ദിവസേന വൈറ്റമിൻ ഗുളികകൾ കഴിക്കണോ? ശാസ്ത്രം പറയുന്നത്

കേരളത്തിലെ ഏതു മരുന്നുകടയിൽ കയറിയാലും അവിടെ മൾട്ടി വൈറ്റമിനുകളുടെ വലിയൊരു നിര തന്നെ കാണാം. ഓൺലൈൻ വിൽപ്പന സൈറ്റുകളിലും സ്ഥിതി വ്യത്യസ്തമല്ല. 

രോഗപ്രതിരോധ ശേഷി കൂട്ടുന്നു, കൂടുതൽ ഉന്മേഷം നൽകുന്നു, മുടിക്ക് കരുത്ത് പകരുന്നു, ഓർമ്മശക്തി വർദ്ധിപ്പിക്കുന്നു, വാർദ്ധക്യത്തെ തടയുന്നു തുടങ്ങി എണ്ണിയാലൊടുങ്ങാത്തത്ര ഗുണങ്ങൾ വാഗ്ദാനം ചെയ്യുന്ന പല വർണ്ണങ്ങളിലുള്ള  പലതരം സപ്ളിമെൻ്റുകൾ:

ഒന്നിനും ഒരു കുറവുമുണ്ടാകരുത് എന്ന് കരുതി ദിവസവും മൾട്ടി വൈറ്റമിൻ കഴിക്കുന്നവർ നമുക്കിടയിൽ ധാരാളമുണ്ട്. 

ഒന്നാലോചിച്ചു നോക്കൂ…

ഈ ഗുളികകൾ ശരിക്കും പ്രയോജനപ്രദമാണോ? അതോ വെറുതെ ഒരു സമാധാനത്തിന് വേണ്ടി സപ്ളിമെൻ്റുകൾ വാങ്ങി പണം കളയുകയാണോ?

ഇതിലെ വസ്തുതകൾ നമുക്കൊന്ന് പരിശോധിക്കാം.

എന്താണ് മൾട്ടി വൈറ്റമിൻ?

സാധാരണയായി ഒരു മൾട്ടി വൈറ്റമിൻ ഗുളികയിൽ താഴെ പറയുന്നവ അടങ്ങിയിരിക്കും:

• വൈറ്റമിനുകൾ: (A, B-കോംപ്ലക്സ്, C, D, E, K എന്നിവ)

• ധാതുക്കൾ (Minerals): (അയൺ, സിങ്ക്, മഗ്നീഷ്യം, സെലീനിയം തുടങ്ങിയവ)

• ചിലപ്പോൾ ശരീരത്തിന് ആവശ്യമായ മറ്റു പോഷകങ്ങളും ആന്റിഓക്‌സിഡന്റുകളും ഇതിൽ ഉണ്ടാകാം

ഭക്ഷണക്രമം അത്ര കൃത്യമല്ലെന്ന് തോന്നുന്നവർക്ക് ഒരു “പോഷക ഇൻഷുറൻസ്” (Nutritional Insurance) എന്ന നിലയിലാണ് ഇവ വിപണിയിൽ അവതരിപ്പിക്കപ്പെടുന്നത്. അതായത്, ഭക്ഷണത്തിൽ നിന്ന് ലഭിക്കാത്തത് ഈ ഗുളികയിലൂടെ ലഭിക്കും എന്നൊരു ഉറപ്പ്.

എന്നാൽ, പോഷകാഹാര ശാസ്ത്രം, ഇത്തരം പരസ്യവാചകങ്ങളേക്കാൾ ഏറെ സങ്കീർണ്ണവും സൂക്ഷ്മവുമാണ്. 

ഗവേഷണങ്ങൾ പറയുന്നത്

കഴിഞ്ഞ ഇരുപത് വർഷത്തിനിടയിൽ വലിയ ക്ലിനിക്കൽ പരീക്ഷണങ്ങൾ നടത്തിയതിൽ പ്രധാനമായും പരിശോധനാവിഷയമായത്, മൾട്ടി വൈറ്റമിനുകൾ ചില പ്രത്യേക ഘടകങ്ങൾക്ക് സഹായകമാകുമോ എന്നാണ്:

• ഹൃദ്രോഗങ്ങൾ തടയാൻ

• കാൻസർ സാധ്യത കുറയ്ക്കാൻ

• ആയുസ്സ് വർദ്ധിപ്പിക്കാൻ

• ബുദ്ധിശക്തിയും ഓർമ്മശക്തിയും മെച്ചപ്പെടുത്താൻ

ഗവേഷണ ഫലങ്ങൾ:

ആരോഗ്യമുള്ള ഭൂരിഭാഗം മുതിർന്നവരിലും:

പ്രധാനപ്പെട്ട മാറാരോഗങ്ങൾ തടയുന്നതിൽ മൾട്ടി വൈറ്റമിനുകൾക്ക് വലിയ പങ്കൊന്നുമില്ലെന്നാണ് പഠനങ്ങൾ വ്യക്തമാക്കുന്നത്.

ദീർഘകാല നിരീക്ഷണങ്ങളുൾപ്പെടെയുള്ള പല വലിയ ഗവേഷണങ്ങളും തെളിയിക്കുന്നത്, കൃത്യമായ പോഷകാഹാരം കഴിക്കുന്നവരിൽ ഇത്തരം ഗുളികകൾ പ്രത്യേകിച്ച് ഗുണമൊന്നും ചെയ്യുന്നില്ല എന്നാണ്.

സപ്ളിമെൻ്റുകൾ മാന്ത്രിക ഗുളികകളല്ല

മൾട്ടി വൈറ്റമിനുകൾ ക്ഷീണം മാറ്റാനുള്ള ദിവ്യൗഷധമല്ല. ക്ഷീണത്തിന് ഇനിപ്പറയുന്ന കാര്യങ്ങളാണ് കാരണമെങ്കിൽ, വൈറ്റമിൻ ഗുളിക കൊണ്ട് ആ പ്രശ്നം പരിഹരിക്കാൻ കഴിയില്ല:

• ശരിയായ ഉറക്കമില്ലായ്മ

• അമിതമായ മാനസിക സമ്മർദ്ദം (Stress)

• ഇൻസുലിൻ റെസിസ്റ്റൻസ് (പ്രമേഹ സംബന്ധമായ പ്രശ്നങ്ങൾ)

• തൈറോയ്ഡ് ഹോർമോണിലെ വ്യതിയാനങ്ങൾ

• വിഷാദം (Depression)

ഇത്തരം സാഹചര്യങ്ങളിൽ, പ്രശ്നത്തിന്റെ യഥാർത്ഥ കാരണം കണ്ടെത്തി ചികിത്സിക്കുകയാണ് വേണ്ടത്.

പിന്നെന്തുകൊണ്ടാണ് പലർക്കും ഇത് കഴിക്കുമ്പോൾ മാറ്റം തോന്നുന്നത്?

അതിന് പ്രധാനമായും ചില കാരണങ്ങളുണ്ട്:

1. പ്ലസീബോ ഇഫക്റ്റ് (Placebo Effect):

നമ്മുടെ മസ്തിഷ്ക്കത്തിന് നമ്മൾ കരുതുന്നതിനേക്കാൾ കരുത്തുണ്ട്. ഒരു മരുന്ന് കഴിക്കുന്നത് വഴി മാറ്റമുണ്ടാകും എന്ന് നമ്മൾ വിശ്വസിച്ചാൽ, ശരീരം താൽക്കാലികമായി ആശ്വാസം പ്രകടിപ്പിച്ചേക്കാം.

2. തിരിച്ചറിയപ്പെടാത്ത അപര്യാപ്തതകൾ:

വൈറ്റമിൻ ഡി (Vitamin D), വൈറ്റമിൻ ബി12 (B12), ഇരുമ്പിന്റെ അംശം (Iron) എന്നിവയുടെ കുറവ് ശരീരത്തിനുണ്ടെങ്കിൽ സപ്ലിമെന്റുകൾ കഴിക്കുന്നത് തീർച്ചയായും മാറ്റമുണ്ടാക്കും.

എന്നാൽ ഇത്തരം ഘട്ടങ്ങളിൽ, ഒരു മൾട്ടി വൈറ്റമിൻ ഗുളിക കഴിക്കുന്നതിനേക്കാൾ നല്ലത്, ശരീരത്തിൽ കുറവുള്ള ആ പ്രത്യേക വൈറ്റമിൻ മാത്രം കൃത്യമായ അളവിൽ കഴിക്കുന്നതാണ്.

മൾട്ടി വൈറ്റമിനുകൾ ഗുണപ്രദമാകുന്നതെപ്പോൾ?

മൾട്ടി വൈറ്റമിനുകൾ പൂർണ്ണമായും ഉപയോഗശൂന്യമാണെന്നല്ല പറഞ്ഞുവരുന്നത്. ചില പ്രത്യേക സാഹചര്യങ്ങളിൽ ഇവ ശരീരത്തിന് ഏറെ ഗുണകരമാണ്:

• ഗർഭാവസ്ഥയിൽ: കുഞ്ഞിന്റെ വളർച്ചയ്ക്കും അമ്മയുടെ ആരോഗ്യത്തിനും ഫോളിക് ആസിഡും അയണും (ഇരുമ്പ്) അത്യാവശ്യമാണ്.

• മുതിർന്ന പൗരന്മാർക്ക്: പ്രായം കൂടുന്തോറും ഭക്ഷണത്തിൽ നിന്നുള്ള പോഷകങ്ങൾ ആഗിരണം ചെയ്യാനുള്ള ശരീരത്തിന്റെ ശേഷി കുറയാറുണ്ട്.

• സസ്യഭുക്കുകൾക്ക് (Vegetarians or Vegans): മാംസാഹാരം പൂർണ്ണമായും ഒഴിവാക്കുന്നവർക്ക് വൈറ്റമിൻ B12 കുറയാനുള്ള സാധ്യത കൂടുതലാണ്.

• ആഗിരണ പ്രശ്നങ്ങളുള്ളവർക്ക്: സീലിയാക് ഡിസീസ് (Celiac disease) ഉള്ളവർക്കോ അല്ലെങ്കിൽ അമിതഭാരം കുറയ്ക്കാനുള്ള ശസ്ത്രക്രിയകൾക്ക് (Bariatric surgery) വിധേയരായവർക്കോ പോഷകങ്ങൾ ശരിയായി ആഗിരണം ചെയ്യാൻ ഗുളികകൾ സഹായിക്കും.

• കടുത്ത ഭക്ഷണനിയന്ത്രണം ഉള്ളവർക്ക്: പെട്ടെന്ന് തടി കുറയ്ക്കാനായി ക്രാഷ് ഡയറ്റുകൾ (Crash diets) പിന്തുടരുന്നവർക്ക് ഭക്ഷണത്തിലൂടെയുള്ള പോഷകങ്ങൾ കുറയാൻ സാധ്യതയുണ്ട്.

ഇത്തരം സാഹചര്യങ്ങളിൽ, ഡോക്ടറുടെ നിർദ്ദേശപ്രകാരം വൈറ്റമിൻ സപ്ലിമെന്റുകൾ കഴിക്കുന്നത് നല്ലതാണ്.

അമിതമായ സപ്ലിമെന്റ് ഉപയോഗമെന്ന പരോക്ഷ പ്രതിസന്ധി

പലരും ഒരേസമയം പലതരം സപ്ലിമെന്റുകൾ തോന്നിയപോലെ ഉപയോഗിക്കാറുണ്ട്:

• മൾട്ടി വൈറ്റമിനുകൾ

•  വൈറ്റമിൻ ഡി (Vitamin D)

• വൈറ്റമിൻ ബി-കോംപ്ലക്സ് (B-complex)

• പ്രോട്ടീൻ പൗഡറുകൾ

• ഹെർബൽ സപ്ലിമെന്റുകൾ

ഇത്തരത്തിൽ എല്ലാം കൂടി ഒരുമിച്ച് കഴിക്കുന്നത് താഴെ പറയുന്ന പ്രശ്നങ്ങൾക്ക് കാരണമായേക്കാം:

• അമിതമായ വൈറ്റമിൻ എ: ഉയർന്ന അളവിൽ ശരീരത്തിലെത്തിയാൽ ഇത് വിഷാംശമായി (Toxic) മാറാൻ സാധ്യതയുണ്ട്.

• ശരീരത്തിന് താങ്ങാവുന്നതിലപ്പുറം അയൺ ദോഷകരമാണ്.

• ശരീരത്തിലെ മിനറലുകളുടെ കൃത്യമായ അനുപാതം തെറ്റാൻ ഇത് കാരണമാകും.

• അമിതമായ അളവിലുള്ള ഇത്തരം പദാർത്ഥങ്ങൾ പുറന്തള്ളാൻ ശ്രമിക്കുന്നത് വൃക്കകൾക്ക് ആയാസമുണ്ടാക്കും

പോഷകാഹാരത്തിന്റെ കാര്യത്തിൽ “കൂടുതലായാൽ നല്ലത്” എന്ന ധാരണ തെറ്റാണ്. മിതമായ അളവാണ് ഏറ്റവും പ്രധാനം.

ഭക്ഷണമാണോ സപ്ലിമെന്റുകളാണോ പ്രധാനം?

നമ്മുടെ പ്രകൃതിദത്തമായ ആഹാരത്തിന് പകരമാവാൻ ഒരു മൾട്ടി വൈറ്റമിൻ ഗുളികയ്ക്കും കഴിയില്ല. ഭക്ഷണത്തിലൂടെ ലഭിക്കുന്ന താഴെ പറയുന്ന ഗുണങ്ങൾ ഗുളികകളിൽ നിന്ന് ലഭിക്കില്ല:

• പച്ചക്കറികളിലെ നാരുകൾ

• പഴവർഗ്ഗങ്ങളിലെ ഫൈറ്റോ ന്യൂട്രിയന്റുകൾ (Phytonutrients)

• ഫ്രഷ് ആയ സുഗന്ധവ്യഞ്ജനങ്ങളിലെ ആന്റിഓക്‌സിഡന്റുകൾ (Antioxidants)

• അണ്ടിപ്പരിപ്പുകളിലും വിത്തുകളിലും അടങ്ങിയിട്ടുള്ള ആരോഗ്യകരമായ കൊഴുപ്പുകൾ (Healthy fats)

നമ്മുടെ ആഹാരത്തിൽ അടങ്ങിയിരിക്കുന്ന വിവിധ ഘടകങ്ങൾ സംയോജിച്ചാണ് ശരീരത്തിന് ഗുണം ചെയ്യുന്നത്.

ഗുളികകൾ നിർദ്ദിഷ്ട പോഷകങ്ങൾ മാത്രം (Isolated) നൽകുമ്പോൾ. പ്രകൃതിയാകട്ടെ, ആവശ്യമുള്ള എല്ലാ പോഷകങ്ങളെയും സന്തുലിതമായ രീതിയിൽ ആഹാരത്തിലൂടെ നമുക്ക് പകർന്നു നൽകുന്നു.

കേരളത്തിലെ സാഹചര്യം

ദക്ഷിണേന്ത്യയിൽ, പ്രത്യേകിച്ച് കേരളത്തിൽ കണ്ടുവരുന്ന പ്രധാന പോഷകാഹാര കുറവുകൾ താഴെ പറയുന്നവയാണ്:

• വൈറ്റമിൻ ഡി (Vitamin D): ധാരാളം സൂര്യപ്രകാശം ലഭിക്കുന്ന നാടാണെങ്കിലും, നമ്മുടെ ജീവിതശൈലി കാരണം പലരിലും ഇതിന്റെ കുറവ് കണ്ടുവരുന്നു.

• ബി12 (B12) കുറവ്: സസ്യഭുക്കുകൾക്കിടയിൽ ഈ വൈറ്റമിൻ കുറയാനുള്ള സാധ്യത കൂടുതലാണ്.

• അയൺ (ഇരുമ്പ്) കുറവ്: പ്രത്യേകിച്ച് സ്ത്രീകളിൽ വിളർച്ചയ്ക്കും ക്ഷീണത്തിനും ഇത് കാരണമാകുന്നു.

അതുകൊണ്ട്, ഏതെങ്കിലും  മൾട്ടി വൈറ്റമിൻ ഗുളിക വാങ്ങി കഴിക്കുന്നതിനേക്കാൾ,  രക്തപരിശോധന നടത്തി ശരീരത്തിൽ ഏത് പോഷകത്തിന്റെ കുറവാണുള്ളതെന്ന് കൃത്യമായി മനസ്സിലാക്കുക. എന്നിട്ട് 

ഒരു ഡോക്ടറുടെ നിർദ്ദേശപ്രകാരം, ആ പ്രത്യേക സപ്ലിമെന്റ് മാത്രം ആവശ്യമായ അളവിൽ കഴിക്കുക. ശാസ്ത്രീയമായും സാമ്പത്തികമായും നോക്കിയാൽ ഈ രീതിയാണ് ഏറ്റവും ഉചിതം.

സപ്ളിമെൻ്റുകൾക്കായി പണം ചെലവഴിക്കുന്നുണ്ടോ?

നിങ്ങൾ താഴെ പറയുന്ന വിഭാഗത്തിൽപ്പെടുന്ന വ്യക്തിയാണങ്കിൽ:

• നല്ല രീതിയിൽ ആഹാരം കഴിക്കുന്ന വ്യക്തിയാണ്

• പരിശോധനകളിൽ ശരീരത്തിന് പോഷകക്കുറവുകൾ ഒന്നുമില്ല.

• പൊതുവേ ആരോഗ്യവാനാണ്.

എങ്കിൽ, ദിവസവും മൾട്ടി വൈറ്റമിൻ കഴിക്കുന്നത് കൊണ്ട് പ്രത്യേകിച്ച് വലിയ മെച്ചമൊന്നും നിങ്ങൾക്ക് ലഭിക്കില്ല.

എന്നാൽ, ശരീരത്തിൽ പോഷകങ്ങളുടെ കുറവുണ്ടെങ്കിൽ സപ്ലിമെന്റുകൾ കഴിക്കേണ്ടത് അനിവാര്യമാണ്.

ശാസ്ത്രീയമായ തെളിവുകളുടെ അടിസ്ഥാനത്തിൽ മരുന്ന് കഴിക്കുന്നതും സമാധാനത്തിന് വേണ്ടി മാത്രം സപ്ളിമെൻ്റുകൾ കഴിക്കുന്നതും തമ്മിൽ വലിയ വ്യത്യാസമുണ്ട്.

കൃത്യമായ കാരണം കൊണ്ട്, കൃത്യമായ അളവിൽ  ഉപയോഗിക്കുമ്പോഴാണ് സപ്ളിമെൻ്റുകൾ പ്രയോജനകരമാകുന്നത്. 

ഓരോ മാസവും വൈറ്റമിൻ ഗുളികകൾക്കായി പണം ചെലവാക്കുന്നതിന് മുൻപ് സ്വയം ഈ ചോദ്യം ചോദിക്കുക:

“ഇത് എനിക്ക് ശരിക്കും ആവശ്യമുണ്ടോ? എന്തെങ്കിലും കുറഞ്ഞുപോകുമോ എന്ന പേടി കൊണ്ടാണോ ഞാൻ ഇതെല്ലാം വാങ്ങിക്കഴിക്കുന്നത്?”

സ്വന്തം ശരീരത്തെക്കുറിച്ചുള്ള തിരിച്ചറിവിലൂടെയാണ് യഥാർത്ഥ ആരോഗ്യം ആർജിക്കാനാകുക. സപ്ളിമെൻ്റ് കമ്പനികളുടെ പരസ്യത്തിന് എല്ലാവർക്കും ഒരുപോലെ ആരോഗ്യം നൽകാനാകില്ല. 

നെല്ലിക്ക.ലൈഫ്  വീക്ഷണം

പ്രകൃതിദത്തമായ ഭക്ഷണത്തിന് മുൻഗണന നൽകുക 

സപ്ലിമെന്റുകൾ കഴിക്കുന്നതിന് മുൻപ് രക്തപരിശോധന നടത്തുക

അമിതമായ അളവിൽ (Megadoses) ഗുളികകൾ കഴിക്കുന്നത് ഒഴിവാക്കുക

വിദഗ്ദ്ധരായ ഡോക്ടർമാരുടെ ഉപദേശം തേടുക

ലക്ഷണങ്ങളെയല്ല, മറിച്ച് പ്രശ്നത്തിന്റെ യഥാർത്ഥ കാരണം കണ്ടെത്തി ചികിത്സിക്കുക

കാരണം, 

ക്യാപ്‌സ്യൂളുകൾ കൊണ്ട് കെട്ടിപ്പടുക്കുന്ന ഒന്നല്ല ആരോഗ്യം.

ശരിയായ ജീവിതശൈലിയിലൂടെയും തീരുമാനങ്ങളിലൂടെയും രൂപപ്പെടേണ്ട ഒന്നാണത്.