുറഞ്ഞ അളവ് (Dose) മാത്രം നൽകുക. ഇടയ്ക്കിടെ നൽകുന്നത് ഒഴിവാക്കുക.

• കുട്ടി നിർത്താതെ കരയുകയോ  ഛർദ്ദി, ശരീരത്തിൽ തടിപ്പുകൾ, വയറിളക്കം, മലബന്ധം എന്നിവ ഉണ്ടാകുകയോ ചെയ്യുന്ന പക്ഷം, മരുന്ന് നൽകുന്നത് നിർത്തുക.

• ഗ്രൈപ്പ് വാട്ടർ നൽകുന്നത് ശീലമാക്കരുത്.  കുഞ്ഞ് ഇടയ്ക്ക് അസ്വസ്ഥതകൾ കാണിക്കുമ്പോൾ മാത്രം അതുനൽകുക

വയറുവേദനയ്ക്കും ഗ്യാസിനും പരിഹാരമായി ചെയ്യാവുന്ന കാര്യങ്ങൾ

മരുന്നുകൾക്ക് പകരം താഴെ പറയുന്ന രീതികൾ പരീക്ഷിക്കാവുന്നതാണ്:

ആഹാരം നൽകുന്ന രീതിയിലെ മാറ്റങ്ങൾ

• കുഞ്ഞ് പാൽ കുടിക്കുമ്പോൾ വായ ശരിയായ പൊസിഷനിലാണെന്ന് (Proper latch) ഉറപ്പുവരുത്തുക. ഇത് അമിതമായി കാറ്റ് ഉള്ളിലേക്ക് പോകുന്നത് തടയും.

• തിരക്കുപിടിച്ച് കുഞ്ഞിന് പാലു കൊടുക്കരുത്. പാൽ കൊടുത്തു കഴിഞ്ഞ് കുഞ്ഞിനെ തോളിലിട്ട് തട്ടി ഏമ്പക്കം(Burping) വന്നശേഷം മാത്രം കിടത്തുക.

• കുഞ്ഞിന്റെ വിശപ്പിന് അനുസരിച്ച് മാത്രം പാൽ നൽകുക.

കുഞ്ഞിനെ ശാന്തമാക്കാനുള്ള വഴികൾ

• സാവധാനത്തിലുള്ള ചലനങ്ങൾ: കുഞ്ഞിനെ എടുത്ത് സാവധാനം ആട്ടുകയോ നടക്കുകയോ ചെയ്യുന്നത് അവർക്ക് ആശ്വാസം നൽകും

• സ്വാഡ്ലിംഗ് (Swaddling): കുഞ്ഞിനെ സുരക്ഷിതമായി ഒരു തുണിയിൽ പൊതിയുന്നത് അവർക്ക് അമ്മയുടെ വയറ്റിലുണ്ടായിരുന്ന സുരക്ഷിതത്വം നൽകും

• വൈറ്റ് നോയ്സ് (White Noise): ശാന്തത നൽകുന്ന ശബ്ദങ്ങൾ കേൾപ്പിക്കുന്നത് കുഞ്ഞിനെ ഉറങ്ങാൻ സഹായിക്കും

• ശരീരത്തോടു ചേർത്ത് പിടിക്കുക (Skin-to-skin contact): അമ്മയുടെയോ അച്ഛന്റെയോ ശരീരത്തോട് ചേർത്ത് പിടിക്കുന്നത് കുഞ്ഞിന്റെ ഉത്കണ്ഠ കുറയ്ക്കാൻ സഹായിക്കും

മുലയൂട്ടുന്ന അമ്മമാർ ശ്രദ്ധിക്കാൻ

ചില കുഞ്ഞുങ്ങളിൽ അമ്മ കഴിക്കുന്ന പാലുൽപ്പന്നങ്ങളുടെ അംശം (Dairy products) അസ്വസ്ഥത ഉണ്ടാക്കാറുണ്ട്. ഡോക്ടറുടെ നിർദ്ദേശപ്രകാരം കുറച്ചു ദിവസത്തേക്ക് പാലുൽപ്പന്നങ്ങൾ ഒഴിവാക്കി മാറ്റം ഉണ്ടോ എന്ന് നോക്കാവുന്നതാണ്.

പ്രത്യേകം ശ്രദ്ധിക്കാൻ: പ്രമുഖ ആരോഗ്യ സംഘടനകളായ എ എ പി  (American Academy of Pediatrics), എൻ എച്ച് എസ് എന്നിവയുടെ നിർദ്ദേശപ്രകാരം വയറുവേദന കുറയ്ക്കാൻ മരുന്നുകളേക്കാൾ കൂടുതൽ ഫലപ്രദമാകുന്നത് ഇത്തരം പരിചരണ രീതികളാണ്. പല നാട്ടുചികിത്സകളും ശാസ്ത്രീയമായി തെളിയിക്കപ്പെടാത്തതിനാൽ അവ ഒഴിവാക്കുന്നതാണ് നല്ലത്.

കുഞ്ഞിന്റെ കരച്ചിൽ അപകടകരമാകുന്നതെപ്പോൾ?

താഴെ പറയുന്ന ലക്ഷണങ്ങൾ കണ്ടാൽ കുഞ്ഞിനെ അടിയന്തരമായി ഒരു ഡോക്ടറെ കാണിക്കുക:

• പനിയും ഛർദ്ദിയും

• മലത്തിൽ രക്തത്തിന്റെ അംശം കാണുക, കഠിനമായ വയറിളക്കം

• ശ്വാസ തടസ്സം

• കുട്ടി വല്ലാതെ തളർന്നുപോകുക, കരച്ചിലിന് ഒട്ടും ശക്തിയില്ലാതാവുക, സാധാരണയേക്കാൾ വളരെ കുറച്ചു മാത്രം മൂത്രമൊഴിക്കുക.

• മറ്റ് ഗൗരവകരമായ ലക്ഷണങ്ങൾ: തലയിലെ മൃദുവായ ഭാഗം (Fontanelle) വീർത്തുവരിക, അപസ്മാര ലക്ഷണങ്ങൾ (Seizures), തുടർച്ചയായുള്ള കരച്ചിൽ.

പലപ്പോഴും നമ്മൾ ഗ്യാസ് എന്ന് കരുതുന്നത് യഥാർത്ഥത്തിൽ റിഫ്ലക്സ്, അണുബാധ, അല്ലെങ്കിൽ പാലിനോടുള്ള അലർജി (Milk protein allergy) എന്നിങ്ങനെയുള്ള മറ്റ് ആരോഗ്യപ്രശ്നങ്ങളാകാം.

ഗ്രൈപ്പ് വാട്ടർ വർഷങ്ങളായി ഉപയോഗിച്ചുപോരുന്ന ഒന്നാണെങ്കിലും, ശാസ്ത്രീയമായ തെളിവുകളുടെ അടിസ്ഥാനത്തിൽ ഇതിന് പകരം സുരക്ഷിതമായ മറ്റു രീതികൾ പരീക്ഷിക്കുന്നതാണ് ഉചിതം. കുഞ്ഞിന് അമിതമായ അസ്വസ്ഥത ഉണ്ടെങ്കിൽ സ്വയംചികിത്സ ഒഴിവാക്കി ഒരു ശിശുരോഗ വിദഗ്ദ്ധന്റെ ഉപദേശം തേടുക.

ഗ്രൈപ്പ് വാട്ടർ ലോകമെമ്പാടും വ്യാപകമായി ഉപയോഗിക്കപ്പെടുന്നുണ്ടെങ്കിലും, കുഞ്ഞുങ്ങളിലെ വയറുവേദന (Colic) മാറ്റാൻ ഇത് ഫലപ്രദമാണെന്നതിന് കൃത്യമായ ശാസ്ത്രീയ തെളിവുകളില്ല. മാത്രമല്ല, ഓരോ ഉൽപ്പന്നത്തെയും കുഞ്ഞിന്റെ ആരോഗ്യത്തെയും ആശ്രയിച്ച് ഇതിൽ ചില അപകടസാധ്യതകളുമുണ്ട്.

കുഞ്ഞ് ആരോഗ്യവാനാണെങ്കിൽ, ഡോക്ടറുടെ നിർദ്ദേശപ്രകാരം ഗുണനിലവാരമുള്ള ഒരു ബ്രാൻഡ് വല്ലപ്പോഴും ഉപയോഗിക്കുന്നത് കൊണ്ട് കുഴപ്പമില്ലായിരിക്കാം.

പക്ഷേ, കുഞ്ഞ് ഓരോ തവണ കരയുമ്പോഴും നൽകാവുന്ന ഒരു സ്ഥിരം പരിഹാരമായി ഇതിനെ കണക്കാക്കരുത്. 

ശാസ്ത്രീയമായി തെളിയിക്കപ്പെട്ടതും കുഞ്ഞിന് അനുയോജ്യമായതുമായ മാർഗ്ഗങ്ങൾ സ്വീകരിക്കുകയാണ് ഏറ്റവും നല്ലത്.