പഠിക്കാനും ജോലി ചെയ്യാനും നേരമ്പോക്കിനും വിനോദത്തിനുമൊക്കെയായി  സ്ക്രീനുകളെ ആശ്രയിക്കുന്ന കാലത്തിലാണ് നമ്മൾ ജീവിക്കുന്നത്. നിന്നും ഇരുന്നും കിടന്നും ഇങ്ങനെ  മണിക്കൂറുകൾ ചെലവഴിക്കുമ്പോൾ, നമ്മുടെ കണ്ണുകൾ നിരന്തരമായ സമ്മർദ്ദത്തിലാണ്. മുമ്പൊക്കെ വയസ്സായവരിൽ മാത്രം സാധാരണ കണ്ടുവരുന്ന അസ്വസ്ഥതകൾ, ഇന്ന് പ്രായവ്യത്യാസമില്ലാതെ പലരും അനുഭവിക്കുന്നുണ്ട്. കാഴ്ച മങ്ങുക, കണ്ണുകളിൽ  വരൾച്ച അനുഭവപ്പെടുക, തലവേദന, ശ്രദ്ധ കേന്ദ്രീകരിക്കാനുള്ള ബുദ്ധിമുട്ട് എന്നിവയെല്ലാം കുട്ടികളിലും ചെറുപ്പക്കാരിലും ഇത് സർവ്വസാധാരണമായ പരാതികളാണ്.

പക്ഷെ ഈ പ്രശ്നങ്ങൾക്കെല്ലാം ഒരു പരിഹാരമുണ്ട്: ശരീരത്തിൻ്റെ ആരോഗ്യത്തിന് വ്യായാമവും മാനസികാരോഗ്യത്തിന് ധ്യാനവും ശീലമാക്കുന്നത് പോലെ, കണ്ണുകൾക്കായും ലളിതമായ ചില വ്യായമങ്ങളുണ്ട്. വളരെ ഫലപ്രദമാണെന്ന് മാത്രമല്ല, ഇതിന് പണച്ചെലവുമില്ല. നേത്രസംരക്ഷണത്തിനായി സ്വയം തീരുമാനിച്ചിറങ്ങുക എന്നത് മാത്രമാണ് ഇക്കാര്യത്തിൽ ചെയ്യാനുള്ളത്. ഇത്രയേറെ സൗകര്യപ്രദമാണെങ്കിലും, നമ്മുടെ ആരോഗ്യ സംരക്ഷണ ശീലങ്ങളിൽ ഇത് പലപ്പോഴും ശ്രദ്ധിക്കാതെ പോകുന്നു.

നേത്രവ്യായാമങ്ങൾ അതിപ്രധാനം

നമ്മുടെ ശരീരത്തിലെ ഏതൊരു പേശിയെയും പോലെ, നേത്ര പേശികൾക്കും ചലനവും വിശ്രമവും ആവശ്യമാണ്. മണിക്കൂറുകളോളം സ്ക്രീനുകളിൽ നോക്കിയിരിക്കുമ്പോൾ, കണ്ണ് ചിമ്മുന്നത് കുറഞ്ഞുവരികയും കണ്ണിന്റെ പേശികൾക്ക് ആയാസം അനുഭവപ്പെടുകയും ചെയ്യുന്നു. ഇത് ഇനിപ്പറയുന്ന അവസ്ഥകളിലേക്ക് നയിച്ചേക്കാം:

• ഡിജിറ്റൽ ഐ സ്ട്രെയ്ൻ (കമ്പ്യൂട്ടർ വിഷൻ സിൻഡ്രോം)

• കണ്ണുകളിലെ വരൾച്ച 

• ശ്രദ്ധ കേന്ദ്രീകരിക്കാനുള്ള കഴിവ് കുറയുക

• തലവേദനയും ക്ഷീണവും

• കുട്ടികളിലും കൗമാരക്കാരിലും വർദ്ധിച്ചുവരുന്ന ഹ്രസ്വദൃഷ്ടി

പതിവായി നേത്രവ്യായാമങ്ങൾ പരിശീലിക്കുന്നത് ഈ പ്രശ്നങ്ങൾക്ക്  ആശ്വാസം നൽകാനും ശ്രദ്ധ കേന്ദ്രീകരിക്കാനും ചിലർക്കെങ്കിലും കണ്ണടയെ ആശ്രയിക്കുന്നത് കുറയ്ക്കാനും സഹായിക്കും.

ഈ ലളിതമായ വ്യായാമങ്ങൾ പരീക്ഷിച്ചുനോക്കൂ

1. 20-20-20 നിയമം 

ഓരോ 20 മിനിറ്റ് കൂടുമ്പോഴും 20 അടി അകലെയുള്ള ഒരു വസ്തുവിലേക്ക് 20 സെക്കൻഡ് നേരം നോക്കുക.

ഇത്  കണ്ണിന്റെ പേശികൾക്ക് ചെറിയ വിശ്രമം നൽകുകയും അമിതമായ ആയാസം കുറയ്ക്കുകയും ചെയ്യുന്നു.

2. പാമിംഗ് 

കൈപ്പത്തികൾ കൂട്ടിത്തിരുമ്മി ചൂടാക്കുക. തുടർന്ന്, കണ്ണുകൾ അടച്ച് ഒരു മിനിറ്റ് നേരത്തേക്ക് കൈപ്പത്തികൾ കണ്ണിന് മുകളിൽ മൃദുവായി വെക്കുക.

ഇത് നേത്രനാഡികൾക്ക് ആശ്വാസം നൽകും. പിരിമുറുക്കം കുറയ്ക്കാനും ഇത് സഹായകമാണ്.

3. ശ്രദ്ധ മാറ്റുന്ന വ്യായാമം 

നിങ്ങളുടെ കൈയിലെ പെരുവിരൽ മുഖത്ത് നിന്ന് ഏതാനും ഇഞ്ച് അകലെ പിടിക്കുക. 5 സെക്കൻഡ് അതിൽ ശ്രദ്ധിക്കുക. തുടർന്ന്, 10-15 അടി ദൂരെയുള്ള മറ്റൊന്നിലേക്ക് നോട്ടം മാറ്റുക. ഇത് 10 തവണ ആവർത്തിക്കുക.

ദൂരക്കാഴ്ച മെച്ചപ്പെടുത്താനും കണ്ണിന്റെ പേശികൾക്ക് അയവ് നൽകാനും ഇത് നല്ലതാണ്.

4. കണ്ണുകൾ വട്ടംകറക്കുക 

 കണ്ണുകൾ പതുക്കെ വട്ടത്തിൽ ചലിപ്പിക്കുക—ആദ്യം ഘടികാരദിശയിലും  പിന്നീട് എതിർദിശയിലും.

ഇത് പേശികളുടെ പിരിമുറുക്കം കുറയ്ക്കുകയും രക്തയോട്ടം കൂട്ടുകയും ചെയ്യുന്നു.

5. കണ്ണുചിമ്മൽ  

ഓരോ 10 മിനിറ്റിലും 10 തവണ കണ്ണുചിമ്മുന്നതിനായി ഒരു ടൈമർ സെറ്റ് ചെയ്യുക.

കണ്ണുചിമ്മുന്നത് കണ്ണുകൾക്ക് ഈർപ്പം നൽകും. കണ്ണുകളുടെ തളർച്ച മാറ്റാനും ഈ വ്യായാമം മികച്ചതാണ്. കണ്ണിൻ്റെ വരൾച്ചയും അസ്വസ്ഥതയും തടയാൻ അനുയോജ്യമായ വ്യായാമമാണിത്.

ജീവിതശൈലിയിലും ശ്രദ്ധ വേണം:

• ധാരാളം വെള്ളം കുടിക്കുക.

• കാഴ്ചശക്തിക്ക് ഗുണകരമായ ഭക്ഷണങ്ങളായ ക്യാരറ്റ്, ചീര, ഒമേഗ-3 അടങ്ങിയ മത്സ്യങ്ങൾ എന്നിവ കഴിക്കുക.

• സ്ക്രീൻ സമയം പരിമിതപ്പെടുത്തുക, പ്രത്യേകിച്ച് കുട്ടികളിൽ.

• വായിക്കുമ്പോഴും ജോലി ചെയ്യുമ്പോഴും മുറിയിൽ കൃത്യമായ വെളിച്ചം ഉറപ്പാക്കുക.

• നന്നായി ഉറങ്ങുക—മനസ്സിനെന്ന പോലെ കണ്ണുകൾക്കും വിശ്രമം ആവശ്യമാണ്.

കുട്ടികൾക്കും കൗമാരക്കാർക്കുമായി: നേരത്തേ തുടങ്ങാം, കാഴ്ചയ്ക്ക് തെളിച്ചമേകാം

ഇന്നത്തെ കുട്ടികൾ മണിക്കൂറുകളോളം ഓൺലൈൻ ക്ലാസുകളിലും ഗെയിമുകളിലും മറ്റ് ഡിജിറ്റൽ ഉപകരണങ്ങളിലും സമയം ചെലവഴിക്കുന്നുണ്ട്. നേത്രവ്യായാമങ്ങൾ അവരുടെ ദിനചര്യയിൽ ഉൾപ്പെടുത്തുന്നത് കാഴ്ചശക്തിക്ക് മാത്രമല്ല, ഏകാഗ്രത വർദ്ധിപ്പിക്കാനും പഠനനിലവാരം മെച്ചപ്പെടുത്താനും സ്ക്രീൻ ഉപയോഗം മൂലമുള്ള ക്ഷീണം കുറയ്ക്കാനും സഹായിക്കും.

ഒരു കാര്യം കൂടി:

നേത്രവ്യായാമങ്ങൾ കണ്ണടയ്ക്കോ വൈദ്യചികിത്സയ്ക്കോ പകരമാവില്ല, പക്ഷെ, വർത്തമാനകാലത്തെ ഡിജിറ്റൽ ജീവിതശൈലിയിൽ ഇതൊരു ഫലപ്രദമായ പ്രതിരോധ മാർഗ്ഗമാകും. ലളിതമായ ഈ വ്യായാമങ്ങളെ  കണ്ണുകൾക്കുള്ള യോഗ ആയി കരുതുക. അത് നമ്മുടെ  നേത്രങ്ങൾക്ക് ആശ്വാസമേകും, ശക്തി പകരും, ,ഉന്മേഷവും നൽകും .

അതുകൊണ്ട്, ഒരിടവേളയെടുക്കൂ, ആഴത്തിൽ ശ്വാസമെടുക്കൂ, കണ്ണുകൾ ചിമ്മിനോക്കൂ…ലോകത്തിൻ്റെ വെളിച്ചം മങ്ങാതെ കാക്കാം. കണ്ണുകളുടെ തെളിച്ചവും.